توتەنشە جاعدايلار مينيسترلىگىنىڭ ازاماتتىق قورعانىس پولكتارىندا 53 الماتىلىق ازامات مەرزىمدى اسكەري بورىشىن وتەيدى. بۇل تۋرالى الماتى قالالىق توتەنشە جاعدايلار دەپارتامەنتى ءمالىم ەتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
ۆەدومستۆونىڭ مالىمەتىنشە، قالالىق تجد «كۇز 2022» ناۋقانى اياسىندا اسكەرگە شاقىرىلۋشىلارمەن تولىقتىرۋدى 100 %-عا ورىنداپ، جاستاردى توتەنشە جاعدايلار مينيسترلىگىنىڭ ازاماتتىق قورعانىس اسكەري بولىمدەرىنە جىبەردى.
«الماتىدا 1 قىركۇيەك - 11 قاراشا ارالىعىندا مەرزىمدى اسكەري قىزمەتكە شاقىرۋ ناۋقانى ءوتتى. بيىلعى كۇزدە 53 جاس اسكەري بورىشىن اتقارۋ ءۇشىن تجم 52859، 68303 اسكەري بولىمدەرىنىڭ قاتارىن تولىقتىرادى. 12 قاراشادا الماتى قالاسى قورعانىس ىستەرى جونىندەگى دەپارتامەنتىنىڭ قالالىق قۇراما پۋنكتىندە اسكەرگە شاقىرىلۋشىلاردى سالتاناتتى تۇردە شىعارىپ سالۋ ءراسىمى ءوتتى، مۋزىكالىق سۇيەلدەمەسىن الماتى قالالىق تجد-نىڭ ۇرمەلى اسپاپتار وركەسترى ورىندادى»،- دەپ حابارلادى قالالىق تجد-نىڭ باسپا ءسوز قىزمەتى.
بولاشاق ساربازداردى شىعارىپ سالۋعا الماتى قالاسى توتەنشە جاعدايلار دەپارتامەنتىنىڭ، الماتى قالاسى قورعانىس ىستەرى دەپارتامەنتىنىڭ قىزمەتكەرلەرى، ارداگەرلەرى، سونداي-اق، دوستارى مەن تۋىستارى كەلدى.
سۋرەت: Inform.kz