سەۋل تورىندە قازاق حالقىنىڭ ۇلى پەرزەنتى، اقىن اباي قۇنانباي ۇلىنىڭ ءبيۋستى ورناتىلدى
– سەۋل تورىندە قازاق حالقىنىڭ ۇلى پەرزەنتى، اقىن اباي قۇنانباي ۇلىنىڭ ءبيۋستى ورناتىلدى. بۇل – كورەي باۋىرلارىمىزدىڭ قازاق حالقىنا دەگەن زور قۇرمەتىنىڭ بەلگىسى، – دەدى قازاقستان پرەزيدەنتى.
ءبيۋستتىڭ جوباسى قازاقستاندا دايىندالىپ، تۇتاس ءمۇسىنى كورەيادا قولادان قۇيىلعان. قاسىم-جومارت توقايەۆ ءبيۋستتىڭ كورەيا استاناسىنداعى ۋنيۆەرسيتەت اۋماعىنا ورناتىلۋىنىڭ ماڭىزدى ەكەنىنە توقتالدى.
– اباي – ۇلى اقىن عانا ەمەس، كەمەڭگەر ويشىل، ايگىلى اعارتۋشى. سوندىقتان، ابايعا ارنالعان ءبيۋستتىڭ ءبىلىم ورداسىنا قويىلۋى ورىندى شەشىم ەكەنى ءسوزسىز. مۇنىڭ سيمۆولدىق ءمان-ماڭىزى ايرىقشا. ول جۇرتتى عىلىم يگەرۋگە، ءبىلىمدار بولۋعا ۇندەدى. جاڭاشىلدىق پەن جاسامپازدىقتى دارىپتەدى. اباي مۇراسى – ءبىزدىڭ ەلىمىزگە عانا ەمەس، بارشا ادامزاتقا ورتاق قۇندىلىق. دالا دانىشپانىنىڭ «ادام بالاسى ادام بالاسىنان اقىل، عىلىم، ار، مىنەز دەگەن نارسەلەرمەن وزباق» دەگەن ءسوزى بار. بۇل قاسيەتتەردى كورەي حالقى دا ەرەكشە باعالايتىنىن بىلەمىز. وسى قۇندىلىقتاردىڭ ارقاسىندا قازىرگى تاڭدا كورەيا رەسپۋبليكاسى وزىق دامىعان مەملەكەتتەردىڭ قاتارىنا قوسىلىپ وتىر. بىلتىر ءبىز ابايدىڭ 175 جىلدىق مەرەيتويىن اتاپ وتتىك. وسىعان وراي، كوپتەگەن اۋقىمدى ءىس-شارالار ۇيىمداستىردىق. اباي شىعارمالارى الەمنىڭ بىرنەشە تىلىنە اۋدارىلدى. سونىڭ ىشىندە، كورەي تىلىندە «التىن شاڭىراقتا شىرقالعان ءان» اتتى كىتابى جارىققا شىقتى. كورەيادا ۇلى ويشىلعا ارنالعان ماركالار ازىرلەندى. مۇنىڭ ءبارى ەكى ەلدىڭ رۋحاني ىنتىماقتاستىعىن ودان ءارى نىعايتا تۇسەرى انىق، – دەدى مەملەكەت باسشىسى.
2010 جىل قازاقستاننىڭ كورەياداعى جىلى دەپ جاريالانسا، 2011 جىلى كورەيانىڭ قازاقستانداعى جىلى اتاپ ءوتىلدى. قاسىم-جومارت توقايەۆ وسى شارالار ارقىلى بارلىق باعىتتاعى بايلانىستاردىڭ ارتا تۇسكەنىنە توقتالدى.
– اسىرەسە، مادەني-رۋحاني سالاداعى ىنتىماعىمىزدى نىعايتتىق. وسىنداي تىعىز قارىم-قاتىناس بولاشاقتا دا جالعاسىن تابادى. قازاقستاننىڭ جەتەكشى وقۋ ورنىندا كورەي ءتىلى وقىتىلىپ كەلەدى. كورەيالىق ستۋدەنتتەر دە قازاق ءتىلىن وقىپ جۇرگەنىن جاقسى بىلەمىن. بۇل، ارينە، كوڭىل قۋانتارلىق ەرەكشە جاعداي. كوپتەگەن قازاق جاستارى كورەي ۋنيۆەرسيتەتتەرىندە ءبىلىم الۋدا. ءبىز ءبىلىم، عىلىم جانە مادەنيەت سالاسىنداعى ىنتىماقتاستىقتى ودان ءارى جالعاستىرا بەرەمىز. بۇل ءوزارا بايلانىستى كەلەشەكتە دە دوستىق رۋحتا دامىتا تۇسۋگە جول اشادى، – دەدى قازاقستان پرەزيدەنتى.
مەملەكەت باسشىسى ءسوزىنىڭ سوڭىندا اتسالىسقان ازاماتتارعا شىنايى ريزاشىلىعىن ءبىلدىرىپ، اباي مۇراسىنىڭ كورەي حالقىنىڭ رۋحاني الەمىنەن ورنىن تاباتىنىنا سەنىمدى ەكەنىن ايتتى.