جىرتىق شۇلىق - ساندە!
ناسكيىڭىزدىڭ باسى تەسىلە بەرەتىن جەمىر بولساڭىز، تۇك ساسپاڭىز دا، قىسىلماڭىز دا. سەبەبى ەندى جىرتىق شۇلعاۋمەن ءجۇرۋ سانگە اينالدى دەسە دە بولادى.
تىزەسى جىرتىلعان دجينسى، ءتىلىم-تىلىم بولعان كۇرتەشەلەر مەن جاماۋ-جاماۋ كيىمدەر. مۇنداي كيىمدەر كيىپ جۇرگەن ادامداردى كورىپ، تاڭ قالمايتىن بولدىق ءقازىر. ەندى بۇل ءتىزىمدى جىرتىق شۇلىقپەن ءجۇرۋ تولىقتىرماق.
جىرتىق ناسكيىڭىز بولسا، ونى قوقىسقا لاقتىرۋعا اسىقپاڭىز. بۇل ماسەلەنىڭ شەشىمىن ديزاينەرلەر تاۋىپ تا قويدى. جاپوندىق ديزاينەر تاكايۋكي فۋكۋدزاۆا جىرتىعى جيناقى ەتىپ تىگىلگەن تەسىك ناسكي شىعارۋدى قولعا العان.
ۇزاق ۋاقىت بويى ناسكيى جىرتىلا بەرگەن ديزاينەرگە وسى ماسەلەدەن ءساندى دۇنيە جاساپ شىعارۋ ويى كەلگەن. ونىڭ ايتۋىنا قاراعاندا، بۇكىل الەمدەگى سياقتى جاپونيادا دا جىرتىق شۇلعاۋمەن ءجۇرۋ ۇيات بولىپ سانالادى.
«اياق كيىمىمدى شەشەردە قاتتى ۇيالاتىنمىن. ءبۇتىن ناسكيلەردى باسىنداعى ءبىر تەسىك ءۇشىن تاستاۋعا تۋرا كەلەتىن. سونىڭ ناتيجەسىندە ماعان جىرتىعى بار شۇلعاۋ جاساۋ دەگەن وي كەلىپ، ءبىز قاراپايىم عانا زات جاساپ شىعاردىق. بۇل ءبىر جاعىنان ادەمى ءارى ءساندى كورىنەدى. ونىڭ ۇستىنە، زيانسىز، سول سەبەپتى دە ءبىزدىڭ ەلدە جاقسى تانىلىپ ۇلگەردى»، - دەيدى ديزاينەر.
"ەستىمەگەن ەلدە كوپ" دەمەكشى، الداعى ۋاقىتتا دۇكەن سورەلەرىنەن تەسىك ناسكي كورسەڭىز، تاڭ قالماڭىز! سەبەبى، جىرتىق ناسكي - ساندە.