قازاقستاننىڭ قۇتقارۋ قىزمەتتەرى جۇيەسىن جاڭعىرتۋ اياسىندا اقمولا وبلىسىنىڭ ماكينسك قالاسىندا ءورت سوندىرۋشىلەر مەن مەديسينالىق پەرسونالدىڭ فۋنكسيالارىن بىرىكتىرەتىن جاڭا مامانداندىرىلعان بولىمشە اشىلدى، دەپ حابارلايدى aqshamnews.kz.
بۇل قادام قۇتقارۋ قىزمەتتەرىنىڭ ءوزارا ءىس-قيمىلىن جاقسارتۋعا جانە توتەنشە جاعدايلارعا دەن قويۋدىڭ جەدەلدىگىن ارتتىرۋعا باعىتتالعان پيلوتتىق جوبانىڭ ماڭىزدى ەلەمەنتى بولدى.
قازاقستان رەسپۋبليكاسىنىڭ توتەنشە جاعدايلار ءمينيسترى گەنەرال-مايور شىڭعىس ءارىنوۆ ماكينسكتەگى جاڭارتىلعان №8 ءورت ءسوندىرۋ بولىمىنە جەكە ءوزى بارىپ، كۇردەلى جوندەۋ جانە جاڭعىرتۋ ناتيجەلەرىمەن تانىستى. 1964 جىلى سالىنعان ءورت ءسوندىرۋ ءبولىمى رەكوردتىق مەرزىمدە، ياعني وتكەن جىلدىڭ قازان ايىنان باستاپ بىرنەشە اي ىشىندە تولىعىمەن جاڭارتىلدى. بۇگىندە ول ءوڭىردىڭ قاۋىپسىزدىگىن قامتاماسىز ەتۋدەگى زاماناۋي ءتاسىلدىڭ ۇلگىسى بولىپ تابىلادى.
«ءورت ءسوندىرۋ بولىمدەرىن جاڭعىرتۋ جانە قۇتقارۋ جۇمىستارىن جۇرگىزىپ قانا قويماي، مەديسينالىق كومەك كورسەتە الاتىن بىرەگەي بولىمشەلەر قۇرۋ — ازاماتتارىمىزدىڭ قاۋىپسىزدىگىن نىعايتۋداعى ماڭىزدى قادام. ماكينسكتەگى بۇل جوبا تەك باستاماسى. ءبىز بۇكىل ەل بويىنشا قۇتقارۋ بولىمشەلەرىن دامىتۋدى جانە جاڭعىرتۋدى جالعاستىرامىز»، - دەپ مينيستر شىڭعىس ءارىنوۆ اتاپ ءوتتى.
جاڭا بولىمشەنىڭ باستى ەرەكشەلىكتەرىنىڭ ءبىرى ءورت سوندىرۋشىلەر مەن دارىگەرلەردىڭ فۋنكسيالارىن بىرىكتىرۋ بولىپ تابىلادى، بۇل توتەنشە جاعدايلارعا دەن قويۋدىڭ جەدەلدىگى مەن تيىمدىلىگىن ايتارلىقتاي ارتتىرادى. جاڭعىرتۋ شەڭبەرىندە قۇتقارۋشىلاردىڭ ەڭبەك جاعدايلارى دا جاقساردى: عيمارات جاڭارتىلدى، دۋش بولمەسى، اس ءۇي، جۋىناتىن بولمەلەر مەن دەمالىس بولمەلەرىن قوسا العاندا، قىزمەتتىك جانە تۇرمىستىق ءۇي-جايلار زاماناۋي تۇردە جايلاستىرىلدى. بۇعان قوسا، تەحنيكاعا ارنالعان بوكس پەن «BATYR TEAM» ۆەدومستۆولىق كلۋبىنىڭ جاتتىعۋ زالى جابدىقتالدى.
«استانا-كوكشەتاۋ» اۆتوجولىندا ورنالاسقان تراسسالىق مەديسينالىق-قۇتقارۋ پۋنكتىنىڭ جاڭادان قۇرىلعان مەديسينالىق كابينەتكە كوشۋى جاڭعىرتۋدىڭ تاعى ءبىر ماڭىزدى بولىگى بولدى. مەديسينالىق بلوكتىڭ زاماناۋي جابدىقتارى شۇعىل كومەكتىڭ ساپاسىن ارتتىرۋعا جانە مەديسينالىق پەرسونالدىڭ جۇمىس ىستەۋى ءۇشىن قولايلى جاعداي جاساۋعا مۇمكىندىك بەرەدى.
جاڭعىرتۋ شەڭبەرىندە جاڭا بولىمشەنىڭ بارلىق جەكە قۇرامى جاڭا نىساندى كيىم-كەشەكپەن جانە ارنايى تەحنيكامەن قامتاماسىز ەتىلدى. ءىس-شارا بارىسىندا شىڭعىس ءارىنوۆ قۇتقارۋ بولىمشەلەرىنىڭ فورمۋليارىندا ەستەلىك جازبا قالدىردى.
«بۇل قادام ءبىرىڭعاي قۇتقارۋ جانە دەنساۋلىق ساقتاۋ جۇيەسىن قۇرۋدىڭ ماڭىزدى ەلەمەنتى بولىپ تابىلادى. ءبىز بۇل پيلوتتىق جوبانىڭ تابىسى توتەنشە جاعدايلارعا جىلدامىراق دەن قويۋ جانە زارداپ شەككەندەرگە كومەك كورسەتۋدى جاقسارتۋ ءۇشىن جاڭا مۇمكىندىكتەر اشاتىنىنا سەنىمدىمىز»، - دەپ شىڭعىس ءارىنوۆ اتاپ ءوتتى.
جاڭا بولىمشە 30 مىڭنان استام ادام تۇراتىن بىرنەشە جاقىن ەلدى مەكەندەردەگى قاۋىپسىزدىكتى قامتاماسىز ەتەدى. قۇتقارۋشىلار دا اۆتوجول ۋچاسكەلەرىنە بارىپ، اپاتتاردىڭ سالدارىن جوياتىن بولادى.
ءىس-شارا سوڭىندا مينيستر ۆەدومستۆولىق ناگرادالار ۇسىندى. اقمولا وبلىسى تجد باستىعىنىڭ مىندەتىن ۋاقىتشا اتقارۋشى باقىتجان الاشوۆ «ازاماتتىق قورعاۋ جۇيەسىن دامىتۋعا قوسقان ۇلەسى ءۇشىن» توسبەلگىسىمەن ناگرادتالدى. «قازاقستاندىق قۇتقارۋشىلار قورى» جق باسشىسى راشيد دجانۇزاقوۆ قۇرمەت گراموتاسىن الدى، ال 8ء-موسب جۇرگىزۋشىلەرى ەرلان ارىنعازين مەن سەرگەي پوپوۆ جوعارى كاسىبيلىگى ءۇشىن العىس حاتتار الدى.
توتەنشە جاعدايلار مينيسترلىگى وزىق تەحنولوگيالارمەن جابدىقتالعان جاڭا زاماناۋي بولىمشەلەردى قۇرا وتىرىپ، ماتەريالدىق-تەحنيكالىق بازانى بەلسەندى دامىتۋدى جانە قۇتقارۋشىلاردىڭ ەڭبەك جاعدايلارىن جەتىلدىرۋدى جالعاستىرۋدا. بۇل توتەنشە جاعدايلارعا دەن قويۋدىڭ جەدەلدىگىن ارتتىرۋعا جانە بۇكىل ەل بويىنشا قۇتقارۋ وپەراسيالارىنىڭ ساپاسىن جاقسارتۋعا مۇمكىندىك بەرەدى.