تەڭىز – نوۆوروسسييسك مۇناي قۇبىرىنىڭ ۇزىندىعى 1511 شاقىرىم
"كاسپيي قۇبىر كونسورسيۋمى-ر" (كقك-ر) باسپا ءسوز قىزمەتى تەڭىز-نوۆوروسسييسك قۇبىرى ارقىلى مۇناي ايداۋ كولەمىنىڭ قىسقارعانىن جەتكىزدى، دەپ حابارلايدى Almaty-akshamy.kz Zakon.kz-كە سىلتەمە جاساپ.
ربك مالىمەتىنشە، رەسەي تەرريتورياسىنا شيكىزات جىبەرۋ كولەمىنىڭ قىسقارۋىنا مۇناي قۇبىرىن جوندەۋ جۇمىستارى جانە وسىعان بايلانىستى قاشاعان كەن ورنىندا مۇناي ءوندىرىسىنىڭ توقتاتىلۋى سەبەپ.
«بۇل فاكتورلار تەڭىز – نوۆوروسسييسك قۇبىر جۇيەسى ارقىلى مۇناي ايداۋدىڭ كولەمىنىڭ ايتارلىقتاي تومەندەۋىنە اكەلىپ سوقتى»، - دەدى كونسورسيۋمنىڭ باسپا ءسوز قىزمەتى.
كقك-نىڭ ەڭ ءىرى سەرىكتەستەرى كومپانيانىڭ 24% اكسياسىنا يەلىك ەتەتىن "ترانسنەفت" جانە باعالى قاعازداردىڭ 19% تيەسىلى "قازمۇنايگاز" اق بولىپ تابىلادى.
تەڭىز – نوۆوروسسييسك مۇناي قۇبىرىنىڭ ۇزىندىعى 1511 شاقىرىمدى قۇرايدى.
ول بويىنشا قازاقستاننىڭ بارلىق ەكسپورتقا جونەلتىلەتىن مۇنايىنىڭ ۇشتەن ەكىسىنەن استامى تاسىمالدانادى، سونداي-اق رەسەي كەن ورىندارىنان دا، ونىڭ ىشىندە كاسپييدەن شيكىزات جەتكىزىلەدى.
شىلدە ايىنىڭ باسىندا نوۆوروسسييسك وڭىرىندەگى پريمورسكيي اۋداندىق سوتى ەكولوگيالىق بۇزۋشىلىقتارعا بايلانىستى كقك (رەسەي مەن قازاقستاننىڭ دا ۇلەسى بار كومپانيا) قىزمەتىن توقتاتتى.
كەيىن ق ر ەنەرگەتيكا مينيسترلىگى جۇمىس شتاتتىق رەجيمدە جۇرگىزىلىپ جاتقانىن، اتالعان ماسەلە شەشىمىن تاپقانىن مالىمدەدى.