الماتى جانە ماسكەۋ ميكروحيرۋرگتارى قاتتى كۇيىكتەن زارداپ شەككەن بالالارعا كۇردەلى وتا جاسادى
الماتىدا №2 قالالىق بالالار كلينيكالىق اۋرۋحاناسىنىڭ بازاسىندا سيرەك كەزدەسەتىن اياق-قول سيرەك پاتولوگياسى، اۋىر كۇيىگى مەن تىرتىعى بار بالالارعا وتا جاسالدى. ءاربىر وتا ەرەكشە. ويتكەنى بارلىق كلينيكالىق جاعدايدىڭ ءوزى سيرەك كەزدەسەدى، دەپ ەسەپتەيدى قازاقستاندىق دارىگەرلەر. وتا كەزىندە بارلىق كلينيكادا كەزدەسپەيتىن تىڭ تەحنولوگيا قولدانىلادى.
«شەبەرلىك ءدارىسى اياسىندا بىرلەسكەن وتالاردى قازاقستاندىق دارىگەرلەر مەن اياق-قول ميكروحيرۋرگياسى بويىنشا الەمدىك دەڭگەيدەگى مامان، ماسكەۋ قالاسىنداعى رەسەي حالىقتار دوستىعى ۋنيۆەرسيتەتىنىڭ تراۆماتولوگيا جانە ورتوپەديا كافەدراسىنىڭ پروفەسسورى يگور گولۋبيەۆ جاسادى. ونىڭ ەلىمىزگە «مەيىرىمدىلىك» ەرىكتى قوعامى» قوعامدىق قورى ۇيىمداستىردى. ءبىز بىرگە تۋا بىتكەن جانە جۇرە پايدا بولعان اياق-قولىندا اقاۋى بار ءتورت بالاعا وتا جاسادىق. بۇل نەگىزىنەن بالالاردىڭ ساپالى ءومىر سۇرۋىنە كەدەرگى كەلتىرەتىن كۇيىكتەر مەن تىرتىقتار بولاتىن»، – دەيدى الماتى قالاسىنىڭ №2 قبكا ديرەكتورى مارات راباندياروۆ.
«ءتورت جاسار سەرىك ءمۇسلىم تەرميالىق كۇيىكتىڭ اۋىر زاردابىن تارتقان. وعان بىرنەشە جىل بۇرىن وتا جاسالعان بولاتىن. ەندى قانمەن قامتاماسىز ەتىلگەن ءتىندى اياقتاعى كۇرەتامىرعا ترانسپلانتاسيالاۋ قاجەت بولدى. ناتيجەسى جاقسى: بىلەكتەگى كەمىستىك جويىلىپ، قول ەمىن-ەركىن قوزعالۋى ءۇشىن كوپ جاراقاتتانباعان باس بارماقپەن جۇمىس ىستەدىك»، – دەيدى №2 قبكا تراۆماتولوگ-دارىگەرى ۇلجان سولتانبەكوۆا.
تاعى ءبىر كىشكەنتاي ناۋقاس ايعانىم نۇربەكقىزىنا «تەرميالىق كۇيىكتىڭ سالدارى» دەگەن دياگنوز قويىلعان. اناسى ءبىر جاسىندا ايعانىمنىڭ اياق-قولى قايناعان سۋعا كۇيگەنىن، كەيىن جارالار تولىق جازىلماي، اياق باقايىنىڭ بۇگىلۋىنە كەدەرگى كەلتىرەتىن تىرتىقتىڭ پايدا بولعانىن ايتادى. وتادان سوڭ قىزدىڭ وڭ تىزەسىنىڭ بۋىنى بۇگىلەتىن بولدى، ناۋقاستىڭ اناسى دارىگەرلەرگە العىس ايتىپ، ايعانىمنىڭ باقايىنىڭ قوزعالعانىن بۇكىل وتباسى بولىپ كۇتكەنىن ايتادى. ءقازىر ايعانىم قوزعالا الادى، وتادان كەيىنگى قالپىنا كەلۋ ەم-شاراسىن قابىلداپ جاتىر.
شەبەرلىك ءدارىسىن وتكىزگەن يگور گولۋبيەۆتىڭ بۇل الماتىعا العاشقى ساپارى ەمەس. ول كۇردەلى دياگنوزى بار بالالاردى قازاقستاندىق ميكروحيرۋرگ ارىپتەستەرىمەن بىرگە ەمدەيدى. ماسكەۋ قالاسىنداعى رەسەي حالىقتار دوستىعى ۋنيۆەرسيتەتىنىڭ تراۆماتولوگيا جانە ورتوپەديا كافەدراسىنىڭ پروفەسسورى بىلاي دەيدى:
«بۇل جولى ەمدەلۋى وتە قيىن جانە باسقا مۇشەدەن تىندەردى ەنگىزۋدى قاجەتسىنەتىن كۇيىكتىڭ سالدارىمەن جويۋمەن اينالىستىق. اتاپ ايتقاندا، كەشە ءبىز ىستىق پەشتى قولىمەن ۇستاپ الىپ، بارلىق ساۋساعى بىرىسىپ كۇيىپ قالعان بالاعا وتا جاسادىق. ءبىز بارلىق كلينيكادا كەزدەسپەيتىن ەكسكليۋزيۆتى تەحنولوگيا قولدانامىز. بالالارمەن جانە سەزىمتال تىندەرمەن جۇمىس جاساۋدا ءار ميلليمەتر ماڭىزدى ءرول اتقارادى، بىزدەگى بارلىق كلينيكالىق جاعدايدىڭ سيرەك كەزدەسەتىنىن ەسكەرسەك، ءاربىر وتا وزىنشە ەرەكشە»، دەپ ءسوزىن تۇيىندەدى ميكروحيرۋرگيا جانە قول جاراقاتى ءبولىمىنىڭ مەڭگەرۋشىسى، مەديسينا عىلىمدارىنىڭ دوكتورى، ماسكەۋ قالاسىنداعى رەسەي حالىقتار دوستىعى ۋنيۆەرسيتەتىنىڭ تراۆماتولوگيا جانە ورتوپەديا كافەدراسىنىڭ پروفەسسورى يگور گولۋبيەۆ.
قازىرگى ۋاقىتتا وتا جاسالعان بارلىق بالا ءوزىن جاقسى سەزىنەدى. دارىگەرلەر 7-10 كۇن بويى ستاسيونار جاعدايىندا باقىلاپ، كەيىن ولاردى بىرتىندەپ اۋرۋحانادان شىعاراتىنىن ايتادى.