49 945 ادام ۇيلەرىنە ورالدى.
توتەنشە جاعدايلار مينيسترلىگى قازاقستانداعى سۋ تاسقىنى جاعدايى تۋرالى جەدەل اقپارات بەردى، - دەپ حابارلايدى Almaty-akshamy.kz
ۆەدومستۆونىڭ وكىلى اسقار ءشارىپتىڭ ايتۋىنشا، اتىراۋ وبلىسىنىڭ قۇلسارىدا سۋ باسقان 20 ۇيدەن موتوپومپالار مەن قۋاتتى جىلجىمالى سورعى ستانسيالارى ارقىلى تاۋلىك بويى سۋ سورۋ جالعاسىپ جاتىر. توتەنشە جاعدايلار مينيسترلىگىنە قاراستى 20982 اسكەري ءبولىمىنىڭ اسكەري قىزمەتكەرلەرى قۇلسارى قالاسىندا دەزينفەكسيالاۋ جۇمىستارىن جۇرگىزىپ جاتىر.
سولتۇستىك قازاقستان وبلىسىنىڭ پەتروپاۆل مەن قىزىلجار اۋدانىندا 24 ساعات ىشىندە 184 ۇيدەن سۋ بۇرىلىپ، سورىلدى.
"اقتوبە وبلىسى ىرعىز اۋدانى كۇيلىس اۋىلىندا تورعاي وزەنىندەگى سۋ دەڭگەيىنىڭ بىرتىندەپ ارتۋىنا بايلانىستى ۇزىندىعى 2،5 شاقىرىم بوگەت سالۋ جۇمىستارى جۇرگىزىلىپ جاتىر. 30 مىڭنان استام قاپشىق پەن 19 مىڭ ينەرتتى ماتەريال توسەلدى. سۋ دەڭگەيىنە ساعات سايىن مونيتورينگ جۇرگىزىلەدى. جاعداي ەرەكشە باقىلاۋدا"، - دەدى اسقار ءشارىپ وكق بريفينگىندە.
رەسپۋبليكا بويىنشا بارلىعى 8 958 تۇرعىن ءۇي مەن 2 994 اۋلا اۋماقتارىنان سۋ بۇرىلىپ، سورىلدى.