شەبەرلەردىڭ قولونەر بۇيىمدارى كوپشىلىككە ۇسىنىلدى
تەمىردەن ءتۇيىن ءتۇيىپ، اعاشتان ويۋ ويعان الماتى وبلىسىنىڭ قولونەر شەبەرلەرى تەكەلى قالاسىندا باس قوستى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
كەندى شاحاردا «جەتىسۋ – ۇلى جىبەك جولىنىڭ جاڭعىرۋى» اتتى ەتنوفەستيۆال ءوتتى. ۇستالار، ىسمەرلەر مەن زەرگەرلەر ءوز بۇيىمدارىن كوپشىلىك نازارىنا ۇسىنىپ، ءوزارا سىنعا ءتۇستى.
زايىت ءسايدىلحان ۇستالىق پەن زەرگەرلىكتى قاتار مەڭگەرگەن قولونەر شەبەرى. ول تەمىردەن باكى، كەزدىك، قاقپان، ال التىن، كۇمىستەن اشەكەيلەردى جاسايدى. جۇزىك، ساقينا، بىلەزىكتەرگە سالىنعان ويۋ-ورنەكتىڭ وزىندىك ءمانى بار دەيدى زەرگەر.
«تورتوبەل ءمۇيىز قىلىپ جاسالعان نارسە ەكەۋىن بىرلەستىرگەندە قوس جۇرەك بولىپ تۇر. ەندى مىنانى توي جاسايتىن ۇل، قىزدار نەكە قيعاندا وسىنداي جۇزىكتەر سالادى. ال مىنا بىلەزىكتەر سىڭار ءمۇيىز، توي جاساماعان قىزدار سوعان قاراي سالعان نارسەلەر. ال مىنا اجەلەر سالادى بىلەزىكتى. توبەل ءمۇيىز قىلىپ، شەڭبەر ارالاستىرىپ، نۇكتەلەر سالادى. وركەنى ءوسسىن ۇرپاقتى بولسىن دەگەن ماعىنا بىلدىرەدى»،-دەيدى قولونەر شەبەرى زايىت ءسايدىلحان.
زايىت ءسايدىلحان سياقتى 30-دان اسا قولونەر شەبەرى ەتنوفەستيۆالعا قاتىستى. ولار قۇراق كورپە، كيىز ونىمدەر، ەرتۇرمان مەن سازسىرناي، اعاش استاۋ، كادەسىيلار مەن تەرىدەن جاسالعان كارتينالاردى كوپشىلىك نازارىنا ۇسىندى.
«ءبىر جارىم جىلدان بەرى مۇنداي جيىن، ەشتەڭە بولمادى. ءبارىمىز ۇيدە وتىردىق. ەندى مىنە كورمە ۇيىمداستىرىپ، جان-جاقتان كەلىپ كورسەتىپ جاتىر. ءبىزدىڭ قالامىزدا كورسەتكەنىنە قۋانىشتىمىز. بۇرىندا مۇنداي كورمەلەر تالدىقورعاندا عانا بولاتىن. بۇل وتە جاقسى ءۇردىس دەپ ويلايمىن. كەيىنگى جاستارعا ۇلگى»،-دەيدى قازاقستاننىڭ ەڭبەك سىڭىرگەن مادەنيەت قايراتكەرى ايكەش مۇقاشيەۆا.
ۇلتتىق ونەردىڭ ناسيحاتشىلارى ەتنوفەستيۆالدا ءوزارا تاجىربيە الماستى. سالانى دامىتۋعا قاتىستى وزەكتى ماسەلەلەردى تالقىلادى.
«وسى قولونەرىمىزگە كومەكتەسىپ، گرانت بەرسە، كيىپ جۇرگەن كيىمىمىز وتە پايدالى بولعاننان كەيىن مىناۋ شەتەلدەردەن العانشا ءوزىمىزدىڭ ءوندىرىسىمىزدى دامىتىپ شىعارساق پا دەيمىز»،-دەيدى شەبەر اناركۇل جامانقۇل قىزى.
فەستيۆال قورىتىندىسىندا ۇزدىكتەر انىقتالىپ 9 اتالىم بويىنشا ماراپاتتالدى. وزگە دە قولونەر شەبەرلەرىنە العىس حاتتار تابىس ەتىلدى. سالاعا سەرپىن بەرۋ ماقساتىندا قوعامدىق بىرلەستىكتەر مەن تۋريستىك كومپانيالار اراسىندا مەموراندۋم جاسالدى.