ۇكىمەتتىڭ كەڭەيتىلگەن كەڭەسىندە مەملەكەت باسشىسى قاسىم-جومارت توقايەۆ جەرگىلىكتى ءماسليحاتتاردىڭ الدىنداعى ناقتى مىندەتتەردى اتادى، دەپ حابارلايدى قازاقپارات ءتىلشىسى.
«وتكەن جىلدىڭ سوڭىندا مەن ۆيسە-مينيسترلەر قۇرامىنىڭ ساپاسىنا تالداۋ جۇرگىزۋدى تاپسىردىم. بەلگىلى ءبىر دەڭگەيدە جۇمىس جۇرگىزىلدى. ءاربىر لاۋازىمدى تۇلعاعا ونىڭ جەكە جانە كاسىبي قۇزىرەتتەرىنە سايكەس باعا بەرىلدى.قازىرگى تاڭدا وسىنداي تالداۋ وبلىس اكىمدەرىنىڭ ورىنباسارلارىنا قاتىستى جۇرگىزىلىپ جاتىر. ۇكىمەت پەن اكىمشىلىك كادرلىق شەشىمدەر قابىلداۋ كەزىندە قىزمەتىن ءوسىرۋ كەزىندە دە، قىزمەتىنەن بوساتۋ كەزىندە دە وسى باعالاۋ ناتيجەلەرىن ەسكەرۋى كەرەك. جەرگىلىكتى ءوزىن-وزى باسقارۋدىڭ الەۋەتىن كۇشەيتۋ قاجەت. بۇل تۇرعىدا كوپ نارسە جاڭادان سايلانعان ءماسليحاتتاردىڭ جۇمىس ساپاسىنا بايلانىستى بولادى. سوڭعى الەۋمەتتىك ساۋالنامالارعا سايكەس، بۇگىنگى تاڭدا ازاماتتاردىڭ ءماسليحاتتارعا دەگەن سەنىمى از – تەك 53% عانا»، – دەدى قاسىم-جومارت توقايەۆ.
پرەزيدەنت كەڭەسكە قاتىسىپ وتىرعان جەرگىلىك ءماسليحات ءتوراعالارىنا: «سىزدەردىڭ ءبىرىنشى كەزەكتەگى مىندەتتەرىڭىز – جەڭىل ءپوپۋليزمنىڭ جەتەگىنە ەرمەي، جەرگىلىكتى تۇرعىنداردىڭ مۇددەسىن قورعاۋ. دەپۋتاتتار ەلەكتوراتتىڭ وزەكتى ماسەلەلەرىن شەشۋدە كۇندەلىكتى قاجىرلى جۇمىسقا كوشىپ، كاسىبيلىك پەن جاۋاپكەرشىلىك تانىتۋعا ءتيىس. اكىمدىكتەرمەن ءوزارا ءىس-قيمىل اتقارۋشى ورگاندار قابىلدايتىن شەشىمدەردىڭ اشىقتىعىن قامتاماسىز ەتە وتىرىپ، سىندارلى جۇرگىزىلۋى كەرەك»، – دەدى مەملەكتە باسشىسى.