تەمىرتاۋدا "ايگولەك" بالاباقشاسىنىڭ تاربيەشىسى ىشىمدىك ءىشىپ، جۇمىسقا كەلىپ، بالالاردى شوشىتقان، دەپ حابارلايدى aqshamnews.kz پاتريوت تەلەگرام كانالىنا سىلتەمە جاساپ.
وقيعا 30 قىركۇيەكتە بولعانىمەن، اتا-انالار بۇل تۋرالى ەندى عانا جاريالادى.
دۇيسەنبى كۇنى، 30 قىركۇيەكتە، پوليسياعا بالاباقشادا تاربيەشىنىڭ بالالارعا دورەكى مىنەز كورسەتىپ، ماس كۇيدە جۇرگەنى تۋرالى ءانونيمدى قوڭىراۋ ءتۇستى. پوليسيا قىزمەتكەرلەرى كەلگەننەن كەيىن تاربيەشىنى مەديسينالىق تەكسەرۋگە الىپ كەتتى.
قىزمەتكەردىڭ ماس بولۋ دەڭگەيى تۋرالى تەكسەرۋ اياقتالعانعا دەيىن جاريالانبايدى.
بۇل وقيعادان حاباردار بولعان اتا-انالار كەلەسى كۇنى بالاباقشاعا كەلىپ، كامەراداعى جازبالاردى قاراپ شىقتى. ۆيدەودا تاربيەشىنىڭ تەڭسەلىپ جۇرگەنى، بالالاردىڭ قولدارىنان ۇستاپ، ولاردى پيجامامەن ۇرىپ جاتقانى بايقالادى. سونداي-اق، تاربيەشىنى پوليسەيلەردىڭ عيماراتتان شىعارىپ جاتقانى كورىنەدى. الايدا، اتا-انالارعا ءدال وسى ءساتتىڭ ۆيدەوجازباسىن كوشىرۋگە رۇقسات بەرىلمەدى.
تەمىرتاۋ قالاسىنىڭ ءبىلىم ءبولىمى "پاتريوت" سايتىنا تۇسىنىكتەمە بەردى. ولاردىڭ ايتۋىنشا، وقيعاعا قاتىستى قىزمەتتىك تەكسەرۋ باستالعان.
"مەملەكەتتىك "ايگولەك" بالاباقشاسىندا ورىن العان وقيعا بويىنشا قىزمەتتىك تەكسەرۋ جۇرگىزىلۋدە. تاربيەشى جۇمىستان شەتتەتىلدى. قىزمەتتىك تەكسەرۋ ناتيجەسىندە لاۋازىمدى تۇلعالارعا قاتىستى وبەكتيۆتى شارالار قولدانىلادى، ونىڭ ىشىندە جۇمىستان بوساتۋ مۇمكىندىگى دە بار"، - دەپ حابارلادى ۆەدومستۆودان.