الماتى قالاسىندا مەكتەپ جاسىنا دەيىنگى بالالارعا ارنالعان «مەنىڭ جاسىل بالاباقشام» اتتى ەكولوگيالىق چەللەندجى باستالدى.
بۇل باستاما بالالاردىڭ ەكولوگيالىق مادەنيەتىن دامىتىپ، سيفرلىق داعدىلاردى يگەرۋگە كومەكتەسەدى، - دەپ حابارلايدى Aqshamnews.kz.
الماتىدا مەكتەپ جاسىنا دەيىنگى بالالاردىڭ ەكولوگيالىق مادەنيەتىن ارتتىرۋعا، قورشاعان ورتاعا جاۋاپكەرشىلىكپەن قاراۋدى قالىپتاستىرۋعا جانە سيفرلىق شىعارماشىلىق داعدىلارىن دامىتۋعا باعىتتالعان «مەنىڭ جاسىل بالاباقشام» اتتى جالپىقالالىق ەكولوگيالىق چەللەندجى باستالدى.
بۇل باستاماعا الماتى قالاسىنداعى 30 مەكتەپكە دەيىنگى ۇيىمنىڭ ەرەسەك جانە مەكتەپالدى توپتارىنىڭ تاربيەلەنۋشىلەرى، ولاردىڭ اتا-انالارى مەن پەداگوگتەرى قاتىسۋدا.
جاس ەكولوگتاردىڭ جۇمىستارىن الماتى قالاسى، الاتاۋ اۋدانىنداعى №84 بالاباقشاسىندا كورۋگە بولادى.
«كەرەمەت كورىنىس: بالالار پلاستيكالىق بوتەلكەلەر مەن ەسكى قوراپتاردان ديداكتيكالىق ويىندار مەن مۋزىكالىق اسپاپتار جاساپ، ولارعا جاڭا ماعىنا بەرۋ جولدارىن كورسەتتى»، – دەپ بەلگىلەدى الماتى قالاسى ءبىلىم باسقارماسىنىڭ باسشىسىنىڭ ورىنباسارى بيبىگۇل مالعاجداروۆا.
ونىڭ ايتۋىنشا، بۇگىنگى تاڭدا ەكو-ترەند وسەكتى ۇرپاقتى دامىتۋداعى ەڭ وزەكتى تاقىرىپتاردىڭ ءبىرى بولىپ تابىلادى. قالدىقتاردى سۇرىپتاۋ مەن قايتا پايدالانۋ بالالارعا قورشاعان الەمدى جاڭا كوزقاراسپەن قاراۋعا مۇمكىندىك بەرەدى.
چەللەندجدىڭ نەگىزگى ماقساتى: بالالاردىڭ ەكولوگيالىق مادەنيەتىن تاربيەلەۋ، تابيعاتتاعى قاراپايىم ءوزارا بايلانىستاردى تۇسىنۋگە باۋلۋ جانە قورشاعان ورتاداعى تابيعي نىساندارمەن ادامگەرشىلىك-ەموسيونالدى قارىم-قاتىناس جاساۋدىڭ العاشقى پراكتيكالىق داعدىلارىن قالىپتاستىرۋ.
شارا اياسىندا بالالاردىڭ نازارىن قورشاعان ورتانى قورعاۋ جانە تابيعي رەسۋرستاردى ساقتاۋ ماسەلەلەرىنە اۋدارۋ، ولاردىڭ كرەاتيۆتى جانە سيفرلىق داعدىلارىن دامىتۋ، سونداي-اق ەكولوگيالىق جاۋاپتى مىنەز-قۇلىقتى ناسيحاتتاۋ مىندەتتەرى ىسكە اسىرىلماق.
چەللەندج بارىسىندا بالالار پياز بەن ءتۇرلى تۇقىمداردى ەگەدى، بولمە وسىمدىكتەرىن كۇتىپ-باپتايدى، قاعازدان پۋلپا الۋ جانە قامىستان سەلليۋلوزا نەمەسە تالشىقتار الۋ تەحنولوگياسىن زەرتتەيدى، تۇرمىستىق قالدىقتارعا (پلاستيك، بوتەلكە قاقپاقتارى، كارتون جانە ت.ب.) «ەكىنشى ءومىر» سىيلاۋدى ۇيرەنەدى، سۋمەن تاجىريبەلەر جۇرگىزىپ، سۋ جانە ەنەرگيا ۇنەمدەۋ تەحنولوگيالارىن مەڭگەرەدى.
اتالعان چەللەندجدى وتكىزۋ بالالاردىڭ ەكولوگيالىق ساناسىن ارتتىرۋعا ىقپال ەتەدى. بالالار ەكولوگيالىق، شىعارماشىلىق داعدىلاردى يگەرىپ، تابيعاتقا دەگەن قامقورلىق قارىم-قاتىناستى قالىپتاستىرادى، سونىمەن قاتار قيالدارى مەن كرەاتيۆتى ويلاۋ قابىلەتتەرى داميدى.