قازنەتتە ينۆەستيسيالىق جانە قارجىلىق الاياقتاردىڭ ىس-ارەكەتىنەن زارداپ شەككەندەردىڭ بارلىعىنا اقشانى قايتارىپ بەرەتىن قور جارناماسى تاعى دا تارادى.
بۇل حابارلاماعا سەنبەگەن ءجون، ونى ينتەرنەت-قىلمىسكەرلەر جاساعان، دەپ حابارلايدى Almaty-akshamy.kz Stopfake.kz-كە سىلتەمە جاساپ.
باعدارلامانى قازاقستان پرەزيدەنتى قاسىم-جومارت توقايەۆ ىسكە قوسقان ەكەن. «ماماندار» 72 ساعات ىشىندە الدىن الا تولەمسىز 500 مىڭ تەڭگەدەن قايتارۋعا دايىن.
جارنامادا «قازاقستان حالقىنا» قورى اتالعان. بۇل مەملەكەت باسشىسىنىڭ تاپسىرماسىمەن 2022 جىلدىڭ قاڭتارىندا قۇرىلعان ۇيىم. الايدا قور دەنساۋلىق ساقتاۋ، ءبىلىم بەرۋ جانە الەۋمەتتىك قولداۋ سالاسىنداعى پروبلەمالاردى شەشۋمەن اينالىسادى. ول الاياقتاردان زارداپ شەككەندەرگە كومەكتەسپەيدى، ونىڭ الدىنا مۇنداي مىندەت قويىلماعان.
الاياقتار قوردىڭ لوگوتيپى مەن قۇرىلىمىن قولدانا وتىرىپ، ۇقساس سايت جاساعان. ءبىراق مۇقيات قاراساق، پورتالدىڭ جالعان ەكەندىگىن بايقايمىز. مۇنى دومەندىك اتاۋىنان، ماتىندەگى قاتەلەردەن تۇسىنۋگە بولادى. سونىمەن قاتار، پورتال تەگىن Tilda سايت قۇراستىرۋشىسىنىڭ كومەگىمەن ازىرلەنگەن. مەملەكەتتىك ورگانداردىڭ ينتەرنەت-رەسۋرستارىن جوعارى بىلىكتى ماماندار دايىندايدى. ولار بۇل ءۇشىن تەگىن باعدارلامالاردى پايدالانبايدى. رەسمي پاراقشالاردى جاساعاندا ەڭ الدىمەن قاۋىپسىزدىككە باسا نازار اۋدارىلادى، قاراپايىم سايت قۇراستىرۋشىسى مۇنى قامتاماسىز ەتە المايدى.
الاياقتاردان زارداپ شەككەن قازاقستاندىقتارعا اقشانى قايتاراتىن جاڭا باعدارلاما تۋرالى اقپارات ق ر پرەزيدەنتىنىڭ رەسمي پورتالىندا جوق.
«جەكە دەرەكتەرىڭىزدى قالدىرماس بۇرىن بارلىق اقپاراتتى مۇقيات وقىپ شىعىڭىز جانە تالداڭىز. جالعان سايتتار الداپ، اقشاڭىزدى يەمدەنۋ ماقساتىندا جاسالادى. سىزدەردى تەك رەسمي حابارلامالارعا عانا سەنۋگە شاقىرامىز! جاڭالىقتاردىڭ شىنايىلىعىن ءبىزدىڭ پورتالدىڭ كومەگىمەن تەكسەرۋگە بولادى. كۇمان كەلتىرگەن اقپاراتتى t.me/stopfakechatkz Telegram-ارناسىنا جىبەرىڭىز»، دەلىنگەن Stopfake.kz اقپاراتىندا.