قاسىم-جومارت توقايەۆ وتاندىق شاحمات شەبەرلەرىنىڭ حالىقارالىق ارەناداعى جەتىستىكتەرىنە جوعارى باعا بەردى
مەملەكەت باسشىسى قازاقستان شاحمات فەدەراسياسىنىڭ پرەزيدەنتى تيمۋر تۋرلوۆتى قابىلدادى. كەزدەسۋ بارىسىندا ەلىمىزدە شاحماتتى دامىتۋ ماسەلەلەرى تالقىلاندى، دەپ حابارلايدى Almaty-akshamy.kz.
اقوردانىڭ رەسمي سايتىنىڭ جازۋىنشا، قاسىم-جومارت توقايەۆقا جۋىردا قازاقستاندا حالىقارالىق شاحمات فەدەراسياسىمەن (FIDE) بىرلەسىپ ۇيىمداستىرىلعان حالىقارالىق تۋرنيرلەردىڭ قورىتىندىسى جونىندە مالىمەت بەرىلدى.
تيمۋر تۋرلوۆ فەداراسيانىڭ الداعى كەزەڭگە ارنالعان جوسپارى تۋرالى ايتتى. اتاپ ايتقاندا، فەدەراسيا ەلىمىزدەگى شاحمات سەكسيالارىنىڭ سانىن 2 ەسە، ياعني 7 مىڭنان 14 مىڭعا دەيىن ۇلعايتۋدى، شاحماتتى ودان ءارى دارىپتەۋ جۇمىستارىن جالعاستىرۋدى، وسىلايشا زياتكەرلىك ۇلت قالىپتاستىرۋعا ۇلەس قوسۋ جونىندەگى پرەزيدەنت تاپسىرمالارىن ورىنداۋدى كوزدەيدى. سونداي-اق فەدەراسيا قازاقستان قۇراماسى كوشباسشىلارىنىڭ الەۋەتىن تانىتۋدى، جاڭا چەمپيونداردى تاربيەلەپ شىعارۋدى ماقسات ەتىپ وتىر.
مەملەكەت باسشىسىنا الەم چەمپيونى اتاعى ءۇشىن بيىل 7 ءساۋىر مەن 1 مامىر ارالىعىندا استانادا وتەتىن شاحمات جارىسىنا دايارلىق بارىسى تۋرالى باياندالدى.
قاسىم-جومارت توقايەۆ وتاندىق شاحمات شەبەرلەرىنىڭ حالىقارالىق ارەناداعى جەتىستىكتەرىنە جوعارى باعا بەردى. ونىڭ ايتۋىنشا، ەلىمىزدە الەمنىڭ ۇزدىك شاحماتشىلارىنىڭ قاتىسۋىمەن ءىرى جارىستار ۇيىمداستىرۋ بالالار مەن جاستار اراسىندا وسى سپورت ءتۇرىنىڭ تانىمالدىلىعىن ارتتىرۋعا ىقپال ەتەدى.