پرەمەر-مينيستر ولجاس بەكتەنوۆ قازاقى يت تۇقىمىن ساقتاۋ، ءوسىمىن مولايتۋ جانە دارىپتەۋ ماسەلەلەرىنە قاتىستى دەپۋتاتتىق ساۋالعا جاۋاپ بەردى.
«جانۋارلار دۇنيەسىن قورعاۋ، ءوسىمىن مولايتۋ جانە پايدالانۋ تۋرالى» زاڭدى ىسكە اسىرۋ شەڭبەرىندە ۇكىمەت تازى مەن توبەت تۇقىمىن ساقتاۋ جانە ءوسىمىن مولايتۋ سالاسىندا شارالار قابىلدادى. ماسەلەن، 2025-2035 جىلدارعا ارنالعان قازاقى يت تۇقىمدارىن ساقتاۋ جانە ءوسىمىن مولايتۋ جونىندەگى جول كارتاسى بەكىتىلدى، ول اتالعان يت تۇقىمدارىن قورعاۋعا، دامىتۋعا جانە تانىمال ەتۋگە باعىتتالعان»، - دەپ مالىمدەدى ولجاس بەكتەنوۆ.
سونداي-اق پرەمەردىڭ ايتۋىنشا، قازاقى يت تۇقىمىنىڭ ءتيىستى ستاندارتتارى قابىلدانىپ، «قازاق تازىسى» تاقىرىبىنا عىلىمي زەرتتەۋلەر جۇرگىزىلدى. «قازاق توبەتى» تۇقىمى بويىنشا وسىنداي جۇمىس 2025 جىلى اياقتالادى.
«قازاقى يت تۇقىمىنىڭ تازالىعىن قورعاۋعا قاتىستى ماسەلەنى قوعامدىق ۇيىمدارمەن جانە مەملەكەتتىك ورگاندارمەن تالقىلاۋ قورىتىندىسى بويىنشا قازاقى يت تۇقىمدارىن ساقتاۋ جانە ءوسىمىن مولايتۋ ماسەلەلەرى تۋرالى زاڭ شەڭبەرىندە قازاقى يت تۇقىمدارىنىڭ ۇلتتىق ورتالىعى قۇرىلعان»، - دەدى ۇكىمەت باسشىسى.
بەكتەنوۆتىڭ مالىمدەۋىنشە، بەلگىلى جازۋشى مۇحتار ءماعاۋيننىڭ «تازىنىڭ ءولىمى» اتتى اڭگىمەسىنىڭ نەگىزىندە كوركەم فيلم تۇسىرۋگە دايىندىق جۇمىستارى ءجۇرىپ جاتىر.
«مۇحتار ءماعاۋيننىڭ «تازىنىڭ ءولىمى» شىعارماسى نەگىزىندە كوركەم فيلم ءتۇسىرۋ ماسەلەسى بويىنشا قازىرگى ۋاقىتتا قولايلى سەنارييلەردى ىرىكتەۋ جۇمىستارى جۇرگىزىلىپ جاتقانىن اتاپ وتەمىز»، - دەدى پرەمەر دەپۋتاتتىق ساۋالعا جاۋاپ بەرە وتىرىپ.