7-8 جەلتوقسان ارالىعىندا قازاق ۇلتتىق قىزدار پەداگوگيكالىق ۋنيۆەرسيتەتىندە «Tech QyzPu Niğde Hack: 24 ساعات كودتاۋ جانە شىعارماشىلىق» تاقىرىبىندا حاكاتون ءوتتى. وتاندىق ستۋدەنتتەر مەن ازىرلەۋشىلەر اراسىندا وتكەن جارىس يننوۆاسيالاردى جانە ىنتىماقتاستىقتى دامىتۋعا باعىتتالعان، دەپ حابارلايدى aqshamnews.kz
ءىس-شارا QyzPU ۋنيۆەرسيتەتى مەن تۇركيانىڭ نييدە ومەر حاليسدەمير ۋنيۆەرسيتەتى جانە نييدە تەحنوپاركىنىڭ سەرىكتەستىگى اياسىندا ۇيىمداستىرىلدى.
حاكاتونعا 12 وتاندىق ۋنيۆەرسيتەتتەن 23 كوماندا قاتىستى. قاتىسۋشىلار توپتىق جۇمىستى جانە شىعارماشىلىق شەشىمدەر تابۋدى ىنتالاندىرۋ ارقىلى 24 ساعات ىشىندە يننوۆاسيالىق باعدارلامالىق شەشىمدەر ازىرلەۋى ءتيىس بولدى.
«ۋنيۆەرسيتەتىمىزدە جاستار ءۇشىن ماڭىزدى ءارى قىزىقتى شارا ءوتىپ جاتىر. حاكاتونعا قازاقستاننىڭ تۇكپىر-تۇكپىرىنەن جينالعان IT ماماندىعىنا قىزىعۋشىلىق تانىتقان تالانتتى جاستار قاتىسۋدا. جاستارعا قوعامداعى جانە ءبىلىم بەرۋ سالاسىنداعى وزەكتى ماسەلەلەر ۇسىنىلىپ، سولارعا شىعارماشىلىق شەشىم تابۋ مىندەتتەلگەن. سوندىقتان ستۋدەنتتەرىمىز 24 ساعات بويى ۋنيۆەرسيتەت قابىرعاسىندا قالىپ، ۇسىنىلعان ماسەلەلەرگە اسا شىعارماشىل جانە تىڭ شەشىمدەر ۇسىنۋدا. ولاردىڭ ماڭىزدى سۇراقتارعا ناقتى ءارى كرەاتيۆتى جاۋاپتار تاۋىپ جاتقانى ءبىزدى ەرەكشە قۋانتادى»، – دەدى قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما ءتوراعاسى — رەكتورى گۇلميرا قاناي.
حاكاتون سوڭىندا كوماندالار ءوز جوبالارىن QyzPU، نييدە ومەر حاليسدەمير ۋنيۆەرسيتەتى جانە نييدە تەحنوپاركىنىڭ وكىلدەرى باعالايتىن قازىلار القاسىنا ۇسىندى. سونىمەن قاتار قاتىسۋشىلارعا «TilTuran» ج ش س وكىلى فەليكس فاتىحوۆ مىرزا دا تورەلىك ەتتى. ەكى كۇنگە سوزىلعان بايقاۋ قورىتىندىسى بويىنشا: Dulati University «Hexagon كومانداسى»، QyzPU-دىڭ «Byte Belles» جانە «Digital Devas» كومانداسى – ءىىى ورىن، الماتى ەنەرگەتيكا جانە بايلانىس ۋنيۆەرسيتەتىنىڭ «Energo University» كومانداسى جانە QyzPU «Digital Nomads» كومانداسى – ءىى ورىن، ال ءال-فارابي اتىنداعى قازاق ۇلتتىق ۋنيۆەرسيتەتىنىڭ «CyberPercy» كومانداسى جۇلدەلى ءى ورىندى يەلەندى. ءىى جانە ءىىى ورىن يەگەرلەرىنە قارجىلاي سەرتيفيكاتتار بەرىلسە، ءى ورىن يەگەرلەرىنە قارجىلاي سەرتيفيكاتتارمەن قاتار تۇركياداعى نييدە تەحنوپاركىنىڭ اكسەلەراسيالىق باعدارلاماسىنا قاتىسۋ سەرتيفيكاتى تابىستالدى. سونىمەن قاتار كوماندا جەتەكشىلەرى دە العىس حاتتارمەن ماراپاتتالدى.
حاكاتوندا جەڭىمپاز اتانعان ءال-فارابي اتىنداعى قازاق ۇلتتىق ۋنيۆەرسيتەتىنىڭ «CyberPercy» كومانداسى ءوز قۋانىشتارىمەن ءبولىستى: «ءبىز – ءال-فارابي اتىنداعى قازاق ۇلتتىق ۋنيۆەرسيتەتىنىڭ 4 كۋرس ستۋدەنتتەرىمىز. حاكاتون بارىسىندا قازاق ءتىلىن ۇيرەنۋگە ارنالعان ونلاين پلاتفورما قۇرۋدى مىندەتتەگەن 5ء-شى كەيستى تاڭدادىق. جۇمىستىڭ العاشقى جانە ماڭىزدى كەزەڭى تەرەڭ تالداۋ جاساۋ بولدى. سوندىقتان ءتۇنى بويى ۇيقىسىز ەڭبەك ەتىپ، قاجەتتى اناليزدەر جۇرگىزدىك. تەك وسىدان كەيىن عانا جوبانى ىسكە اسىرۋعا كىرىستىك. بۇل پروسەسس ءبىز ءۇشىن ەرەكشە قىزىقتى ءارى شابىتقا تولى بولدى. ەڭ باستىسى، ەڭبەگىمىز اقتالىپ، ناتيجەسىندە جەڭىسكە جەتتىك. ۇيىمداستىرۋشىلارعا وسىنداي مۇمكىندىك سىيلاعانى ءۇشىن العىسىمىزدى بىلدىرەمىز. تۇركيا، ءبىزدى كۇت!».
ايتا كەتەيىك، ءىس-شارا اياسىندا قازاق ۇلتتىق قىزدار پەداگوگيكالىق ۋنيۆەرسيتەتى مەن نييدە ومەر حاليسدەمير ۋنيۆەرسيتەتى اراسىنداعى ىنتىماقتاستىقتى نىعايتۋ ماقساتىندا جاڭا كەلىسىمشارتقا قول قويىلدى. بۇل كەلىسىم اياسىندا بىرلەسكەن عىلىمي جوبالاردى جۇزەگە اسىرۋ جوسپارلانىپ وتىر. اتاپ ايتقاندا، جوبالار مەكتەپكە دەيىنگى وقىتۋ جانە تاربيەلەۋ، باستاۋىش وقىتۋدىڭ پەداگوگيكاسى مەن ادىستەمەسى، سونداي-اق پەداگوگيكا جانە پسيحولوگيا باعىتتارىن قامتيدى. سونىمەن قاتار تاراپتار دوكتورانتۋرا باعدارلامالارىن بىرلەسە ازىرلەپ، وسى باعىتتا جاڭا باستامالاردى ىسكە اسىرۋعا نيەت ءبىلدىرىپ وتىر. بۇل كەلىسىم ەكى ۋنيۆەرسيتەتتىڭ ءبىلىم جانە عىلىم سالاسىنداعى ىنتىماقتاستىعىن جاڭا دەڭگەيگە كوتەرمەك.
«بۇگىن قازاق ۇلتتىق قىزدار پەداگوگيكالىق ۋنيۆەرسيتەتى جانە نييدە ومەر حاليسدەمير ۋنيۆەرسيتەتى بىرلەسە «حاكاتون» ۇيىمداستىردىق. سونىمەن قاتار ەكى ۋنيۆەرسيتەت اراسىندا سەرىكتەستىك تۋرالى كەلىسىمگە قول قويىلدى. ءبىز ەكى تۋىستاس مەملەكەتپىز. وسىمەن ءۇشىنشى رەت الماتى قالاسىنا كەلىپ وتىرمىز. ءبىز وتە قۋانىشتىمىز. ىنتىماقتاستىعىمىز 100 جىلدىق بولسىن»، — دەدى نييدە ومەر حاليسدەمير ۋنيۆەرسيتەتىنىڭ رەكتورى حاسان ۋسلۋ.
