مەملەكەت باسشىسى قاسىم-جومارت توقايەۆ مەديسينا قىزمەتكەرلەرىنە شابۋىل جاساعاندارعا جازانى كۇشەيتۋدى تاپسىردى، - دەپ حابارلايدى aqshamnews.kz ءتىلشىسى.
"مەملەكەت باسشىسى مەديسينا قىزمەتكەرلەرىنە شابۋىل جاساپ، كۇش قولدانىپ جانە قاتىگەزدىك تانىتقان ارەكەتتەرگە قاتىستى جازانى قاتاڭداتۋ ماقساتىندا ۇلتتىق زاڭناماعا وزگەرىستەر ەنگىزۋ تۋرالى پارلامەنت دەپۋتاتتارىنىڭ، دەنساۋلىق ساقتاۋ سالاسى وكىلدەرىنىڭ جانە بەلسەندى ازاماتتاردىڭ ۇسىنىسىن قولدايدى"، - دەلىنگەن حابارلامادا.
دارىگەرلەردىڭ دەنساۋلىعىنا نۇقسان كەلتىرىپ، ومىرىنە ءقاۋىپ توندىرەتىن مۇنداي كەلەڭسىزدىكتەرگە "زاڭ جانە ءتارتىپ" قاعيداتىنا سايكەس قۇقىقتىق تۇرعىدا باتىل تۇردە توسقاۋىل قويىلۋى كەرەك.
پرەزيدەنت ۇكىمەتكە ءتيىستى زاڭنامالىق تۇزەتۋلەر ازىرلەۋدى تاپسىردى. بۇل باستاما پارلامەنتتە ازاماتتىق قوعام وكىلدەرىمەن بىرگە تالقىلانادى.
ەسكە سالايىق، بۇعان دەيىن قاراعاندىدا ناۋقاس جەكە ەمحانانىڭ دارىگەرىنە شابۋىل جاساعان بولاتىن. وقيعا ءدال مەديسينالىق مەكەمە عيماراتىندا بولعان.
قوستانايدا وبلىستىق اۋرۋحانادا حيرۋرگ اياۋسىز سوققىعا جىعىلدى.
دارىگەرگە شابۋىل جاساعان كۇدىكتى ەكى ايعا قاماۋعا الىندى. دەنەگە اۋىر زاقىم كەلتىرگەنى ءۇشىن ول 3 جىلدان 8 جىلعا دەيىن باس بوستاندىعىنان ايىرىلۋى مۇمكىن.