قازاقستاندىق «تۇران» ەتنو-فولكلورلىق ءانسامبلىنىڭ الەمدىك تۋرنەسى باستالدى.
ۆاشينگتوندا كونسەرت بەرگەن «تۇران» اقش-تاعى قازاقتاردى رۋحتاندىرىپ، امەريكالىق كورەرمەندى تامساندىردى، دەپ حابارلايدى Almaty-akshamy.kz 24.kz-كە cىلتەمە جاساپ.
ۇلتتىق ونەردى ۇلىقتاپ جۇرگەن توپتىڭ قۇرىلعانىنا بيىل ون بەس جىل تولدى. ورلەۋ مەن قۇلدىراۋ، ازاتتىق ءۇشىن كۇرەس، ەرلىك پەن ەلدىك. بۇل ساقتار مەن عۇندار زامانىنان تارتىپ الاش تاريحىن سازدى اسپاپتار ارقىلى سويلەتكەن وزگەشە كەش بولدى. كورەرمەن بىردە رۋحتانىپ، شابىتتانسا، بىردە زۇلمات جىلدارعا تاپ بولىپ، كوزىنە ەركىسىز جاس الدى.
«مەن تاڭدانا تىڭدادىم. تاريح انيماسيالار ارقىلى سويلەپ جاتتى. ءسوزدى تۇسىنبەسەم دە اۋەن ارقىلى ءاربىر ءساتتى ءسىڭىردىم. مەن ۋكراينا قىزىمىن. سوندىقتان قازاق حالقىنىڭ باسىنان وتكەن زۇلماتتاردى، ونىڭ ىشىندە اشارشىلىققا قاتىستى وقيعالار كوزىمە ەرىكسىز جاس كەلتىردى»، - دەيدى كورەرمەن اننا كونستەنكو.
ال قارا جورعانىڭ مايدا ءجۇرىسىن ەلەستەتەتىن اۋەن ىرعاعى شەت ەلدىكتەردى تامساندىردى. ءتىپتى كورەرمەن ىقىلاسى ايرىقشا بولعانى سونداي، بىرنەشە رەت ورىندارىن تۇرىپ ۇزاق قول سوقتى. تۇران ۇلتتىق جانە تۇركى تىلدەس جۇرتتىڭ وتىزعا جۋىق اسپابىن جەتىك مەڭگەرگەن. ناعىز بەساسپاب دەپ توپ مۇشەلەرىنە ايتۋعا بولادى. اسىرەسە كومەيمەن ءان ايتۋ ۆاشينگتون كورەرمەندەرىنە ەرەكشە اسەر سىيلادى.