توتەنشە جاعدايلار مينيسترلىگىندە تج ۆيسە-مينيسترى باۋىرجان سىزدىقوۆتىڭ توراعالىعىمەن توتەنشە جاعدايلاردىڭ الدىن الۋ جانە ولاردى جويۋ جونىندەگى ۆەدومستۆوارالىق مەملەكەتتىك كوميسسيانىڭ وتىرىسى ءوتتى.
ۆامك وتىرىسىندا ءورت ءقاۋىپتى كەزەڭگە دايىندىق، كوشكىن ءقاۋپى بار وڭىرلەردىڭ تاۋ بوكتەرىندەگى اۋداندارىندا سالىنعان قۇرىلىستار جانە مەملەكەتتىك ورگانداردىڭ شومىلۋ ماۋسىمىنا دايىندىعى ماسەلەلەرى قارالدى، دەپ حابارلايدى Almaty-akshamy.kz.
وتىرىس بەينەسەلەكتورلىق رەجيمدە ءوتتى. وعان ورتالىق مەملەكەتتىك ورگانداردىڭ باسشىلارى، وبلىستار، استانا، الماتى جانە شىمكەنت قالالارى اكىمدەرىنىڭ ورىنباسارلارى، تجد باستىقتارى قاتىستى.
جەتەكشىلىك ەتەتىن باعىتتار بويىنشا جۇمىس تۋرالى ەكولوگيا جانە تابيعي رەسۋرستار، وقۋ-اعارتۋ ۆيسە-مينيسترلەرى جانە تجم لاۋازىمدى ماماندارى ءسوز سويلەدى. ولار جوعارىدا اتالعان توتەنشە جاعدايلاردىڭ الدىن الۋ بويىنشا قابىلدانىپ جاتقان شارالار تۋرالى باياندادى.
وتىرىس قورىتىندىسى بويىنشا ۆيسە-مينيستر مۇددەلى مەملەكەتتىك ورگاندارعا حالىقتىڭ قاۋىپسىزدىگىن قامتاماسىز ەتۋ بويىنشا بارلىق الدىن الا شارالاردى قابىلداۋدى تاپسىردى.
كوميسسيا وتىرىسىنىڭ سوڭىندا حاتتامالىق شەشىم قابىلداندى.