قازاننىڭ التىسى كۇنى پەداگوگتاردىڭ قۇرىلتايى وتەدى.
ءبىلىم سالاسىنداعى ىنتىماقتاستىق ماسەلەلەرىن تمد-عا مۇشە ەلدەر وكىلدەرى تالقىلادى. ق ر وقۋ-اعارتۋ ءمينيسترى اسحات ايماعامبەتوۆتىڭ توراعالىعىمەن ءبىلىم بەرۋ سالاسىنداعى كەڭەس وتىرىسى ءوتتى. وعان بەلارۋس، تاجىكستان، رەسەي فەدەراسياسى، قىرعىزستان، ارمەنيا ەلدەرىنىڭ وكىلدەرى قاتىستى، دەپ حابارلايدى Almaty-akshamy.kz.
كۇن تارتىبىندە وتىرىسقا قاتىسۋشىلار تمد-عا مۇشە مەملەكەتتەردىڭ بازالىق ۇيىمدارى قىزمەتىن دامىتۋ، ءبىلىم ساپاسىن قامتاماسىز ەتۋ، بىلىكتى مامانداردى دايارلاۋ، ۇلتتىق اتتەستاسيا جۇيەلەرىن دامىتۋ ماسەلەلەرىن قارادى. سونداي-اق كەڭەس مۇشەلەرى ءبىلىم سالاسى قىزمەتكەرلەرىن «تاۋەلسىز مەملەكەتتەر دوستاستىعىنىڭ ءبىلىم بەرۋ ءىسىنىڭ ۇزدىگى» توسبەلگىسىمەن ماراپاتتاۋ تۋرالى شەشىم قابىلدادى.
«ەرتەڭ تمد-عا مۇشە مەملەكەتتەر مۇعالىمدەرى مەن ءبىلىم بەرۋ سالاسى قىزمەتكەرلەرىنىڭ VII سەزى وتەدى. تمد ەلدەرىنىڭ ۇزدىك پەداگوگتەرىنىڭ شەبەرلىك ساباقتارى وتەدى. سونداي-اق تاجىريبە الماسۋ الاڭدارى ۇيىمداستىرىلادى. سەزدە تمد ەلدەرىندەگى ءبىلىم سالاسىنىڭ دامۋ بولاشاعىن، قانداي وزگەرىستەر مەن جاڭالىقتار ەنگىزىلىپ جاتقانىن تالقىلاپ، قارار قابىلدايمىز. سەزدى تاجىريبە الماسۋ الاڭى رەتىندە قاراستىرۋ كەرەك. ارىپتەستەرىمىزبەن ءبىلىم سالاسىنداعى ىنتىماقتاستىقتى ودان ءارى قالاي دامىتاتىنىمىزدى تالقىلايمىز»، - دەدى وقۋ-اعارتۋ ءمينيسترى اسحات ايماعامبەتوۆ.
پەداگوگتەر سەزى تمد ەلدەرى ءبىلىم مينيسترلەرى كونفەرەنسياسىنىڭ شەشىمىمەن ەكى جىلدا ءبىر رەت وتكىزىلەدى. سەزد اياسىندا ءىى پەداگوگيكالىق شەبەرلىك فەستيۆالىنىڭ قورىتىندى كەزەڭى ءوتىپ، بايقاۋدىڭ فيناليستەرى، ياعني تمد ەلدەرىنىڭ مۇعالىمدەرى ەلىمىزگە كەلەدى. ولار سايىس ساباقتارىن كورسەتەدى. مۇعالىمدەرگە ارنالعان شەبەرلىك ساباقتارى ءۇش نوميناسيا بويىنشا وتەدى: ءمۇعالىم، تاربيەشى جانە پسيحولوگ/الەۋمەتتىك پەداگوگ.
«ق ر وقۋ-اعارتۋ مينيسترلىگى فەستيۆالدى وسىمەن ەكىنشى رەت قاتارىنان ۇيىمداستىرىپ وتىر. سىرتتاي وتكەن كەزەڭنىڭ قورىتىندىسى ۇيىمداستىرۋ كوميتەتى مەن قازىلار القاسىنىڭ بىرلەسكەن وتىرىسىندا بەلگىلى بولدى. فەستيۆالدىڭ ءداستۇرلى فورماتتاعى كەزەڭى ەرتەڭ باستالادى. 50 ۇمىتكەردىڭ اراسىنان ىرىكتەلىپ الىنعان ۇزدىك 35 ءمۇعالىمنىڭ شەبەرلىك ساباقتارى ەرتەڭ وتەدى. تمد-عا مۇشە ەلدەردىڭ ءبىلىم جانە عىلىم مينيسترلىكتەرىنىڭ ۇسىنىستارى نەگىزىندە عىلىمي زەرتتەۋلەر باعدارلامالارىنىڭ جوبالارىن ازىرلەۋ، تمد-عا مۇشە مەملەكەتتەردىڭ عىلىمي جانە عىلىمي-پەداگوگيكالىق كادرلارىن اتتەستاتتاۋدىڭ ۇلتتىق جۇيەلەرىن دامىتۋ جونىندەگى جۇمىس توبى قۇرىلدى. سونداي-اق تمد-عا مۇشە ەلدەردىڭ عىلىمي دارەجەلەرى تۋرالى قۇجاتتاردى ءوزارا تانۋ تۋرالى كەلىسىم جاسالدى»، - دەدى ى.التىنسارين اتىنداعى ۇلتتىق ءبىلىم اكادەمياسىنىڭ پرەزيدەنتى ءمادينا تىنىبايەۆا.
سەزدە مەكتەپكە دەيىنگى جانە ورتا ءبىلىم بەرۋ سالاسىنداعى سيفرلىق جانە باسپا ونىمدەرىنىڭ كورمەسى ۇيىمداستىرىلادى. قازاقستاندىق كاسىپكەرلەر، ستارتاپتار وقۋ ۇدەرىسىن ءتيىمدى ۇيىمداستىرۋعا باعىتتالعان IT-جوبالارىن تانىستىرادى.
سەزد تاۋەلسىز مەملەكەتتەر دوستاستىعىنا مۇشە مەملەكەتتەردىڭ گۋمانيتارلىق ىنتىماقتاستىعىنىڭ مەملەكەتارالىق قورى قولداۋىمەن وتەدى.