كەزدەسۋدە مەملەكەت باسشىسى بۇگىن پرەزيدەنت ۆو ۆانگ تحىونگپەن ناتيجەلى كەلىسسوز جۇرگىزگەنىن جانە ونىڭ بارىسىندا ەكىجاقتى ىنتىماقتاستىقتىڭ نەگىزگى باعىتتارى تالقىلانعانىن اتاپ ءوتتى.
پرەزيدەنت قاسىم-جومارت توقايەۆ ۆەتنام پرەمەر-مينيسترى فام مين چينمەن كەزدەستى، دەپ حابارلايدى Almaty-akshamy.kz اقورداعا سىلتەمە جاساپ.
قاسىم-جومارت توقايەۆتىڭ ايتۋىنشا، ەلىمىز ۆەتنامدى وڭتۇستىك شىعىس ازياداعى ەڭ باستى سەرىكتەستەرىنىڭ ءبىرى رەتىندە قاراستىرادى. پرەزيدەنت حانويعا جاساعان ساپارىنىڭ ناتيجەسىن جوعارى باعالادى.
"بۇگىن تاڭەرتەڭ پرەزيدەنت ۆو ۆان تحىونگپەن وتە ناتيجەلى كەلىسسوز جۇرگىزدىم. ءبىز كوپتەگەن سالاداعى قارىم-قاتىناستارىمىز بەن ىنتىماقتاستىعىمىزدى نىعايتۋعا ىقپال ەتەتىن وتە ماڭىزدى ۋاعدالاستىقتارعا قول جەتكىزدىك. جان-جاقتى ىنتىماقتاستىعىمىزدىڭ نەگىزگى باعىتتارى ايقىندالعان بىرلەسكەن كومميۋنيكە قابىلدادىق. سونداي-اق ۆەتنام كاسىپكەرلەرىمەن كەزدەسۋ وتكىزدىم. ولاردىڭ قازاقستان نارىعىنداعى قىزمەتىن قولداۋعا دايىنمىن. ءبىز ەلىمىزدە ۆەتنامدىق بيزنەستىڭ ۇزاق ۋاقىت جۇمىس ىستەۋىنە شىن مانىندە مۇددەلى بولعاندىقتان كومەك كورسەتەمىز. ۆەتنام – ەكونوميكالىق ءوسىم تۇرعىسىنان قارقىندى دامىپ كەلە جاتقان ەل"، – دەدى قاسىم-جومارت توقايەۆ.
مەملەكەت باسشىسى بۇگىن قول قويىلعان ساۋدا-ەكونوميكالىق ىنتىماقتاستىقتى جەدەل دامىتۋ جونىندەگى ۇكىمەتارالىق بىرلەسكەن ءىس-قيمىلدار جوسپارى ساۋدا، ينۆەستيسيا، تەحنولوگيا، اۋىل شارۋاشىلىعى، ترانزيت جانە تۋريزم سياقتى ماڭىزدى سالالار بويىنشا ەكى ەلدىڭ ءوزارا بايلانىستارىن جانداندىرۋعا ىقپال ەتەتىن نەگىزگى قۇجات بولاتىنىنا سەنىم ءبىلدىردى.
ءوز كەزەگىندە ۆەتنام پرەمەر-مينيسترى فام مين چين قاسىم-جومارت توقايەۆتىڭ ساپارى قازاقستان مەن ۆەتنامنىڭ ەكىجاقتى ىنتىماقتاستىعىنا تىڭ سەرپىن بەرەتىنىن اتاپ ءوتتى.
"ەكى تاراپ قول قويعان قۇجاتتار مەن كەلىسىمدەر كەلەشەكتە ىنتىماقتاستىعىمىزعا بەرىك نەگىز بولادى. سىزبەن قازاقستان مەن ۆەتنامنىڭ ساياسات، ديپلوماتيا، ينۆەستيسيا جانە ساۋدا سالالارىنداعى قارىم-قاتىناسىن ودان ءارى دامىتىپ، تەرەڭدەتۋ جولدارىن تالقىلاۋعا مۇددەلىمىز"، - دەدى فام مين چين.