قازاقستاندىق تەننيسشى زاڭعار نۇرلان ۇلى Australian Open-2026 تۋرنيرىندەگى ءساتتى ونەر كورسەتۋىنىڭ ناتيجەسىندە ITF Juniors الەمدىك رەيتينگىندەگى ورنىن جاقسارتتى، - دەپ حابارلايدى Aqshamnews.kz.
17 جاستاعى سپورتشى جاسوسپىرىمدەر اراسىندا اۋستراليانىڭ اشىق بىرىنشىلىگىنىڭ جەكەلەي سىنىندا جارتىلاي فينالىنا دەيىن جەتكەن قازاقستان تاريحىنداعى العاشقى تەننيسشى اتاندى. وسى جەتىستىگىنىڭ ارقاسىندا جاڭارتىلعان رەيتينگتە ول 12-ورىننان 9-ورىنعا كوتەرىلدى.
وتكەن جىلدىڭ كۇزىندە قازاقستاندىق تەننيسشى US Open Juniors ءتۋرنيرىنىڭ دە جارتىلاي فينالىنا دەيىن جەتكەن بولاتىن. بۇعان دەيىن ەلىمىزدىڭ بىردە-بىر ويىنشىسى جاسوسپىرىمدەر اراسىندا «ۇلكەن دۋلىعا» سەرياسىنداعى تۋرنيرلەردە ەكى مارتە جارتىلاي فينالعا شىقپاعان.
ايتا كەتەيىك، قازىرگى تاڭدا WTA، ATP جانە ITF Juniors الەمدىك رەيتينگتەرىنىڭ العاشقى وندىعىندا ءبىر مەزگىلدە قازاقستاننىڭ ءۇش وكىلى بار. Australian Open جەڭىمپازى ەلەنا رىباكينا WTA رەيتينگىندە ءۇشىنشى ورىندا تۇرسا، الەكساندر بۋبليك ATP رەيتينگىندە ونىنشى ساتىدا ورنالاسقان. ال زاڭعار نۇرلان ۇلى ITF Juniors رەيتينگىندە توعىزىنشى ورىندى يەلەنىپ وتىر. سونداي-اق Australian Open-2026 ءتۋرنيرىنىڭ جۇپتىق سىنداعى ءفيناليسى اننا دانيلينا الەمدىك رەيتينگتىڭ 11-ورنىندا تۇر.