پرەزيدەنتتىككە كانديدات قاسىم-جومارت توقايەۆتىڭ رەسپۋبليكالىق قوعامدىق شتابىنىڭ مۇشەلەرى اتىراۋ وبلىسىنىڭ تۇرعىندارىمەن ءبىرقاتار كەزدەسۋ وتكىزدى، دەپ حابارلايدى Almaty-akshamy.kz.
رقش مۇشەلەرى «بولاشاق» مۇناي مەن گازدى كەشەندى دايىنداۋ زاۋىتىنىڭ ۇجىمىمەن كەزدەسىپ، كانديداتتىڭ سايلاۋالدى باعدارلاماسىندا كورسەتىلگەن ەلدىڭ ەنەرگەتيكالىق سەكتورىن دامىتۋ جونىندەگى شارالارعا نازار اۋداردى.
«بۇگىن شتاب مۇشەلەرى مۇناي-گاز، بالىق شارۋاشىلىعى سالالارى كاسىپورىندارىنىڭ ەڭبەك ۇجىمدارىمەن، اتىراۋ وبلىسىنىڭ جۇرتشىلىعىمەن جانە جاستارمەن كەزدەسەدى. ءبىزدىڭ مىندەتىمىز – ءاربىر قازاقستاندىققا الداعى سايلاۋدىڭ ماڭىزدىلىعىن جەتكىزۋ. بارشانى 20 قاراشادا سايلاۋ ۋچاسكەلەرىنە كەلىپ، ازاماتتىق بورىشىن وتەۋگە شاقىرامىز. بۇل – ەلىمىزدىڭ ەرتەڭى ءۇشىن وتە ماڭىزدى تاڭداۋ»، - دەدى رەسپۋبليكالىق قوعامدىق شتاب مۇشەسى باقتىقوجا ىزمۇحامبەتوۆ.
مۇناي-گاز سالاسىنىڭ ارداگەرلەرىمەن كەزدەسۋدە قاسىم-جومارت توقايەۆتىڭ جاقتاستارى سايلاۋالدى باعدارلامانىڭ كاسىپورىندارداعى ەڭبەك جاعدايلارىن جاقسارتۋ جانە جالاقىنى ارتتىرۋعا قاتىستى تارماقتارىنا توقتالدى.
بۇدان سوڭ بالىق وڭدەۋ كاسىپورنىنىڭ الاڭىندا سالا كاسىپكەرلەرىمەن بىرلەسىپ، سايلاۋالدى باعدارلامادا كورسەتىلگەن بالىق شارۋاشىلىعىن دامىتۋ جانە سۋ نىساندارىنىڭ ەكوجۇيەسىن قورعاۋ جونىندەگى شارالار تالقىلاندى.
وسى كۇنى وبلىس جۇرتشىلىعىمەن كەزدەسۋ ءوتتى، ونىڭ بارىسىندا رقش مۇشەلەرى سايلاۋالدى باعدارلامانىڭ وڭىرلەردەگى الەۋمەتتىك جانە كوممۋنالدىق ينفراقۇرىلىمدى دامىتۋعا ارنالعان بولىمىنە ەگجەي-تەگجەيلى توقتالدى.