Telegram مەسسەندجەرىنىڭ نەگىزىن قالاۋشى پاۆەل دۋروۆ پاريجدە قاماۋعا الىنعانىن حابارلاعان ەدىك.
كاسىپكەر فرانسيادا ىزدەۋدە جۇرگەندەردىڭ تىزىمىندە بولعان. فرانۋز قۇقىق قورعاۋشىلارى: «قىلمىسكەرلەر الەۋمەتتىك جەلىنى ەسىرتكى اينالىمى جانە وزگە دە قىلمىس تۇرلەرىنىڭ جاسالۋىنا نەگىزگى پلاتفورما رەتىندە پادالانعان»، – دەيدى.
ال دۋروۆ وسى Telegram-دا زاڭعا قايشى كەلەتىن ارەكەتتەردى شەكتەمەي، قۇقىق قورعاۋ ورگاندارىمەن بىرگە جۇمىس ىستەۋدەن باس تارتقانى ءۇشىن كۇدىككە ىلىنگەن. ميللياردەر 2021 جىلى فرانسيا ازاماتتىعىن العاندىقتان، وزگە ەلگە ەكستراديسيالانۋى ەكىتالاي.
فرانسياداعى رەسەي ەلشىلىگى ءمان-جايدى انىقتاۋ ءۇشىن قاجەتتى ءىس-شارالاردى قابىلداعان. ال يلون ماسك ءوزىنىڭ ح الەۋمەتتىك جەلىسىندە بۇل ءسوز بوستاندىعىن شەكتەۋ ەكەنى تۋرالى جازبا قالدىردى. وقيعا نارىقتاعى جاعدايعا دا اسەر ەتتى. ءسويتىپ، كاسىپكەرمەن قۇرىلعان توتكوين كريپتوۆاليۋتاسى شامامەن 15%-كە قۇلدىراعان.
ايتا كەتكەن ءجون، الەمدە Telegram قولدانۋشىلارىنىڭ سانى 900 ميلليوننان اسادى. كوبىن الداعى كۇندەرى سەرۆيس قالاي جۇمىس ىستەيدى دەگەن سۇراق مازالاپ وتىر. بۇعان قاتىستى كيبەرقىلمىس سالاسىنداعى تاۋەلسىز ساراپشى ەۆرگەنيي پيتولين بىلاي دەيدى.
ەۆگەنيي پيتولين، كيبەرقاۋىپسىزدىك سالاسىنداعى تاۋەلسىز ساراپشى:
Telegram قازاقستاندىقتار ءۇشىن اقپارات الماسۋدىڭ ءىرى الاڭىنىڭ ءبىرى ەكەنى ءسوزسىز. پلاتورفمانىڭ جابىلۋ ءقاۋپى نولگە تەڭ دەسەك تە بولادى. فرانسيادا نە ەۋروپادا سەرۆەرلەر بولسا دا، ولار تاركىلەنگەن كۇننىڭ وزىندە ونداعى اقپارات ساناۋلى ساعاتتا قالپىنا كەلتىرىلەدى. مەديايمپەريا جۇمىسىن جالعاستىرا بەرەدى. سوندىقتان دۇربەلەڭگە بوي الدىرىپ، اقپاراتتى شىعارىپ الۋعا اسىقپاڭىزدار. سوسىن الاياقتارلان ساق بولىڭىزدار. ويتكەنى ولار بۇل جاعدايدى پايدالانىپ، «Telegram-دى قالپىنا كەلتىرۋ ءۇشىن مىنا سىلتەمەگە ءوتىڭىز، مىنانى باسىڭىز» دەگەن جالعان اقپارات تاراتۋى مۇمكىن. سوندىقتان الداعى كۇندەرى كيبەرقىلمىس سانى ارتادى دەپ ويلايمىن. بۇل رەتتە كورەرمەندەردى مۇنداي اقپاراتقا سەنبەي، ساق بولۋعا شاقىرامىن.