تەننيستەن ديەۆيس كۋبوگىندا قازاقستان قۇراماسى ەكىنشى ماچىن وتكىزەدى

قازاقستاندىقتار بۇعان دەيىن ديەۆيس كۋبوگىندا اقش كومانداسىمەن ويناپ كورگەن جوق

قازاقستان قۇراماسى 15 قىركۇيەك كۇنى شوتلانديانىڭ گلازگو قالاسىندا ديەۆيس كۋبوگىنىڭ توپتىق باسەكەسىندە اقش كومانداسىمەن كۇش سىناسادى، دەپ حابارلايدى Almaty-akshamy.kz قازاقپاراتقا سىلتەمە جاساپ.

قازاقستان تەننيس فەدەراسياسىنان ءمالىم ەتكەنىندەي، بۇل – قازاقستاندىقتاردىڭ D توبىنداعى ەكىنشى ماچى.

اقش قۇراماسى ۇلىبريتانيامەن بىرگە ديەۆيس كۋبوگى ويناتىلا باستاعان 1900 جىلدان بەرى قاتىسىپ كەلەدى. جارىستىڭ ءوزى اقش-تىڭ العاشقى قۇراماسىنىڭ ويىنشىسى دۋايت ديەۆيستىڭ ەسىمىمەن اتالادى. امەريكالىقتار ديەۆيس كۋبوگىن 32 مارتە جەڭىپ العان. ولار ەكىنشى ورىنداعى اۋستراليالىقتاردان (28) وق بويى وزىق تۇر.

قازاقستاندىقتار بۇعان دەيىن ديەۆيس كۋبوگىندا اقش كومانداسىمەن ويناپ كورگەن جوق. اتر دودالارىندا الەكساندر بۋبليك امەريكالىق تەيلور فريتسپەن ءتورت رەت ويناپ، سونىڭ ۇشەۋىندە باسىم ءتۇستى. توممي پولمەن دە ءتورت رەت كەزدەسىپ، تەك بىرەۋىندە عانا بۋبليك جەڭگەن. دجەك سوكپەن ەسەپ تەڭ – 1:1.

ميحايل كۋكۋشكين فريتسپەن ءۇش باسەكەسىندە دە قارسىلاسىنا جول بەرگەن. سول سەكىلدى ت.پول دا ەكى رەت كۋكۋشكيننەن ايلاسىن اسىرىپ كەتكەن.

ءبىرىنشى ماچتا قازاقستاننىڭ نيدەرلاند كومانداسىنان جەڭىلىپ قالعانى بەلگىلى. سوندىقتان بۇگىنگى جانە 18 قىركۇيەك كۇنى ۇلىبريتانيامەن وتەتىن ماچتا تەك جەڭىس كەرەك. سوندا عانا شيرەك فينالعا وتە الادى.

قازاقستان – اقش ماچى ەلوردا ۋاقىتىمەن ساعات 21:00-دە باستالادى.