تۇركىتىلدەس مەملەكەتتەر ىنتىماقتاستىق كەڭەسىنىڭ VII سامميتىندە قازاقستان پرەزيدەنتى قاسىم-جومارت توقايەۆ قازاق حالقى ءۇشىن اسا ماڭىزدى ماسەلەگە توقتالدى. ول قيىن-قىستاۋ زاماندا قازاققا قۇشاعىن جايعان تۇرىك حالقىنا العىس ايتىپ، وسى ەلدىڭ مەملەكەت قايراتكەرى ادنان مەندەرەستىڭ رۋحىنا تاعزىم ەتتى، دەپ حابارلايدى almaty-akshamy.kz قازاقپاراتقا سىلتەمە جاساپ.
– مەن بۇگىن تاعى ءبىر وتە ماڭىزدى تاريحي وقيعا تۋرالى اتاپ وتكىم كەلەدى. بۇل وتكەن عاسىردىڭ ورتاسىندا تاعدىر تالكەگىمەن تاۋ اسىپ، تاس باسىپ، ارىپ-اشىپ انادولى جەرىنە كەلگەن مىڭداعان قازاق وتباسىن ءوز باۋىرىم دەپ قۇشاق جايىپ قارسى العان ادنان مەندەرەس جونىندە بولىپ وتىر. ول وتكەن عاسىردىڭ ەلۋىنشى-الپىسىنشى جىلدارى، ون جىل بويى تۇركيا رەسپۋبليكاسىنىڭ پرەمەر-مينيسترى بولعان كورنەكتى مەملەكەت جانە قوعام قايراتكەرى. قازاقتاردىڭ وسىندا ورنىعۋىنا، كاسىپ ىستەپ، تامىر جايۋىنا كوپ جاعداي جاساعان بىردەن-بىر تۇلعا بولعانى اقيقات. وسى ماڭىزدى جيىن ءوتىپ جاتقان دەموكراتيا جانە بوستاندىق ارالىنىڭ دا ادنان مەندەرەستىڭ تاعدىرىنا تىكەلەي قاتىسى بار. مەن قازاقستان رەسپۋبليكاسىنىڭ پرەزيدەنتى رەتىندە قازاق حالقىنىڭ اتىنان ادنان مەندەرەستىڭ رۋحىنا تاعزىم ەتىپ، قۇشاعى كەڭ بارشا تۇرىك حالقىنا شىنايى العىسىمدى ايتامىن، – دەدى جيىندا قازاقستان پرەزيدەنتى.