تەڭىز پورتتارى ارقىلى ءداندى داقىلداردىڭ ەكسپورتىن ۇزدىكسىز قامتاماسىز ەتۋدىڭ وزەكتى ماسەلەلەرى قارالدى

كولىك مينيسترلىگىنە قاراستى تەمىرجول جانە سۋ كولىگى كوميتەتى اقتاۋ قالاسىندا ءداندى داقىلداردىڭ ەكسپورتىن قامتاماسىز ەتۋ بويىنشا كوشپەلى كەڭەس وتكىزدى. 
 
كەڭەسكە تەمىرجول جانە سۋ كولىگى كوميتەتىنىڭ ءتوراعاسى جانىبەك تايجانوۆ،  ق ر اۋىل شارۋاشىلىعى مينيسترلىگىنىڭ، ماڭعىستاۋ وبلىسى اكىمدىگىنىڭ، ق ر پورتتارىنىڭ تەڭىز اكىمشىلىگىنىڭ، قازاقستان تەمىر جولى، تەڭىز پورتتارىنىڭ، استىق تەرمينالدارىنىڭ وكىلدەرى مەن ەكسپورتتاۋشىلار، ترەيدەرلەر، جۇك جونەلتۋشىلەر  قاتىستى، دەپ حابارلايدى aqshamnews.kz.
 
كەڭەس بارىسىندا اقتاۋ جانە قۇرىق تەڭىز پورتتارى ارقىلى ءداندى داقىلداردى ۇزدىكسىز تاسىمالداۋدى قامتاماسىز ەتۋ جانە ەكسپورت الەۋەتىن ارتتىرۋ، ونىڭ ىشىندە ۆەتەريناريالىق جانە فيتوسانيتاريالىق سەرتيفيكاتتاردى بەرۋدى جەڭىلدەتۋ جولدارى قارالدى. سونداي-اق، تاسىمالداۋشىلاردىڭ جەدەل شتاب وتىرىسىندا ايتقان فيتوسانيتاريالىق قىزمەت رەگلامەنتىن وزگەرتۋ جانە استىقتى ەكسپورتتاۋعا رۇقسات بەرۋ ماسەلەلەرى قوزعالدى. 
 
كەڭەس قورىتىندىسى بويىنشا ۆەتەريناريالىق جانە فيتوسانيتاريالىق سەرتيفيكاتتاردى بەرۋ ءراسىمىن وڭايلاتۋ بويىنشا ناقتى ۇسىنىستار ازىرلەنىپ، ق ر اۋىل شارۋاشىلىعى مينيسترلىگىنىڭ قاراۋىنا جولداندى. 
 
بۇل تۇرعىدا كولىك مينيسترلىگى اپتا سايىن استىق داقىلدارىنىڭ ەكسپورتىن قامتاماسىز ەتۋ جونىندەگى جەدەل شتابتىڭ وتىرىسىن وتكىزەدى.
 
ايتا كەتەيىك، بيىلعى 10 ايدىڭ قورىتىندىسى بويىنشا ءداندى داقىلدار ەكسپورتىنىڭ كولەمى شامامەن 6 ملن توننانى قۇرادى.