قوڭىر كۇزدىڭ سالقىنى باستالىسىمەن، اۋا رايى ءجيى قۇبىلادى. سايكەسىنشە مۇنداي كەزەڭدە جەدەل رەسپيراتورلى ۆيرۋستى ينفەكسياسى، تۇماۋ بەلەڭ الادى.
ودان ساقتانۋ جولى قانداي؟
Kazinform اقپاراتتىق اگەنتتىگىنىڭ اقپاراتىنا سۇيەنە وتىرىپ، Almaty-akshamy.kz قىزىلوردا وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى دينارا جاڭابەرگەنوۆانىڭ كەڭەستەرىن ۇسىنادى.
«تۇماۋ جىل سايىن كوپتەگەن ەلدە ەپيدەميالىق سيپاتتا تارالادى. قازاقستاندا وزگە ەلدەردەگى سەكىلدى تۇماۋ جانە جرۆي - دەنساۋلىق ساقتاۋدىڭ وزەكتى ماسەلەسىنىڭ ءبىرى.
تۇماۋ ادەتتە اسقىنۋىمەن ءقاۋىپتى ەكەنى بەلگىلى. ەڭ ءجيى كەزدەسەتىن تۇماۋ اۋرۋىنىڭ اسقىنۋى – پنيەۆمونيا. سونداي-اق، اسقىنۋعا بايلانىستى برونحيت، سينۋسيت، وتيت، ميوزيت، ميوكارديت سەكىلدى اۋرۋ تۇرلەرى تىركەلۋى مۇمكىن. بۇل اۋرۋ 2 جاسقا دەيىنگى بالالار، سوزىلمالى اۋرۋى بار ناۋقاستار جانە قارتتار اراسىندا اۋىر وتەدى. سوندىقتان رەسپيراتورلىق اۋرۋلاردىڭ العاشقى بەلگىسى پايدا بولعان كەزدە ءوزىن-وزى ەمدەۋمەن اينالىسپاي، تەز ارادا ايماقتىق دارىگەرلەردى ۇيگە شاقىرتىپ، دەر كەزىندە ەم الۋ قاجەت»، - دەيدى مامان.
مامان تۇماۋدىڭ الدىن الۋ ءۇشىن الدىمەن يممۋنيتەتتى كوتەرۋ ءۇشىن سالاۋاتتى ءومىر سالتىن ساقتانۋعا، جەكە باس گيگيەناسىن ورىنداۋعا كەڭەس بەرەدى. سونداي-اق، ەپيدماۋسىم كەزىندە كوپشىلىك ورىنداردا، ناشار جەلدەتىلەتىن جەرلەردە بەتپەردە كيىپ جۇرگەن ارتىق بولمايدى. وعان قوسا اراقاشىقتىقتى ساقتاۋ، قولدى ءجيى سابىنداپ جۋىپ، انتيسەپتيكتەردى پايدالانۋ دا ماڭىزدى. دارۋمەندەرگە باي تاعامداردى پايدالانىپ، سالاۋاتتى ءومىر سالتىن ۇستانۋ ءاربىر ازاماتتىڭ دەنساۋلىعىن نىعايتۋعا اسەرىن تيگىزەدى. بۇل ساقتىق شارالارى تەك تۇماۋ مەن جرۆي-دان عانا ەمەس، وزگە دە ينفەكسيالىق اۋرۋلاردى جۇقتىرىپ الۋ ءقاۋپىن تومەندەتەدى.
ق ر ۇكىمەتىنىڭ 2020 جىلعى 24 قىركۇيەكتەگى №612 قاۋلىسىمەن بەكىتىلگەن مەديسينالىق كومەكتىڭ كەپىلدىك بەرىلگەن كولەمى شەڭبەرىندە مىندەتتى پروفيلاكتيكالىق ەكپەلەردى جۇرگىزۋ قاعيداسىنا سايكەس جىل سايىن تۇماۋعا قارسى ۆاكسيناسيالاۋ ءتيىستى كونتينگەنتتەرگە تۇرعىلىقتى مەكەن-جايى بويىنشا ەمحانالاردا تەگىن جۇرگىزىلەدى. ول ەڭ الدىمەن مەديسينا قىزمەتكەرلەرى، مەديسينالىق ۇيىمدا ديسپانسەرلىك ەسەپتە تۇرعان جەتكىنشەكتەر جانە بالالار ۇيلەرىنىڭ، سابيلەر ۇيلەرىنىڭ تاربيەلەنۋشىلەرى، قارتتار ۇيىندە تۇراتىن ازاماتتارعا جۇرگىزىلەدى. سونداي-اق ەپيدەميولوگيالىق كورسەتىلىم بويىنشا جۇزەگە اسادى. بۇدان بولەك، اتالعان كونتينگەنتتە قامتىلماعان ادامدار ەكپەنى اقىلى تۇردە سالدىرۋىنا بولادى. بۇگىنگى كۇنى ەكپەنى اقىلى تۇردە الۋعا بولاتىن ەمحانا بەكىتىلۋ ۇستىندە، ول تۋرالى قوسىمشا حابارلانادى.
سونداي-اق، جۇمىس ورىندارىندا ۇجىمدىق يممۋنيتەتتى قالىپتاستىرۋدىڭ ماڭىزى زور. دەپارتامەنت تاراپىنان تۇماۋ مەن ونىڭ اسقىنۋلارىنىڭ الدىن الۋ ءۇشىن اۋرۋعا بايلانىستى ۇزاق مەرزىمدى جۇمىسقا قابىلەتتىلىگىن جوعالتۋ مەن اۋرۋحاناعا جاتقىزۋدى بولدىرماۋ ءۇشىن ۇجىمدىق يممۋنيتەتتى قالىپتاستىرۋ ماسەلەسى تۇرعىندار اراسىندا ناسيحاتتالىپ كەلەدى. قىسقاسى، ماماندار اعزانى اسقىنۋدان قورعاۋ جانە تۇماۋ ەپيدەمياسىنىڭ دەنساۋلىق سالدارىن ازايتۋ ماقساتىندا جۇمىسشىلار مەن قىزمەتكەرلەرگە ۆاكسيناسيالاۋدى ۇسىنادى.