قازاقستان رەسەي مۇنايىنىڭ قحر-عا ترانزيتىنەن $1،7 ملرد استام تابىس تابادى
قازاقستان رەسپۋبليكاسى پارلامەنتىنىڭ ءماجىلىسى سارسەنبىدە وتكەن جالپى وتىرىستا "2013 جىلعى 24 جەلتوقسانداعى قازاقستان رەسپۋبليكاسىنىڭ ۇكىمەتى مەن رەسەي فەدەراسياسىنىڭ ۇكىمەتى اراسىنداعى قازاقستان رەسپۋبليكاسىنىڭ اۋماعى ارقىلى جۇڭگو حالىق رەسپۋبليكاسىنا رەسەيلىك مۇنايدى تاسىمالداۋ سالاسىنداعى ىنتىماقتاستىق تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاسيالاۋ تۋرالى» زاڭ قابىلدادى.
قازاقستاننىڭ ەنەرگەتيكا ءمينيسترى الماسادام ساتقالييەۆ دەپۋتاتتارعا 2013 جىلعى كەلىسىمگە ەنگىزىلگەن وزگەرىستەر تۋرالى ايتىپ بەردى.
اتاپ ايتقاندا، ءمينيستردىڭ ايتۋىنشا، ترانزيت كولەمى، تاريفتەر جانە مۇناي ءترانزيتى ءۇشىن ەسەپ ايىرىسۋ بويىنشا وزەكتەندىرۋ، سونداي-اق كەلىسىمدى 2033 جىلعا دەيىنگى ون جىلدىق كەزەڭگە رەسەيلىك مۇناي ءترانزيتىن جىل سايىن 10 ملن توننا كولەمىندە ۇزارتۋ كوزدەلىپ وتىر. مۇناي ايداۋ ءتاريفى تونناسىنا 15 اقش دوللارى دەڭگەيىندە بەكىتىلدى.
سونداي-اق، كەلىسىمگە تۇزەتۋلەرمەن تون – 2 (تۋيمازى – ومسك-نوۆوسيبيرسك-2) مارشرۋتىنىڭ ۋچاسكەسىن كەلىسىمگە ەنگىزۋ جانە $2،1 ءتاريفتى بەكىتۋ كوزدەلگەن.
كەلىسىمدى ۇزارتۋ پمحز-ن ومبى-پاۆلودار مۇناي قۇبىرى ارقىلى ق ر تۇسەتىن مۇنايمەن جۇكتەۋدى قامتاماسىز ەتەدى.
"2024 جىلدان 2033 جىلعا دەيىنگى كەزەڭدە رەسەي مۇنايىنىڭ قازاقستان اۋماعى ارقىلى قحر - عا ءترانزيتى ءۇشىن ەكى ۋچاسكە بويىنشا كۇتىلەتىن ءتۇسىم 1.710.000.000 اقش دوللارىن قۇرايدى"، - دەدى ا.ساتقالييەۆ دەپۋتاتتارعا قۇجاتتى ۇسىنا وتىرىپ.
ەستەرىڭىزگە سالا كەتەيىك، جوعارىدا اتالعان كەلىسىمگە 2013 جىلعى 24 جەلتوقساندا قول قويىلىپ، 2014 جىلعى شىلدەدە راتيفيكاسيالاندى. وسى كەلىسىمنىڭ قولدانىلۋ مەرزىمى 2024 جىلعى 1 قاڭتارعا دەيىن ايقىندالدى.
2017 جىلى تاراپتار ءترانزيتتى جىلىنا 7 ملن توننادان جىلىنا 10 ملن تونناعا دەيىن ۇلعايتۋ تۋرالى ۋاعدالاستىقتارعا قول جەتكىزدى.
وسىعان بايلانىستى تاراپتار كەلىسىمدى 2024 جىلدان 2033 جىلعا دەيىن ۇزارتۋعا ءوزارا مۇددەلىلىك ءبىلدىردى جانە 2013 جىلى قول قويىلعان كەلىسىمگە وزگەرىستەر ەنگىزۋ بويىنشا ءتيىستى كەلىسسوزدەرگە كىرىستى.
انىقتاما: 2014 جىلدان 2023 جىلعا دەيىنگى كەزەڭدە قازاقستان اۋماعى ارقىلى رەسەي مۇنايىنىڭ قحر-عا جالپى ءترانزيتى 90.899.271 توننانى قۇرادى. جالپى كىرىس 1.327.000.000 (ءبىر ميلليارد ءۇش ءجۇز جيىرما جەتى ميلليون) اقش دوللارىن قۇرادى.
زاڭدى ق ر پارلامەنتى سەناتى قارايتىن بولادى.