قازاقستاننىڭ التى قالاسىندا قوعامدىق كولىكتە جىنىستىق ازعىندىققا قارسى ءىس-قيمىل بويىنشا اكسيا باستالدى.
اۆتوبۋس سالوندارىندا قوعامدىق كولىكتە جىنىستىق ازعىندىققا تاپ بولعاندار ءۇشىن ءىس-قيمىل الگوريتمى بار پلاكاتتار ورنالاستىرىلدى، دەپ حابارلايدى Almaty-akshamy.kz.
«تيىسپە» اكسياسىنىڭ ماقساتى – بۇل قوعامدىق كولىكتەگى حاراسسمەنتكە قارسى تۇرۋ جانە قوعامدا بۇل قۇبىلىسقا جەككورىنۋشىلىكتى قالىپتاستىرۋ. پلاكاتتار الماتى، شىمكەنت، اتىراۋ، پاۆلودار، وسكەمەن جانە سەمەي قالالارىندا 300-دەن استام اۆتوبۋسقا جابىستىرىلعان.
قازاق جانە ورىس تىلدەرىندەگى پلاكاتتاردا قوعامدىق كولىكتە حاراسسمەنتپەن بەتپە-بەت كەلگەندەرگە ارنالعان نۇسقاۋلىق بەرىلگەن. جىنىستىق حاراسسمەنت قۇرباندارى پوستەردەگى QR ارقىلى ءوز وقيعاسىمەن ءانونيمدى تۇردە بولىسە الادى.
«بۇل اكسيا – ءماجبۇرلى شارا. شىمكەنتتە № 52 مارشرۋتتا جولاۋشىلاردىڭ ءبىرى قىزدارعا قاراپ، ءوزىن-وزى قاناعاتتاندىرعان جاعدايلار بولدى. مۇنداي جاعدايدا قىزدار نە ىستەرىن بىلمەي قالادى. سوندىقتان قوعامدىق كولىكتە حارراسمەنت كەزىندە قالاي ارەكەت ەتۋ كەرەگىن تۇسىندىرەتىن پلاكاتتاردىڭ بولعانىن قالايمىز»، – دەدى «Shymkent bus»ج ش س اۆتوپارك ديرەكتورىنىڭ ورىنباسارى ءالفارابي ءابدىراش.
اكسيانى استاناداعى ەقىۇ باعدارلامالار كەڭسەسى مەن كانادالىق جەرگىلىكتى باستامالار قورىنىڭ (Cfli) قولداۋىمەن MediaNet حالىقارالىق جۋرناليستيكا ورتالىعى ۇيىمداستىردى.
ورتالىق جۇرگىزگەن زەرتتەۋ قورىتىندىسى بويىنشا قازاقستانداعى ايەلدەردىڭ 21%-ى قوعامدىق ورىنداردا حاراسسمەنتكە تاپ بولعان. الايدا، ساراپشىلاردىڭ ايتۋىنشا، شىن مانىندە ستاتيستيكا بۇدان دا جوعارى. ءارتۇرلى سەبەپتەرمەن جىنىستىق حاراسسمەنت قۇرباندارى بۇل تۋرالى ايتپاي، جاسىرىپ قالادى.
ۇيىمنىڭ نەگىزىن قالاۋشى يگور براتسيەۆ بارلىق وبلىس ورتالىقتارى مەن رەسپۋبليكالىق ماڭىزى بار قالالاردى اكسيامەن قامتۋدى جوسپارلاپ وتىر.
«العاشقى باعىت – استانا مەن الماتى. ءبىراق استانا باس تارتتى. بۇل ءبىرتۇرلى كورىندى، ويتكەنى مۇنىمەن كۇرەسۋ اكىمدىككە دە ءتيىمدى. اۆتوبۋستار مەن ايالدامالارعا پلاكاتتاردى ءوزىمىز باسىپ شىعارامىز»، – دەدى براتسيەۆ.
City Transportation Systems حاراسسمەنت ماسەلەسىنىڭ وزەكتىلىگىن ايتتى. ەگەر ۇيىمداستىرۋشىلار پوستەرلەردى ورنالاستىرۋ تۋرالى ۇسىنىسپەن جۇگىنسە، اكسيا ەلوردالىق اۆتوبۋستاردا دا ىسكە قوسىلادى.
«الدىمەن اكسيا ونلاين رەجيمىندە باستالدى، سودان كەيىن وفلاين رەجيمگە كوشتى. قوعامدىق كولىكتەر مەن ايالدامالاردا پلاكاتتار ورنالاستىرىلدى. بۇل يدەيا قۇرباندارعا عانا ەمەس، ەڭ الدىمەن قاسكويلەرگە باعىتتالعان. ولار بۇل ارەكەتى ءۇشىن جازاسىز قالمايتىنىن ءتۇسىنۋ كەرەك»، – دەپ تۇيىندەدى يگور براتسيەۆ.