تەمىرجول نىساندارى كۇن سايىن قاداعالانۋدا

ەلدەگى سۋ تاسقىنىنا بايلانىستى قازىرگى تاڭدا تەمىرجولشىلار قاۋىپسىزدىك شارالارىن كۇشەيتكەن.  

ەڭ الدىمەن ماگيسترالدىق جەلى مەن  جاساندى قۇرىلىستاردىڭ جاعدايى ەرەكشە باقىلاۋعا الىنعان، دەپ حابارلايدى Almaty-akshamy.kz.

استانا جول ديستانسياسى قاراماعىنداعى بارلىق تەمىرجول نىساندارىن قاداعالاۋدا ۇستاپ وتىر. ديستانسيانىڭ كوپىر شەبەرى مەڭدىعالي داۋلەتشيننىڭ ايتۋىنشا، قازىرگى تاڭدا جول بويىنداعى كوپىرلەر مەن سۋ وتكىزەتىن قۇبىرلار، كيۋۆەتتەر مەن تاۋلى جىرالار، جولاۋشىلار كوپىرلەرى، ت.ب تەمىرجول بويىنداعى سۋاعارلار تازالانىپ، جاساندى يماراتتاردىڭ جاعدايى ءجىتى تەكسەرىلۋدە.  ولاردىڭ ءبارى، ءشوپ-شالام مەن  قوقىستان تازالاندى. تاسقىنعا قارسى ءىس-شارالار اياسىندا قازىرگى تاڭدا ديستانسيادا 6 ۆاگون – 1 جۇك تيەلگەن جابىق ۆاگون، تەمىربەتون شپال تيەلگەن 2 پلاتفورما، رەلس تيەلگەن 1 پلاتفورما، قوي تاستار تيەلگەن 2 ۆاگون دايىن تۇر.  

«تۇراقتى كەزەكشىلىك ۇيىمداستىرىپ، تەمىرجول بويىنداعى سۋ جينالىپ قالۋى ءقاۋپى بار ورىندار، جالپى بارلىق جول بويى تەكسەرىلۋدە. كوپىر شەبەرلەرى، جول شەبەرلەرى، ديستانسيا باستىعىنىڭ ورىنباسارلارى ءوز تەلىمىنە قاراي تۇراقتى تۇردە لوكوموتيۆپەن جولدىڭ بويىن ارالاپ ، سۋ جينالا باستاعان جەرلەردى كورسە بىردەن ونىڭ قاي شاقىرىمدا قاي تەلىمدە ورنالاسقانىن ايتىپ ارنايى چاتتا حابار بەرەدى.  سوسىن ول جەردەگى سۋدى جويۋعا جولشىلار بارىپ، ءتيىستى جۇمىستاردى اتقارادى. ەگەر جينالعان سۋ قاۋىپسىزدىككە نۇقسان كەلتىرمەي اعىپ كەتىپ جاتسا، ونى دا ايتادى. ءبىزدىڭ ديستانسيا بويىنشا ءقاۋىپ  جوق، كۇن سايىن كەزەكشىلىككە شىعىپ، جاعدايدى قاداعالاپ وتىرمىز»، – دەيدى كوپىر شەبەرى.