قاتىسۋشىلار ءجۇزۋ، ۇستەل تەننيسى، دارتس، بوۋلينگ جانە ۆولەيبولدان ەرلەر كومانداسى سياقتى سپورت تۇرلەرىنەن جارىستى
وكسفورد قالاسىندا (ۇلىبريتانيا) وتكەن اعزالاردى ترانسپلانتتاۋدان كەيىنگى جانە دياليزدە جۇرگەن ادامدار اراسىنداعى ەۋروپا چەمپيوناتىندا قازاقستاننىڭ قۇراما كومانداسى 26 مەدالدان 12 مەدالعا يە بولىپ، جالپىكوماندالىق ەسەپتە 18ء-شى ورىنعا يە بولدى. ءبىزدىڭ قۇرامانىڭ قورجىنىندا 1 التىن، 6 كۇمىس جانە 5 قولا مەدال بار، دەپ حابارلايدى Almaty-akshamy.kz.
دەنساۋلىق ساقتاۋ مينيسترلىگىنىڭ مالىمەتىنشە، چەمپيوناتقا ەۋروپالىق سپورت فەدەراسياسىنا مۇشە 26 ەلدەن بارلىعى 400-دەن استام سپورتشى قاتىستى. 2018 جىلدان باستاپ وسى فەدەراسيادا قازاقستاننىڭ اتىنان "ءومىر تىنىسى" ترانسپلانتاسيالانعان ناۋقاستاردىڭ قوعامدىق بىرلەستىگى وكىلدىك ەتۋدە.
2022 جىلعى ەۋروپا چەمپيوناتىندا قازاقستان قۇراما كومانداسى 16 سپورتشىدان، 2019 جىلعى رەسپۋبليكالىق جارىستاردىڭ جۇلدەگەرلەرىنەن، جۇرەك جانە بۇيرەك ترانسپلانتاسياسىنان وتكەن، سونداي-اق دياليزدەگى سپورتشىلاردان تۇردى.
قاتىسۋشىلار ءجۇزۋ، ۇستەل تەننيسى، دارتس، بوۋلينگ جانە ۆولەيبولدان ەرلەر كومانداسى سياقتى سپورت تۇرلەرىنەن جارىستى.
وسىلايشا، لاۋرا تاباجانوۆا 29-40 جاس ارالىعىنداعى ايەلدەر اراسىنداعى ۇستەل تەننيسىنەن جەڭىسكە جەتتى. 19-30 جاس ارالىعىنداعى ەرلەر اراسىندا بۇل ساناتتا ەلامان داۋلەتحان ەكىنشى ورىندى يەلەندى.
50 مەترگە جۇزۋدە كۇمىس جانە قولا مەدالدى جەتپىسپايەۆ مارات پەن گۇلميرا نۇعمانوۆا اكەلدى.
«ەرجان مۇحامادييەۆ پەن وسپانوۆ جانىبەك جۇپتىق بوۋلينگتە ەكى كۇمىس مەدال جەڭىپ الدى. 40-49 جانە 30-39 جاس ارالىعىنداعى دارتستان وتكەن جارىستا ەرجان مۇحامادييەۆ، ايات ايتمانوۆ جانە مۇحامەت وپابەكوۆ كۇمىس مەدالدى يەلەندى. ەۋروپالىق چەمپيوناتتى وتكىزۋدىڭ باستى ماقساتى اعزالار دونورلىعىن دامىتۋعا نازار اۋدارۋ جانە ترانسپلانتاسيادان كەيىن پاسيەنتتەردىڭ مۇمكىندىكتەرىن كورسەتۋ بولىپ تابىلادى»، - دەلىنگەن حابارلامادا.
ءوز كەزەگىندە، قازاقستان كومانداسىنىڭ ترانسپلانتاسيادان وتكەن ادامدار مەن دياليزدەگى پاسيەنتتەر اراسىنداعى حالىقارالىق جارىستارعا قاتىسۋى قازاقستاندىق مەديسينا دامۋىنىڭ جوعارى دەڭگەيىن كورسەتەدى، وندا بۇگىنگى كۇنى ورگانداردى اۋىستىرۋ بويىنشا وپەراسيالاردى جۇرگىزۋ ءۇشىن بارلىق ينفراقۇرىلىمدىق جانە تەحنولوگيالىق بازا قۇرىلعان.
ترانسپلانتاسيا ادامداردى تولىققاندى ومىرىنە قايتارىپ، ءومىر ءسۇرۋ ساپاسىن ارتتىرادى، ولاردىڭ فيزيكالىق جاعدايى سپورتپەن شۇعىلدانۋعا جانە ءتىپتى حالىقارالىق سپورت الاڭدارىندا ەلدىڭ نامىسىن قورعاۋعا مۇمكىندىك بەرەدى.
جانىبەك وسپانوۆتىڭ جەتەكشىلىگىمەن "ءومىر تىنىسى" قوعامدىق ۇيىمى قازاقستاندا ترانسپلانتاسيادان كەيىن ادامداردىڭ ءومىر ءسۇرۋ ساپاسى مەن ۇزاقتىعىن جاقسارتۋعا جانە ولىمنەن كەيىنگى دونورلىقتى جانە اعزالاردى الماستىرۋدى دامىتۋعا جاردەمدەسۋدى ماقسات ەتىپ قويدى.