بۇل تۋرالى ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ايتتى.
«ەلىمىزدىڭ كولىك-لوگيستيكالىق الەۋەتىن ارتتىرۋ ءۇشىن بەلسەندى جۇمىس ىستەۋ قاجەت. قازاقستاندى ەۋرازيانىڭ تولىققاندى كولىك-لوگيستيكالىق جانە ترانزيتتىك حابىنا اينالدىرۋ – الدىمىزدا تۇرعان ستراتەگيالىق مىندەت. وسى مىندەتتى ىسكە اسىرۋ ءۇشىن كولىك مينيسترلىگى قۇرىلدى. سوندىقتان، مينيسترلىك وسى سالاداعى وزەكتى ماسەلەلەر بويىنشا شۇعىل جانە ءتيىمدى شەشىمدەر قابىلداۋى كەرەك. ناقتى ناتيجە كۇتەمىن»، - دەدى پرەزيدەنت.
مەملەكەت باسشىسىنىڭ اتاپ وتۋىنشە، بيىل ءبىرىنشى جارتىجىلدىقتا تەمىرجول سالاسىنداعى وزەكتى ماسەلەلەردى شەشۋ جولدارىن قامتيتىن باعدارلامالىق قۇجاتتى قابىلداۋ قاجەتتىگىن باسا ايتتى.
«ماسەلە از ەمەس. اتاپ ايتقاندا، ۆاگونداردى جاڭارتۋ جۇمىسىن تەزدەتۋ كەرەك. كونتەينەرلەردىڭ تاپشىلىعىن جويۋ قاجەت. ماگيسترالدى جەلىلەردى كەڭەيتۋگە قاتىستى بارلىق جوبالاردى جۇزەگە اسىرۋ قاجەت. ياعني، ءسوز 2028 جىلعا قاراي 1،3 مىڭ شاقىرىم جول سالۋعا قاتىستى بولىپ وتىر. جالپى، تەمىرجول سالاسىن قارقىندى تۇردە سيفرلاندىرۋ كەرەك. بۇل قادام ونىڭ تيىمدىلىگى مەن ونىمدىلىگىن ەداۋىر ارتتىرۋعا، بيۋدجەت قاراجاتىن ۇنەمدەۋگە مۇمكىندىك بەرەدى»، - دەدى قاسىم-جومارت توقايەۆ.