الماتىدا قالا تۇرعىندارى ءۇشىن ۇلكەن ماڭىزعا يە «Almaty Clean&Green» ەكولوگيالىق اكسياسى وتكىزىلدى. بۇل باستاما «تازا قازاقستان» باعدارلاماسى مەن «الماتى – ءبىزدىڭ ورتاق ءۇيىمىز» ناۋقانى اياسىندا، ناۋرىز ايىنىڭ سوڭىنداعى تازارۋ كۇنىنە وراي ۇيىمداستىرىلعان، دەپ حابارلايدى aqshamnews.kz
اكسيانىڭ نەگىزگى شارالارىنىڭ ءبىرى — قالانىڭ جاسىلداندىرۋ جۇمىستارى بولدى. قالا تۇرعىندارى اعاش وتىرعىزۋ ءىس-شاراسىنا قاتىسىپ، قالا اۋماعىن كوگالداندىرۋعا ءوز ۇلەستەرىن قوستى. بوستاندىق اۋدانىنداعى «وڭتۇستىك» ساياباعىندا 100 كوشەت وتىرعىزىلدى.
«بۇل جۇمىستار تۇرعىنداردىڭ ءوز باستاماسىمەن ىسكە اسۋدا. ءار جىلى الماتى قالاسىنىڭ تۇرعىندارى تازالىق پەن كوركەيتۋ جۇمىستارىنا جاۋاپكەرشىلىكپەن قارايدى. ەكوقۇزىرەتتىلىكتى ارتتىرۋ — «تازا قازاقستان» باعدارلاماسىنىڭ باستى ماقساتى. مۇنداي ءىس-شارالار ەكولوگيالىق مادەنيەتتى قالىپتاستىرىپ، قالامىزدىڭ تازالىعى مەن دامۋىنا دەگەن جاۋاپكەرشىلىكتى نىعايتادى»، دەيدى بوستاندىق اۋدانىنىڭ اكىمىنىڭ ورىنباسارى ساكەن ارالبايەۆ.
اكسيا بارىسىندا قاتىسۋشىلار قوقىس تازالاپ، تۇسكەن جاپىراقتاردى جيناپ، اۋماقتى اباتتاندىرۋدا بەلسەندىلىك تانىتتى. الماتى قالاسى اكىمدىگى بارلىق قاجەتتى قولداۋ كورسەتىپ، اعاش كوشەتتەرىن، تازالاۋ مەن وتىرعىزۋ قۇرالدارىن (قولعاپ، قاپ، كۇرەك، كۇرەك) ۇسىندى. جينالعان قالدىقتار كەيىن قايتا وڭدەۋ ءۇشىن پوليگونعا جىبەرىلەتىن بولادى.
«مەن وسى ساياباققا جاقىن جەردە تۇرامىن. وتباسىمىزبەن دەمالىپ، بوس ۋاقىت وتكىزەمىز. ءبىز ءۇشىن بۇل ساياباقتىڭ وزگەرگەنى وتە ماڭىزدى. قىستان كەيىن جاپىراقتاردى جيناپ، اعاشتار وتىرعىزامىز، تابيعات كوز الدىمىزدا جاڭارىپ جاتقانىن كورەمىز. الماتىنىڭ تازا ءارى ادەمى بولۋىنا ءبارىمىز جاۋاپتىمىز، سوندىقتان قالا تابيعاتىنا قامقورلىق جاساۋعا شاقىرامىن»، دەيدى اۋدان تۇرعىنى ۆيكتور كيم.
اكسيا بارىسىندا سالتاناتتى شارالار مەن مۋزىكالىق باعدارلامالار ەرەكشە مەرەكەلىك اتموسفەرا سىيلادى. شاراعا جاستار دا بەلسەنە قاتىسىپ، وزدەرىنىڭ بەلسەندى ازاماتتىق ۇستانىمدارىن ءبىلدىردى.
«سەنبىلىككە قاتىسۋ بىزگە بەلسەندى ازاماتتىق ۇستانىمىمىزدى كورسەتۋگە مۇمكىندىك بەرەدى. بۇل — اينالانى تازا ءارى جايلى ەتۋگە ۇلەس قوسۋ عانا ەمەس، سونىمەن قاتار جاڭا ادامدارمەن تانىسىپ، قىزىقتى ءارى پايدالى ۋاقىت وتكىزۋ مۇمكىندىگى. ءبىز ءاردايىم وسىنداي باستامالاردى قولدايمىز، بىرگە قالامىزدى جاقسارتا الامىز!»، - دەيدى ميتۋ ستۋدەنتى نۇرجان اكيشيەۆ.
اكسيانى جاقىن ماڭداعى مەكەمەلەردىڭ، مەكتەپتەردىڭ، بالاباقشالاردىڭ جانە ەمحانالاردىڭ قىزمەتكەرلەرى دە قولدادى.
«سەنبىلىكتەرە قاتىسىپ، ءبىز بولاشاق ۇرپاققا تابيعاتتى قورعاۋ جانە ءوز قالامىزعا قامقورلىق جاساۋ ماڭىزدى ەكەنىن كورسەتەمىز. بىرلەسىپ ەڭبەك ەتە وتىرىپ، بالالار مەن جاسوسپىرىمدەرگە ەڭبەككە، جاۋاپكەرشىلىككە جانە كوماندالىق جۇمىسقا دەگەن قۇرمەتتى قالىپتاستىرامىز. مۇنداي باستامالار جاستارعا الەمدى جاقسىراق ەتۋگە دەگەن ۇمتىلىس تۋدىرادى»، - دەيدى №94 گيمنازيانىڭ تاربيە ءىسى جونىندەگى ورىنباسارى مەيرامبەك جانداۋلەتوۆ.
جالپى اكسيا قالا اۋماعىندا، قوعامدىق ورىنداردا، ساياباقتار مەن سكۆەرلەردە، سونداي-اق تۇرعىن ءۇي اۋماقتارىندا ءوتتى. بۇل شاراعا مىڭداعان قالا تۇرعىنى، قوعامدىق ۇيىمدار، كوممۋنالدىق قىزمەت قىزمەتكەرلەرى مەن ەرىكتىلەر قاتىستى.