تۇلەكتەر ءبىلىمى شەكتەۋلى بولىپ تۇر

قاڭتارداعى ۇبت-دا 21 مىڭنان استام تۇلەك شەكتى بالل جيناي المادى. ورتاشا بالل 76 باللدى قۇراعان.

قاڭتارداعى ۇبت-دا 21 مىڭنان استام تۇلەك شەكتى بالل جيناي المادى. بۇل تۋرالى «ق ر عجبم ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ ورتالىق كوممۋنيكاسيالار قىزمەتىندە وتكەن بريفينگتە ايتتى، دەپ حابارلايدى Almaty-akshamy.kz.  Azattyq Ruhy-نا سىلتەمە جاساپ.

«2023 جىلى 123 مىڭعا جۋىق ۇمىتكەر قاڭتارداعى ۇلتتىق ءبىرىڭعاي تەستىلەۋ تاپسىردى. تۇلەكتەردىڭ 77% – ى قازاق تىلىندە، 23% - ى ورىس تىلىندە، 91 ادام اعىلشىن تىلىندە تەستىلەۋدەن ءوتتى. ۇبت باستالعالى شەكتى بالدى 83%-عا جۋىق تالاپكەر جيناپ، 21 مىڭنان استامى (17%-ى) شەكتى بالل جيناي المادى»، - دەدى ەمەلبايەۆ.

ول اتاعانداي، ۇبت ورتاشا بالى 76 بالدى قۇرادى. ەڭ جوعارى بالل – 139.

«تەست تاپسىرمالارىنىڭ سانى – 120. ونىڭ ىشىندە قازاقستان تاريحى 15-تەن 20-عا اۋىستى، ماتەماتيكالىق ساۋاتتىلىقتان – 15، وقۋ ساۋاتتىلىعىنان – 20 جانە ەكى بەيىندىك پاننەن – 35. ەڭ جوعارعى ۇپاي سانى – 140. تەستىلەۋدىڭ جالپى ۋاقىتى – 4 ساعات. تەستىلەنۋشىلەردىڭ ەڭ كوپ تاڭداعان كومبيناسياسى - «ماتەماتيكا-فيزيكا» (19%). تاپسىرۋشىلاردىڭ 18%-ى «بيولوگيا-حيميا» كومبيناسياسىن تاڭداسا، 10%-ى شىعارماشىلىق ەمتيحاندى تاڭداعان. IT باعىتتارعا تۇسۋگە قاجەتتى جاڭا «ماتەماتيكا-ينفورماتيكا» كومبيناسياسىن ۇبت-عا قاتىسۋشىلاردىڭ 10%-ى تاپسىرعان»، - دەدى رۋسلان ەمەلبايەۆ.