يتاليا قۇراماسىن تىزە بۇكتىردى
قازاقستان جاسوسپىرىمدەر قۇراماسى پروستەيەۆ قالاسىندا (چەحيا) 14 جاسقا دەيىنگىلەر اراسىندا ءوتىپ جاتقان كوماندالىق الەم چەمپيوناتىنىڭ (2022 ITF World Junior Tennis Finals) شيرەك فينالىنا شىقتى، دەپ حابارلايدى Almaty-akshamy.kz.
قازاقستان تەننيس فەدەراسياسىنان ءمالىم ەتكەنىندەي، جارىستىڭ ءۇشىنشى كۇنى قازاقستاندىق جاسوسپىرىمدەر ايدى اسپانعا شىعارىپ، الەم چەمپيونى – يتاليا قۇراماسىن تىزە بۇكتىردى. كورتقا كەشە ارگەنتينا قۇراماسىمەن ءساتتى ويناعان دانيەل تازابەكوۆ العاشقى بولىپ شىعىپ، سالۆاتورە تارتالونەمەن شەبەرلىك بايقاستى. ءبىرىنشى پارتيادا دانيەل قارسىلاسىنا بىردە-بىر گەيم بەرگەن جوق – 6:0. ەكىنشى سەتتە بەسىنشى گەيمدە برەيك جاساپ، سول باسىمدىلىعىنان ايرىلمادى – 6:3. زاڭعار نۇرلان ۇلى مەن انتونيو ماريليانو اسا تارتىستى باسەكە وتكىزدى. ءبىرىنشى پارتيادا يتاليالىق سپورتشى باسىمدىلىق تانىتتى – 6:4. ەكىنشىسىندە دە ول 3:1 ەسەبىمەن العا كەتتى. دەگەنمەن، زاڭعار تارازى باسىن تەڭەستىرىپ قانا قويماي، سەتتى ءوز پايداسىنا جازدى – 6:4. ءۇشىنشى، شەشۋشى پارتيادا سەگىزىنشى گەيمدە قازاقستاندىق تەننيسشى برەيك جاساي الدى – 5:3. سودان كەيىن ءوزى دوپ بەرگەندە، نۇكتە قويا ءبىلدى – 6:3. وسىلايشا، الەم چەمپيوندارىن ۇتقان قازاقستان جاسوسپىرىمدەر قۇراماسى ءوز تاريحىندا العاش رەت دۇنيەجۇزىلىك دودانىڭ شيرەك فينالىنا شىعىپ، ۇزدىك سەگىز كوماندانىڭ قاتارىنا ەندى. ەسكە سالا كەتەيىك، بۇدان بۇرىن تەننيستەن الەم چەمپيوناتىندا قازاقستاندىق جاسوسپىرىمدەردىڭ ارگەنتينا قۇراماسىن ۇتقانىن جازعان بولاتىنبىز.