پرەزيدەنتكە تاپسىرمالارىنىڭ ورىندالۋ بارىسى تۋرالى مالىمەت بەرىلدى.
بۇگىن مەملەكەت باسشىسى قاسىم-جومارت توقايەۆ مادەنيەت جانە سپورت ءمينيسترى اسحات ورالوۆتى قابىلدادى، دەپ حابارلايدى Almaty-akshamy.kz
مينيسترلىكتىڭ مادەنيەت، سپورت جانە تۋريزم يندۋسترياسىن دامىتۋعا باعىتتالعان باستامالارى تانىستىرىلدى.
مەملەكەت باسشىسىنا الماتى وبلىسىندا سپورتشىلاردى وليمپياداعا دايارلايتىن رەسپۋبليكالىق بازانىڭ قۇرىلىسى تۋرالى باياندالدى. نىسان بيىل پايدالانۋعا بەرىلەدى دەپ جوسپارلانىپ وتىر. 2025 جىلعا دەيىن جالپى 113 سپورت نىسانى سالىنادى. سونىمەن قاتار مينيستر دەنە شىنىقتىرۋ مەن سپورتتى دامىتۋدىڭ 2023-2029 جىلدارعا ارنالعان تۇجىرىمداماسىنىڭ جوباسى تۋرالى ايتتى.
بۇدان بولەك، پرەزيدەنتكە قازاقستاندىق سپورتشىلاردىڭ الداعى جازدا وتەتىن ازيا، وليمپيادا ويىندارىنا دايىندىعى جانە 2024 جىلى ەلىمىزدە V دۇنيەجۇزىلىك كوشپەندىلەر ويىندارىن ۇيىمداستىرۋ جۇمىستارى تۋرالى باياندالدى.
قاسىم-جومارت توقايەۆتىڭ تاپسىرماسى بويىنشا 2025 جىلعا دەيىن مادەنيەت جانە مۇراعات ۇيىمدارى قىزمەتكەرلەرىنىڭ جالاقىسى كەزەڭ-كەزەڭمەن وسەدى.
مينيسترلىك وتاندىق اۆتورلاردىڭ تەاترداعى قويىلىمدارىنىڭ سانىن ارتتىرۋدى جانە قازاقستاندىق فيلمدەر ءتۇسىرۋدى جوسپارلاپ وتىر. بيىل العاش رەت جاس جازۋشىلار مەن اقىندارعا ارنالعان ادەبي سىيلىق تابىستالادى. جەتى رەسپۋبليكالىق مادەنيەت ۇيىمىنا «ۇلتتىق» مارتەبە بەرۋ ماسەلەسى پىسىقتالىپ جاتىر.
اسحات ورالوۆتىڭ ايتۋىنشا، تۋريزم سالاسىن دامىتۋ ماقساتىندا Kids Go Free باعدارلاماسىنا قاتىسۋ ءۇشىن تۋروپەراتورلارعا قويىلاتىن تالاپتار جەڭىلدەتىلگەن. سونداي-اق قازاقستاندىقتار ءۇشىن تۋريستىك كەشبەك ەنگىزۋ جوسپارلانىپ وتىر.
مەملەكەت باسشىسى ىشكى جانە سىرتقى ءتۋريزمدى ودان ءارى ىنتالاندىرۋ، ينۆەستيسيا تارتۋ شارالارىن قابىلداۋدى تاپسىردى. پرەزيدەنت بۇقارالىق سپورتقا قولداۋ كورسەتۋ جانە سپورت ينفراقۇرىلىمىن قولجەتىمدى ەتۋ قاجەت ەكەنىن اتاپ ءوتتى. سونداي-اق الەمدىك دەڭگەيدەگى باسەكەگە قابىلەتتى مادەنيەتتى دامىتۋ ءۇشىن جاعداي جاساۋدىڭ جانە ەلىمىزدەگى كرەاتيۆتى يندۋستريالار بازاسىن قالىپتاستىرۋدىڭ ماڭىزدىلىعىنا نازار اۋداردى.