سەربيا پرەزيدەنتى استاناعا ساپارىن اسىعا كۇتەتىنىن ايتتى.
كەلىسسوزدەر بارىسىندا جاھاندىق جانە ايماقتىق قاۋىپسىزدىك ماسەلەلەرى دە قوزعالدى، دەپ حابارلايدى aqshamnews.kz اقورداعا سىلتەمە جاساپ.
«قازاقستان مەن سەربيا حالىقارالىق جانە وڭىرلىك دەڭگەيدە تىعىز بايلانىس ورناتقان. كوپتەگەن وزەكتى ماسەلە بويىنشا ۇستانىمدارىمىز – ورتاق. قازىرگى گەوساياسي جاعداي كۇردەلى. سول سەبەپتى، ءبىز ىقپالداستىعىمىزدى ودان ءارى كۇشەيتۋگە مۇددەلى ەكەنىمىزدى راستادىق»، – دەدى مەملەكەت باسشىسى.
قاسىم-جومارت توقايەۆ الەكساندر ءۆۋچيچتى كەلەسى جىلى قازاقستانعا رەسمي ساپارمەن كەلۋگە شاقىردى.
سەربيا پرەزيدەنتى اۋقىمدى ماسەلەلەر قوزعالعان بۇگىنگى كەلىسسوزدەردىڭ ناتيجەلى ءارى مازمۇندى سيپاتتا وتكەنىن جەتكىزىپ، كەزدەسۋلەرگە جوعارى باعا بەردى. سونداي-اق مەملەكەتتەر مەن پرەزيدەنتتەر اراسىندا ءوزارا سەنىمگە نەگىزدەلگەن قارىم-قاتىناس ورناعانىن ريزاشىلىقپەن اتاپ ءوتتى.
«قازاقستان مەن سەربيا اراسىنداعى دوستىق حالىقتارىمىزدىڭ ىنتىماقتاستىعىمەن عانا شەكتەلمەيدى. ءبىز حالىقارالىق ۇيىمداردا، سونىڭ ىشىندە بۇۇ اياسىندا بىر-بىرىمىزگە ءوزارا قولداۋ كورسەتەمىز. بۇگىن ءارتۇرلى سالادا ءبىرقاتار كەلىسىمگە قول جەتكىزىلدى. سونىڭ نەگىزىندە ەكى ەلدىڭ تۇپكىلىكتى مۇددەلەرىنە ساي كەلەتىن بىرلەسكەن جوبالار جۇزەگە اسىرىلاتىن بولادى. مەن دوسىم، قازاقستان پرەزيدەنتى قاسىم-جومارت توقايەۆقا سەربيامەن ىقپالداستىقتى نىعايتۋعا قوسقان ەلەۋلى ۇلەسى ءۇشىن شىنايى العىسىمدى ايتامىن»، – دەدى الەكساندر ۆۋچيچ.
بريفينگ سوڭىندا سەربيا پرەزيدەنتى استاناعا ساپارىن اسىعا كۇتەتىنىن جانە مەملەكەت باسشىسىن بەلگرادتا تاعى دا قارسى الۋعا دايىن ەكەنىن جەتكىزدى.