ەندى زاڭ بۇزۋشىلىقتار مەن جالعان تەكسەرۋ بەلگىلەرىن انىقتاعان تەحنيكالىق بايقاۋدىڭ دياگنوستيكالىق كارتالارى جويىلادى، دەپ حابارلايدى Almaty-akshamy.kz.
دياگنوستيكالىق كارتادان باس تارتۋ كەزىندە اۆتوكولىك يەسىنە 1414 نومىرىنە تەحنيكالىق بايقاۋدان قايتا ءوتۋ قاجەتتىلىگى تۋرالى SMS حابارلاما كەلەدى.
BAQ.KZ مالىمەتى بويىنشا، دياگنوستيكالىق كارتانىڭ كۇشىن جويۋدى «مىندەتتى تەحنيكالىق قاراپ-تەكسەرۋ» ءبىرىڭعاي اقپاراتتىق جۇيەسىنىڭ وپەراتورى جانە جۇمىس توبى جۇيەگە كەلىپ تۇسەتىن دەرەكتەردىڭ مونيتورينگى كەزىندە جۇزەگە اسىرادى. اتالمىش وزگەرىستەر كولىك قۇرالىن مىندەتتى تەحنيكالىق بايقاۋدان وتكىزۋدى ۇيىمداستىرۋ جانە وتكىزۋ قاعيدالارىنا ەنگىزىلگەن وزگەرىستەر مەن تولىقتىرۋلارعا بايلانىستى ورىن الدى.
دياگنوستيكالىق كارتا – تەحنيكالىق بايقاۋدان وتكەنىن راستايتىن قۇجات، ونسىز اۆتوموبيل ەلدە جۇرە المايدى. كارتانى مىندەتتى تەحنيكالىق بايقاۋدان ءوتۋ ەرەجەلەرىنە سايكەس تەحنيكالىق بايقاۋ ورتالىقتارى (وپەراتورلار) بەرەدى.
«جىل سايىن ءبىز جالعان تەحنيكالىق بايقاۋدان انىقتالعان وپەراتورلاردىڭ جۇمىسىن توقتاتامىز. تەك 2021 جىلدىڭ وزىندە 249 ورتالىق يەسىنىڭ جۇيەگە قول جەتكىزۋ توقتاتىلدى، ال 2022 جىلى بۇل كورسەتكىش 168-گە دەيىن تومەندەدى. تەحنيكالىق بايقاۋدان ءوتۋ ەرەجەلەرىن بۇزعان جاعدايدا تەكسەرۋ ورتالىقتارىنىڭ يەلەرى عانا ەمەس، سونىمەن قاتار كولىك يەسىنىڭ ءوزى دە جاۋاپتى. ءبىز جالعان تەحنيكالىق بايقاۋدان ءوتۋدى ۇسىنبايمىز، سەبەبى ءقازىر تەحنيكالىق بايقاۋ ستانسياسىندا جۇمىس ىستەۋگە رۇقساتتىڭ كۇشى جويىلىپ قانا قويماي، سول ۇيىم بەرگەن بارلىق تەكسەرۋ دەرەكتەرى دە جويىلادى،- دەپ اتاپ ءوتتى «ۇلتتىق اقپاراتتىق تەحنولوگيالار» اق باسقارما ءتوراعاسى روستيسلاۆ كونياشكين.
ايتا كەتۋ كەرەك، تەحنيكالىق بايقاۋدان ءوتۋ ەرەجەلەرىنە سايكەس، جاڭا اۆتوكولىكتەردىڭ يەلەرى 7 جىل بويى تەحنيكالىق بايقاۋدان وتپەيدى، قالعانداردى كولىكتى كەلەسى كەزەڭدىلىكپەن تەحنيكالىق بايقاۋ ورتالىقتارىندا تەكسەرۋگە مىندەتتى:
1) ءاربىر 12 اي سايىن – شىعارىلعان جىلىن قوسا العاندا، جاسى 7 جىلدان اساتىن، اۆتوموبيل كولىگى سالاسىنداعى كاسىپكەرلىك قىزمەتتە پايدالانىلمايتىن M1 ساناتتارى، N1-3، O1-4، L1-7، سونداي-اق ءقاۋىپتى جۇكتەردى تاسىمالداۋعا ارنالعان جانە جابدىقتالعانداردى قوسپاعاندا، ارنايى جانە مامانداندىرىلعان كولىك قۇرالدارى؛
2) ءاربىر 6 اي سايىن-اۆتوموبيل كولىگى سالاسىندا كاسىپكەرلىك قىزمەتتە پايدالانىلاتىن M1 ساناتتارى، م2، م3، N، ادامداردى تاسىمالداۋ ءۇشىن جابدىقتالعان، سونداي-اق ءقاۋىپتى جۇكتەردى تاسىمالداۋعا ارنالعان جانە جابدىقتالعان M1، N1-3، جانە O1-4 ساناتتارى.
تەحنيكالىق بايقاۋدان وتپەگەنى ءۇشىن اكىمشىلىك ايىپپۇل - 5 اەك (2023 جىلى 17 250 تەڭگە).
ايتا كەتەيىك، ۇكىمەتتىڭ قاۋلىسىمەن «مىندەتتى تەحنيكالىق قاراپ-تەكسەرۋ» ءبىرىڭعاي اقپاراتتىق جۇيەسى اقپاراتتىق-كوممۋنيكاسيالىق ينفراقۇرىلىمنىڭ اسا ماڭىزدى وبەكتىلەرىنىڭ تىزبەسىنە ەنگىزىلگەن.