الماتى قالاسىنىڭ اكىمى باقىتجان ساعىنتايەۆ «الماتى» تەلەارناسىنداعى «Akimat LIVE» باعدارلاماسى بارىسىندا الماتىنىڭ دامۋىنا قاتىستى شاھار تۇرعىندارىنىڭ، ب ا ق وكىلدەرىنىڭ ساۋالدارىنا جانە الەۋمەتتىك جەلى ارقىلى كەلگەن وقىرمان سۇراقتارىنا جاۋاپ بەردى، دەپ حابارلايدى almaty-akshamy.kz
سۇراق:
– ءبىز الماتى قالاسىنىڭ الاتاۋ اۋدانىنا قاراستى «رادۋگا» ساياجايىنىڭ تۇرعىندارىمىز. بىزگە 2018 جىلى كارىز جۇيەسى جۇرگىزىلگەن بولاتىن، سۋ بەرىلدى. كارىز جۇيەسى بولسا ءالى كۇنگە پايدالانۋعا بەرىلگەن جوق. مەردىگەرلەر نىساندى «الماتى سۋ»-عا تاپسىردىق دەيدى، ولار بولسا، قابىلداعان جوقپىز دەپ وتىر. بىر-بىرىنە سىلتەيدى.
ەكىنشى ماسەلە، جارىقتاندىرۋ جايىندا. ءبىزدىڭ كوشەلەر قاراڭعى. كامەلەتتىك جاسقا تولماعان بالالار كوپ. وقۋ باستالسا، جولعا دەيىن 200 مەتر جۇرۋلەرى كەرەك بولادى. وسى ساۋالدارىمىزعا جاۋاپ بەرسەڭىز...
بۇل ساۋالعا جاۋاپ بەرۋ ءۇشىن الاتاۋ اۋدانىنىڭ اكىمى ازامات قالدىبەكوۆ ەفيرگە ونلاين قوسىلدى:
– ءبىرىنشى سۇراق بويىنشا، «رادۋگا» ساياجايىندا «اگيدەل» كومپانياسى سۋ جانە كارىز جۇيەلەرىن جۇرگىزگەن بولاتىن. سۋ تۇرعىندارعا تولىق جەتكىزىلدى، الايدا كارىز جۇيەسىن قوسۋ ءۇشىن سورعى ستانسياسىن سالۋ كەرەك. بۇل باعىتتا قالالىق ەنەرگوتيىمدىلىك باسقارماسى جوبالىق-سمەتالىق قۇجاتتار دايىنداپ جاتىر. ءبىزدىڭ جوسپارىمىزداعى 17 كارىز سورعى ستانسيالارىنىڭ ىشىنە كىرىپ وتىر.
ب.ساعىنتايەۆ:
– جارىق ماسەلەسى بويىنشا ساياجايلاردى قاراستىرماعان بولاتىنبىز. الاتاۋ اۋدانىندا جارىعى جوق كوشەلەردىڭ بارلىعى جارىقتاندىرىلدى، جارتىلاي جارىعى جوق كوشەلەرمەن جۇمىس ىستەۋدەمىز. وسى جۇمىستار اياقتالعاننان كەيىن ساياجايلارعا دا كىرىسەتىن بولامىز.
سۇراق:
– مەن بالالار ءۇيىنىڭ تۇلەگىمىن. جاسىم 34-تە. 29 جاسقا دەيىن زاڭ جۇزىندە جەتىمدەر قاتارىنا ەنە الماي، باسپاناعا كەزەككە تۇرا المادىم. ءقازىر دە مۇمكىندىك بولماي وتىر. ماعان كومەكتەسۋىڭىزدى سۇرايمىن. قاي جەرگە تىركەلەتىنىمدى بىلمەيمىن، باسپانام جوق. مەنى اباي مەن ساين كوشەسى قيىلىسىنداعى «جاستار ۇيىنەن» 29 جاسقا تولعاننان كەيىن شىعارىپ جىبەرگەن. كامەلەت جاسقا تولماعان ەكى بالام بار.
ب.ساعىنتايەۆ:
– ءسىز ءوزىڭىزدىڭ جەكە اقپاراتتارىڭىزدى ستۋديادا قالدىرىڭىز، ءبىزدىڭ قىزمەتكەرلەر سىزگە كەيىن حابارلاسادى. كومەكتەسەمىز.
سۇراق:
– مەدەۋ اۋدانىندا «شيروكايا ششەل» اۋماعىندا تاۋلى ايماق بولعاندىقتان، ياى جولدار جابىق. جولدىڭ ۇڭىرەيىپ تۇرعانىنا 10 جىلداي بولدى. ءبىز ونى ورنىنا كەلتىرە الماي وتىرمىز. قالالىق موبيلدىلىك باسقارماسى وزدەرىڭىزدىڭ قاراجاتتارىڭىزدان جاساڭىزدار دەيدى، الايدا تاۋلى ايماق جەرى قالاعا كىرەدى عوي.
ب.ساعىنتايەۆ:
– وندا شىنىمەن دە قۇلاعان 2-3 جولدار بار. باۋ-باقشا سەرىكتەستىگى بولعاندىقتان، ءبىز وندا جۇمىستار جۇرگىزبەدىك. ءبىراق ادام ومىرىنە ءقاۋىپ توندىرەتىندەي جاعداي بولسا، قاراستىرىپ كورۋ كەرەك.
سۇراق:
– قونايەۆ پەن ماقاتايەۆ كوشەلەرىنىڭ قيىلىسىندا ەسكى، قۋراعان تەرەك تۇر. سىزگە ەكى رەت حات جازدىم. ماسەلەنى شەشۋ ءۇشىن ءوزىڭىزدىڭ اتىڭىزدان، اكىمشىلىكتەن كوميسسيا جىبەرۋدى سۇرايمىن.
ب.ساعىنتايەۆ:
– جاقسى، ەرتەڭ تەكسەرۋگە ماماندار جىبەرەمىن. شىنىمەن اپاتتى جاعدايدا تۇرسا، ءتيىستى شارالار قولعا الىنادى.
سۇراق:
– تولە بي كوشەسىندە نە بولىپ جاتىر؟ نە ءۇشىن ونى قايتا قازىپ جاتىر؟ جوندەۋ جۇمىستارى قاشان بىتەدى ەكەن؟
ب.ساعىنتايەۆ:
– تولە بيدەگى ءبىر جولاق قوعامدىق كولىكتەرگە ارنالعان. بايتۇرسىنوۆ كوشەسىنەن اۋەزوۆ كوشەسىنە دەيىن ەكى جولاق. بىرەۋى – قوعامدىق كولىكتەرگە، ەكىنشىسى – قالالىق كولىكتەرگە ارنالعان. ءبىز وسى اۋماقتاعى رەلستى الىپ، اسفالت توسەپ، كەڭەيتپەكشىمىز. رەلستىڭ جانىنا بورديۋر قويامىز. سوندا كوشەنىڭ ەكى جاعىندا دا 3 جولاقتان بولادى. قازىرگى جوندەۋ جۇمىستارى تەك وسى ۋچاسكەدە عانا ءجۇرىپ جاتىر. ءبىز جولدى ءۇش ۋچاسكەگە ءبولىپ تاستاعانبىز. ءقازىر ۇشەۋىندە دە جۇمىستار ءجۇرىپ جاتىر. تولىق جۇمىستار قازان ايىنا دەيىن اياقتالۋى كەرەك. 8 شاقىرىم جولدى ءبىز ورتاشا جوندەۋ جۇمىستارىمەن جابامىز. كەيبىر بورديۋرلاردى اۋىستىرامىز، ارىق جۇيەسى دە قالپىنا كەلتىرىلەدى. قالاي بولسا سولاي ورنالاسقان تۇراقتار بار. وسى كوشەدەگى قيىلىستاردىڭ ءوزى ءقاۋىپتى. «سايران» اۆتوبەكەتىنىڭ ماڭى دا جولدان وتۋگە وتە ءقاۋىپتى. وسى ماڭايداعى جۇمىستاردىڭ ءبارى دۇرىس ۇيىمداستىرىلماعان. كوشەگە جۇرگىزىلىپ جاتقان ورتاشا جوندەۋ جۇمىستارى كەزىندە بۇلاردىڭ ءبارىن رەتكە كەلتىرەمىز. سوڭعى رەت تولە بيگە 2013 جىلى جوندەۋ جۇمىستارى جاسالعان.
سۇراق:
– «كولساي» ىقشاماۋدانى، قويگەلدى 34، 25-ۇيگە كومەك كەرەك. 16 تامىز كۇنى سەل ءجۇرىپ، مەنىڭ ءۇيىمنىڭ الدىن سەل باسىپ قالدى. كەشەلى بەرى مەدەۋ اۋدانىنان ەكى ادام كەلىپ، تازالاپ، بۇگىن دە كەلەمىز دەگەن، ءبىراق ەشكىم كەلمەدى. بىزگە كىم كومەك بەرەدى، سونى ايتساڭىزدار...
ب.ساعىنتايەۆ:
– كوميسسيا بارىپ، كورىپ، كومەكتەسەدى. ماسەلەڭىز شەشىلەدى.
سۇراق:
– الاتاۋ اۋدانىنداعى سارايشىق كوشەسىندە تۇرامىن. ءبىزدىڭ جەر ۇيلەرگە كاناليزاسيا قاشان جۇرگىزىلەدى؟ ودان كەيىن كوكوزەك اۋىلىنا 81 اۆتوبۋس كىرەدى دەپ ەدى. ول قاي كەزدە كىرەدى؟
بۇل ساۋالعا جاۋاپ بەرۋ ءۇشىن الاتاۋ اۋدانىنىڭ اكىمى ازامات قالدىبەكوۆ ەفيرگە ونلاين قوسىلدى:
سارايشىق ەلدىمەكەنى «العاباس» ىقشاماۋدانىنا كىرەدى. شۋلانوۆا، 109 مەكەنجايى بويىنشا سارايشىق كوشەسىندە ماگيسترالدى كارىز جۇيەسى بار. تەحنيكالىق شارتتى الىپ، 9000 تەڭگە تولەپ، قوسىلا الاسىزدار. بولماسا ءبىز ەرتەڭ ءسىزدىڭ مەكەنجايعا شىعىپ، تۇسىندىرمە جۇمىستارىن جۇرگىزەمىز.
ال كوكوزەك بويىنشا قالالىق موبيلدىلىك باسقارماسىمەن بىرلەسە وتىرىپ جۇمىستار جۇرگىزىلدى. مارشرۋت جەلىلەرىن وڭتايلاندىرۋ باعدارلاماسى بويىنشا جاڭادان كەلەتىن اۆتوبۋستار سانىنان سول جاققا جاڭا مارشرۋت شىعارامىز دەگەن جوسپار بار.
ب.ساعىنتايەۆ:
– كەشە كەڭەس وتكىزدىك. قوعامدىق كولىككە قاتىستى سۇرانىس تا، تالاپ-تىلەك تە كوپ. مۇنىڭ ءبارى ەرتەڭ اۆتوبۋستىڭ جەتىسپەۋشىلىگىنە الىپ كەلەدى. بۇل سالادى جۇيەسىزدىك ورىن الماس ءۇشىن بۇدان بىلاي سۇرانىستاردىڭ ءبارىن ءبىر جۇيەگە كەلتىرۋ جۇمىستارى جۇرگىزىلۋدە.
سۇراق:
– مەنى گوگول كوشەسى مەن جىبەك جولى داڭعىلى ارالىعىنداعى جاعداي الاڭداتادى. جاڭبىر جاۋعان كەزدە ءبىزدىڭ جەراستى جولىن سۋ باسىپ قالادى. سوڭعى رەت مەن المالى اۋدانى اكىمدىگىنە حابارلاسقانمىن. الگى جەردىڭ لاستىعى سونشا، سوڭعى كەزدەرى ەگەۋقۇيرىقتار پايدا بولىپتى. كوروناۆيرۋسقا قوسا ەندى ەگەۋقۇيرىقتار جەتپەي تۇر ەدى. كوشەگە سانيتارلىق وڭدەۋ جاسالۋى كەرەك.
ب.ساعىنتايەۆ:
– جىبەك جولى داڭعىلىندا ءقاۋىپتى بۇرىلىس بار، سول جەردى سۋ باسىپ قالعانى بەلگىلى. ال ەگەۋقۇيرىقتار جايلى اقپارات بۇعان دەيىن بولماعان. ءسىز ايتقان مەكەنجايعا جاۋاپتى ورگان ماماندارى بۇگىن بارىپ، تەكسەرىپ، ەرتەڭ تازالىق، سانيتارلىق وڭدەۋ جۇمىستارى جۇرگىزىلەدى.
ءتۇيىن.
«Akimat LIVE» باعدارلاماسىنىڭ كەزەكتى شىعارىلىمىن قورىتىندىلاي كەلە، باقىتجان ساعىنتايەۆ الماتىلىقتاردى تولعاندىرعان سۇراقتاردىڭ بارلىعى جاۋاپسىز قالمايتىنىن قاداپ ايتتى. تۇرعىندار تالاپ-تىلەگى اكىمدىكتىڭ باستى نازارىندا بولادى جانە جۇيەلى تۇردە وڭ شەشىمىن تاباتىن بولادى. سونىمەن قاتار، شاھار باسشىسى كوروناۆيرۋس ينفەكسياسى تارالۋىنىڭ الدىن الۋ ءۇشىن قالا تۇرعىندارىن ادام اياعى كوپ جينالاتىن قوعامدىق ورىندارعا، جيىن-تويلارعا بارماۋعا، قازىرگى ەپيداحۋالعا بايلانىستى كوپشىلىكتى ساقتىق شارالارىنا بارىنشا جاۋاپكەرشىلىكپەن قاراۋعا شاقىردى. ىندەتتى اۋىزدىقتاۋ – ءوز قولىمىزدا. بەلسەندى ەكپە الۋدان باسقا جول جوق. ەكپە الۋ – ىندەتكە توسقاۋىل قويۋدىڭ بىردەن-بىر جولى.
«Akimat LIVE»-تا كەزەكشىلىك ەتكەندەر: قۇرالاي يمانبەك قىزى، اسەل داعجان، دينارا مۇرات.