الماتىدا 3000 سپەكتاكل ساحنالانىپ، 700 مىڭ كورەرمەن سپەكتاكلگە بارعان
تەاتر ارتيستەرى ماۋسىمدى ءساتتى اياقتاپ، دەمالىسقا شىقتى. مادەني استانادا ونەرسۇيەر قاۋىم ءۇشىن 3000-عا جۋىق سپەكتاكل ساحنالانعان، ونىڭ 52ء-سى پرەمەرا.
الماتىدا درامالىق، وپەرالىق جانە بالەتتىك قويىلىمدارعا 700 مىڭنان استام كورەرمەن كەلگەن. بۇل قالا اكىمدىگىنە، سونداي-اق مادەنيەت جانە اقپارات مينيسترلىگىنە قاراستى ون مەملەكەتتىك تەاتردىڭ كورسەتكىشى.
ايتا كەتەيىك، مەملەكەتتىك قۋىرشاق تەاترى 88ء-شى ماۋسىمىندا كورەرمەندەرگە 1200 سپەكتاكل ۇسىنىپ، 82 مىڭنان استام كورەرمەن قابىلداعان. تەاتر ۇجىمى كانادا استاناسىندا The First international Ottawa Puppet festival حالىقارالىق فەستيۆالدىڭ باس جۇلدەسىن جەڭىپ الىپ، ماۋسىمدىۇلكەن جەڭىسپەن اياقتادى. ايتا كەتەيىك، بيىل اكىمدىك 10 جىلدا العاش رەت تەاتر عيماراتىن جاڭعىرتىپ، جوندەۋ جۇمىستارىن جۇرگىزدى. كەلەسى ماۋسىمدا ونەر ۇجىمى 90 جىلدىق مەرەيتوىن اتاپ وتەدى.
الماتىداعى جاس تەاتردىڭ ءبىرى – «الاتاۋ» ءداستۇرلى ونەر تەاترى. وسى ماۋسىمدا تەاتر ارتيستەرى كورەرمەندەرگە 76 سپەكتاكل ۇسىنىپ، ونى 53 200 ادام كورگەن. سونىمەن قاتار، وسى ماۋسىمدا «الاتاۋ» ءدوت ارتيستەرى يتاليا، اۋستريا جانە قىتايدا ونەر كورسەتتى.
ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى وسى ماۋسىمدا ەڭ كوپ كورەرمەن جينادى. تەاتر ساحنالاعان قويىلىمداردى 130 مىڭنان استام ادام تاماشالاعان.
رەسپۋبليكالىق مەملەكەتتىك اكادەميالىق كورەي تەاترى بيىل پرەمەراعا باي بولدى. تەاتر ءوز 92ء-شى ماۋسىمىندا كورەرمەندەرگە 13 جاڭا قويىلىم ۇسىنعان.
مۇحتار اۋەزوۆ اتىنداعى قازاق ۇلتتىق دراما تەاترىنىڭ ۇجىمى 98ء-شى ماۋسىمدا كورەرمەندەرگە 199 سپەكتاكل ۇسىنعان.
جاڭا تەاتر ماۋسىمى ءداستۇرلى تۇردە قىركۇيەكتە باستالادى. سول ۋاقىتقا دەيىن ارتيستەر تىڭ كۇش جيناپ، رەجيسسەرلەر جاڭا قويىلىمدار جوسپارلايتىن بولادى.