ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن ەكونوميكانى دەمونوپوليزاسيالاۋ جونىندەگى كوميسسيادا تەمىرجول تاسىمالى جانە دەنساۋلىق ساقتاۋ سالاسىنداعى كەيبىر كاسىپورىندى مەملەكەت مەنشىگىنە قايتارۋ ماسەلەلەرى قارالدى.
ۇكىمەت باسشىسىنا تەمىرجول ينفراقۇرىلىمىنىڭ ءبىرقاتار نىسانىن مەملەكەت مەنشىگىنە قايتارۋ بارىسى تۋرالى باياندالدى، ولاردى باسەكەگە قابىلەتتى ورتاعا بەرۋ تۋرالى مامىلە سوت تاراپىنان جارامسىز دەپ تانىلدى.
اتاپ ايتقاندا، سەنىپ تاپسىرىلعان مۇلىكتى ىسىراپ ەتۋ فاكتىلەرى انىقتالدى. قىلمىستىق ءىس اياسىندا تەرگەۋ ورگاندارى تۇپكىلىكتى پروسەسسۋالدىق شەشىم قابىلدانعانعا دەيىن قتج باسقارماسىنا بەرە وتىرىپ، اكتيۆتەرگە تىيىم سالدى. مۇلىك كەشەنىن قورعاۋ قامتاماسىز ەتىلدى.
پرەمەر-مينيستر رەسپۋبليكانىڭ باسقا وڭىرىندە ۇقساس نىساندار بويىنشا جۇمىستى كۇشەيتۋدى تاپسىرىپ، ءتيىستى كاسىپورىندار قىزمەتكەرلەرىنىڭ بارلىق تەحنولوگيالىق پروسەسى مەن قىزمەتىن ساقتاۋدىڭ ماڭىزىن اتاپ ءوتتى.
سونىمەن قاتار وتىرىستا دەنساۋلىق ساقتاۋ سالاسىنداعى ۇيىمدى رەسپۋبليكا مەنشىگىنە قايتارۋ ماسەلەسى قارالدى.
الدىن الا مالىمەتتەر بويىنشا اكتيۆتى باسقارۋدى ءوز موينىنا العان جەكەمەنشىك كومپانيا ۇزاق ۋاقىت بويى ءوز فۋنكسيالارىن ورىنداماي كەلگەن جانە كەلىسىلگەن ينۆەستيسيالىق باعدارلامانىڭ شارتتارىن بۇزعان.
تالقىلاۋ قورىتىندىسى بويىنشا باسقارۋ تيىمدىلىگىنە تەكسەرۋ جۇرگىزۋ ءۇشىن ۆەدومستۆوارالىق كوميسسيا قۇرۋ تۋرالى شەشىم قابىلداندى. ونىڭ ناتيجەلەرى بويىنشا شارتتى بۇزۋدىڭ جانە اكتيۆتى مەملەكەت مەنشىگىنە قايتارۋدىڭ دۇرىستىعى تۋرالى شەشىم قابىلداناتىن بولادى.