تۇنگى كلۋبتا ەسىرتكى ساتۋشى قۇرىقتالدى

ويىن-ساۋىق مەكەمەسىنىڭ اۋماعىندا سينتەتيكالىق مەفەدرون ەسىرتكىسىن ساتىپ جۇرگەن 27 جاستاعى ەر ادام ۇستالدى.

«ءبىزدىڭ بولىمشەنىڭ جەدەل قىزمەتكەرلەرى مەن پوليسيانىڭ ارنايى جاساعى تاڭعى ساعات ۇشتە ارنايى ءىس-شارا جۇرگىزدى. كۇدىكتى قاماۋعا الىندى. ءبىزدىڭ مالىمەتىمىز بويىنشا، تۇنگى كلۋبقا كەلىپ جۇرگەن 27 جاستاعى ر.ەسىمدى ازامات ەسىرتكى تاراتۋمەن اينالىسقان»، – دەدى، الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.

كۇدىكتىنى ءتىنتۋ بارىسىندا اشىق-سۇر ءتۇستى ۇنتاق تۇرىندەگى سينتەتيكالىق زاتى بار بۋما تابىلدى. قوسپا تاركىلەنىپ، سوت-حيميالىق ساراپتاماعا جىبەرىلدى.

سوتقا دەيىنگى تەرگەۋ ق ر قك-نىڭ 297 بابى (ەسىرتكى، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، يەمدەنۋ، ساقتاۋ، تاسىمالداۋ، جونەلتۋ نە وتكىزۋ) بويىنشا تىركەلگەن. ۇستالعان ازامات ۋاقىتشا ۇستاۋ يزولياتورىنا قامالدى. ق ر قك-نىڭ 201 بابىنا سايكەس وزگە اقپارات تەرگەۋ مۇددەسىنە وراي جاريا ەتىلمەيدى. ق ر كونستيتۋسياسىنىڭ 77 بابى 3ء-بولىمى، 1-تارماعى، ق ر قك-نىڭ 19-بابى 1-تارماعىنا ساي كەز كەلگەن ازامات سوت شەشىمى زاڭدى كۇشىنە ەنگەنگە دەيىن كىناسىز دەپ سانالادى.