سۋمگايت قالاسىنىڭ ورتالىق كوشەلەرىنىڭ بىرىنە احمەت بايتۇرسىنوۆتىڭ ەسىمى بەرىلگەن.
قازاقستان پرەزيدەنتى قاسىم-جومارت توقايەۆ پەن ءازىربايجان پرەزيدەنتى يلحام الييەۆ كەڭەيتىلگەن قۇرامدا كەلىسسوزدەر جۇرگىزدى، دەپ حابارلايدى Almaty-akshamy.kz.
قاسىم-جومارت توقايەۆ پەن يلحام الييەۆ ءقازاق-ازىربايجان ستراتەگيالىق سەرىكتەستىگىنىڭ نەگىزگى ماسەلەلەرىن تالقىلاپ، ساياسي، ساۋدا-ەكونوميكالىق، كولىك-ترانزيتتىك جانە مادەني-گۋمانيتارلىق ىنتىماقتاستىقتى نىعايتۋعا ەرەكشە نازار اۋداردى.
«قازاقستان مەن ءازىربايجان – جاقىن مەملەكەتتەر، ءبىز ستراتەگيالىق سەرىكتەسپىز جانە وداقتاسپىز. بۇگىن ەلدەرىمىز اراسىنداعى ستراتەگيالىق قاتىناستاردى نىعايتۋ جانە وداقتاستىق ءوزارا ءىس-قيمىلدى تەرەڭدەتۋ تۋرالى دەكلاراسياعا قول قويىلادى»، – دەدى مەملەكەت باسشىسى.
قاسىم-جومارت توقايەۆ ءازىربايجانعا ەكىجاقتى ىنتىماقتاستىقتى جاڭا دەڭگەيگە شىعارۋ ءۇشىن ارنايى ميسسيامەن كەلگەنىن ايتتى. قازاقستان پرەزيدەنتى ەكىجاقتى ساۋدا-ەكونوميكالىق بايلانىستاردى دامىتۋ ماسەلەلەرىنە ەگجەي-تەگجەيلى توقتالدى.
كەيىنگى جىلدارى تاۋار اينالىمىنىڭ ايتارلىقتاي، ءۇش ەسەگە جۋىق وسكەنىنە قۋانىشتىمىن. ءبىراق بۇل، ارينە، جايباراقات جۇرۋگە نەگىز ەمەس ەكەنىن اتاپ وتكىم كەلەدى. ساۋدانى ارتتىرۋعا مۇمكىندىكتەر بار دەپ ەسەپتەيمىن. ءبىزدىڭ ۇكىمەتتەرىمىز جاقىن ارادا ەلدەرىمىز اراسىنداعى تاۋار اينالىمىن 1 ميلليارد دوللارعا دەيىن ۇلعايتۋ ءۇشىن جۇمىس ىستەۋى كەرەك، – دەدى مەملەكەت باسشىسى.
قاسىم-جومارت توقايەۆ ءازىربايجاندا پرەزيدەنت يلحام الييەۆتىڭ باسشىلىعىمەن جۇرگىزىلىپ جاتقان اۋقىمدى ساياسي جانە الەۋمەتتىك-ەكونوميكالىق رەفورمالاردى جوعارى باعالادى.
سونىمەن قاتار قازاقستان پرەزيدەنتى گۋمانيتارلىق ىنتىماقتاستىقتى دامىتۋدىڭ قولايلى پەرسپەكتيۆالارىنا نازار اۋداردى.
«مەنىڭ ويىمشا، كەلەسى جىلى ەكى ەل ۇكىمەتتەرى اراسىنداعى كەلىسىم بويىنشا ءبىز قازاقستاندا ءازىربايجان مادەنيەتىنىڭ ونكۇندىگىن وتكىزە الامىز. ءسىزدىڭ ەلىڭىزدىڭ مادەنيەتىنە ۇلكەن قىزىعۋشىلىق بار. ءبىز ءازىربايجان مادەنيەتىنىڭ كورنەكتى وكىلدەرىن ءوز ەلىمىزدە ۇلكەن ىلتيپاتپەن قابىلدايمىز»، - دەدى قاسىم-جومارت توقايەۆ.
يلحام الييەۆ قازاقستان پرەزيدەنتىنە ءازىربايجانعا كەلۋگە شاقىرۋدى قابىل العانى ءۇشىن العىس ايتتى.
«بۇل ساپار ءبىزدىڭ قارىم-قاتىناسىمىزدىڭ دامۋىنىڭ بولاشاعى ءۇشىن ۇلكەن ماڭىزعا يە بولاتىنىنا سەنىمدىمىن. ەڭ الدىمەن، مەنى قازاقستان رەسپۋبليكاسىنىڭ ەڭ جوعارى «التىن قىران» وردەنىمەن ماراپاتتاعانىڭىز ءۇشىن رەسمي دەلەگاسيانىڭ الدىندا سىزگە تاعى دا العىس ايتامىن. بۇل سىيلىقتى قابىل الۋ - مەن ءۇشىن ۇلكەن مارتەبە. مەن مۇنى ءبىزدىڭ حالىقتارىمىزدىڭ دوستىعى مەن باۋىرلاستىعىنىڭ دالەلى جانە ءازىربايجاننىڭ قارىم-قاتىناسىمىزدى نىعايتۋ باعىتىندا جاساپ جاتقان جۇمىستارىنا بەرىلگەن جوعارى باعا دەپ بىلەمىن. سونداي-اق قازاقستاننىڭ ءازىربايجانعا سىيلىعى – ازات ەتىلگەن اۋماقتاردا سالىناتىن بالالاردىڭ شىعارماشىلىق دامۋ ورتالىعىنىڭ تۇساۋكەسەرى ءوتتى. بۇل حالقىمىزعا دەگەن باۋىرمالدىق كوزقاراستىڭ تاعى ءبىر كورىنىسى - قاراباقتى قالپىنا كەلتىرۋگە قوسقان ۇلەس»، – دەدى ءازىربايجان پرەزيدەنتى.
ءازىربايجان باسشىسى بۇگىن ەكىجاقتى قارىم-قاتىناستاردىڭ كەڭ اۋقىمدى كۇن ءتارتىبى مەن حالىقارالىق ماسەلەلەر بويىنشا جان-جاقتى اڭگىمە بولعانىن اتاپ ءوتتى.
«ارينە، كولىك-لوگيستيكا ينفرراقۇرىلىمىن دامىتۋ جونىندە ۇلكەن جوسپارىمىز بار. قازاقستاندا دا، ءازىربايجاندا دا وسى ينفراقۇرىلىمدى قۇرۋ بويىنشا ۋاقتىلى شارالار قابىلداندى. ءقازىر ەلدەرىمىز اراسىنداعى جۇك تاسىمالىنىڭ كولەمىن جانە كولىك ءترانزيتىن ارتتىرۋ جونىندە باستاما كوتەرىلىپ جاتىر. ءتيىستى ورگاندار بۇل باعىتتا ءوزارا بەلسەندى جۇمىس اتقارىپ وتىر. ساۋدا-ەكونوميكالىق قاتىناستى دامىتۋعا دا تىڭ سەرپىن بەرەتىنىمىزگە سەنىمدىمىن. تاۋار اينالىمىن ارتتىرۋداعى رەزەرۆىمىز ايتارلىقتاي كوپ. بۇگىن ءبىز كەلەشەكتەگى ساۋدا-ەكونوميكالىق ىنتىماقتاستىعىمىزدىڭ ءبىرقاتار باعىتى بويىنشا پىكىر الماستىق. ءوزارا تاۋار جەتكىزۋ كولەمىن ارتتىرۋ جوسپارىن ناقتىلاي الامىز. سونداي-اق ينۆەستيسيا سالاسىندا زور مۇمكىندىگىمىز بار. قازاقستاندا دا، ءازىربايجاندا دا قولايلى ينۆەستيسيالىق كليمات قالىپتاسقان. شەتەلدىك ينۆەستيسيانىڭ كولەمى ۇلكەن. وسى باعىتتاعى كۇش-جىگەرىمىزدى بىرىكتىرىپ، قازاقستان مەن ءازىربايجانداعى، سونىمەن قاتار وزگە دە ەلدەردەگى بىرلەسكەن ينۆەستيسيالىق جوبالارعا قاتىساتىن ۋاقىت كەلدى دەپ ويلايمىن»، – دەدى يلحام الييەۆ.
سونىمەن قاتار ءازىربايجان پرەزيدەنتى جاقىندا سۋمگايت قالاسىنىڭ ورتالىق كوشەلەرىنىڭ بىرىنە قازاق حالقىنىڭ كورنەكتى ازاماتى، اعارتۋشى، تۇركىتانۋشى احمەت بايتۇرسىنوۆتىڭ ەسىمى بەرىلگەنىن ەسكە سالدى. ول باۋىرلاس ەكى ەل اراسىنداعى قارىم-قاتىناس تابىستى داميتىنىنا سەنىم ءبىلدىردى.