الماتى ەلەكتروموبيل يەلەرىنە اۆتوكولىكتەرىن كوممۋنالدىق تۇراقتاردا تەگىن قالدىرۋ ءۇشىن قانداي قادامدار جاساۋ كەرەكتىگى ايتىلدى، دەپ حابارلايدى aqshamnews.kz.
2024 جىلدىڭ 18 قىركۇيەگىنەن باستاپ ەلەكتروموبيلدەرگە ارنالعان تەگىن تۇراققا قاتىستى جاڭا زاڭ كۇشىنە ەنەدى. وسىعان وراي، «الماتى پاركينگ» كوممۋنالدىق اقىلى تۇراق وپەراتورى ەلەكتر تارتقىشى بار كولىك قۇرالدارىن ارنايى تىزىلىمگە قوسۋ ءراسىمىن ءتۇسىندىردى.
«ەلەكتروموبيلدەردىڭ يەلەرى كوممۋنالدىق تۇراقتى پايدالانعانى ءۇشىن تولەمنەن بوساتىلۋى ءۇشىن ءتيىستى قۇجاتتارىن ۇسىنۋى قاجەت. جەڭىلدىكتەر تىزىلىمىنە قوسىلۋ ءۇشىن ەلەكتروموبيل يەلەرى «الماتى پاركينگى» مەكەمەسىنە تىكەلەي جۇگىنە الادى نەمەسە تەحپاسپورتتىڭ سكانەرلەنگەن نۇسقاسىن قوسىپ، «ە-وتىنىش» پورتالى ارقىلى ءوتىنىش بەرە الادى»، – دەپ مالىمدەدى كاسىپورىن.
كاسىپورىننىڭ ايتۋىنشا، وتىنىشتەر مەن قۇجاتتار قارالعاننان كەيىن، ەلەكتر كولىگى يەلەرىنىڭ دەرەكتەرى تىزىلىمگە قوسۋ تۋرالى شەشىم قابىلدانادى. ءوتىنىمدى قاراۋ مەرزىمى 15 كۇنتىزبەلىك كۇندى قۇرايدى، جانە ءار ءوتىنىش بەرۋشىگە رەسمي جاۋاپ بەرىلەدى. بۇل پروسەدۋرانى ءبىر جىلدان كەيىن قايتا ءوتۋ كەرەك، سەبەبى ءتىزىلىم جىل سايىن جاڭارتىلىپ وتىرادى.