"قازمۇنايگاز" بيىلعى 9 ايداعى وندىرىستىك ناتيجەلەرىن جاريالادى.
كومپانيا مالىمەتىنشە، مۇنايدى ماگيسترال جانە تەڭىز ارقىلى تاسىمالداۋدىڭ جالپى كولەمى 2022 جىلدىڭ توعىز ايىندا 2021 جىلدىڭ ءتيىستى كەزەڭىمەن سالىستىرعاندا 1،2%-عا، ياعني 55 085 مىڭ تونناعا دەيىن تومەندەدى، دەپ جازادى Almaty-akshamy.kz Inbusiness.kz cىلتەمە جاساپ.
"2021 جىلدىڭ توعىز ايىمەن سالىستىرعانداعى 2022 جىلدىڭ توعىز ايىنداعى نەگىزگى وندىرىستىك كورسەتكىشتەر:
- مۇناي جانە گاز كوندەنساتىن ءوندىرۋ كولەمى 0،9%-عا ءوسىپ، 16 060 مىڭ تونناعا جەتتى؛
- مۇناي تاسىمالداۋ كولەمى وتكەن جىلدىڭ ءتيىستى كەزەڭىندەگى 55 727 مىڭ توننامەن سالىستىرعاندا 55 085 مىڭ تونناعا جەتتى؛
- قازاقستاندىق جانە رۋمىندىق مۇناي وڭدەۋ زاۋىتىندا كومىرسۋتەك شيكىزاتىن وڭدەۋ كولەمى 5،8%-عا ارتىپ، 14 896 مىڭ تونناعا جەتتى.
ىلەسپە جانە تابيعي گازدى ءوندىرۋ كولەمى 1،4%-عا، ياعني 5 942 ملن م3 دەيىن ۇلعايدى"، - دەلىنگەن كومپانيا تاراتقان اقپاراتتا.
«قازمۇنايگاز» اقپاراتىنا سايكەس، «تەڭىز» كەن ورنىندا مۇناي ءوندىرۋ ايتارلىقتاي 13،6%-عا ءوسىپ، 4 302 مىڭ توننا (تاۋلىگىنە 126 مىڭ باررەل) بولدى. ىلەسپە گاز ءوندىرۋ دە 18،8%-عا ارتىپ، 2 394 ملن م3 جەتتى. ءوندىرىستىڭ ۇلعايۋى وپەك+ كەلىسىمى بويىنشا شەكتەۋلەردىڭ الىنىپ تاستالۋىنا بايلانىستى بولدى.
«قاشاعان» كەن ورنىندا مۇناي ءوندىرۋ 734 مىڭ تونناعا دەيىن تومەندەدى (تاۋلىگىنە 21 مىڭ بارر.). بۇعان بيىل تامىز ايىندا گازدىڭ اعۋىنا بايلانىستى جۇرگىزىلگەن جوندەۋ-قالپىنا كەلتىرۋ جۇمىستارى كەزىندە تەڭىز جانە جەرۇستى كەشەندەرىندەگى وندىرىستىك وبەكتىلەردىڭ توقتاپ تۇرۋى اسەر ەتتى. ىلەسپە گازدى ءوندىرۋ كولەمى دە تومەندەپ، 451 ملن م3 قۇرادى.
«قاراشىعاناق» كەن ورنىندا مۇناي مەن كوندەنسات ءوندىرۋ بىلتىرمەن سالىستىرعاندا وزگەرىسسىز 768 مىڭ توننا (تاۋلىگىنە 22 مىڭ بارر.) كولەمىندە قالدى. گاز ءوندىرۋ 5،3%-عا ارتىپ، 1 479 ملن م3 قۇرادى. گاز ءوندىرىسىنىڭ ءوسۋى 4ء-شى گازدى كەرى ايداۋ كومپرەسسورىنىڭ قوسىلۋىنا جانە گازدى قايتا وڭدەۋ كولەمىنىڭ ۇلعايۋىنا بايلانىستى بولدى.
كومپانيا وندىرگەن مۇناي مەن گاز كوندەنساتىن ساتۋ كولەمى 2022 جىلدىڭ توعىز ايىندا 1،1%-عا ۇلعايىپ، 16 318 مىڭ تونناعا جەتتى، ونىڭ 60،5%-ى ەكسپورتقا شىعارىلدى.
«كومپانيا وندىرگەن مۇناي مەن گاز كوندەنساتىن ىشكى نارىققا جەتكىزۋ كولەمى 6 439 مىڭ توننانى قۇرادى، ونىڭ ىشىندە وپەراسيالىق اكتيۆتەردىڭ (وزەنمۇنايگاز، ەمبىمۇنايگاز، قازاقتۇرىكمۇناي جانە ورىكتاۋ وپەرەيتينگ) وڭدەۋ جانە ساتۋ ءۇشىن اتىراۋ مۇناي وڭدەۋ زاۋىتىنا (ءاموز)، شىمكەنت مۇناي وڭدەۋ زاۋىتىنا (پقوپ) جانە پاۆلودار مۇناي-حيميا زاۋىتى (پمحز) جەتكىزىلگەن 3 740 مىڭ توننا شيكى مۇنايى بار»، - دەلىنگەن اقپاراتتا.