الماتى – ەلىمىزدىڭ ەڭ كورىكتى، تابيعاتى اسەم قالالارىنىڭ ءبىرى. تاۋ مەن وزەننىڭ اراسىنداعى بۇل مەگاپوليسكە تەك قازاقستاندىقتار عانا ەمەس، شەتەلدىك تۋريستەر دە ءجيى كەلەدى. سوندىقتان دا قالانىڭ ءاربىر بۇرىشىنىڭ تازا ءارى جايلى بولۋى – بارشامىزدىڭ ورتاق مىندەتىمىز. وسى ورايدا ەل كولەمىندە جاريالانعان «تازا قازاقستان» اكسياسى اياسىندا سايران كولىنىڭ جاعالاۋىندا ەرەكشە ءىس-شارا ءوتتى.
بۇل يگى باستامانىڭ باسىندا – 20 جاستاعى جاس بلوگەر دۋلات نابييەۆ تۇر. ول «ۆيرۋس» اتتى الەۋمەتتىك جوباسىن قولعا الىپ، سونىڭ اياسىندا «90 كۇن – تازا قالا ءۇشىن» اتتى ەكوچەللەندجدى باستاعان بولاتىن. نەگىزگى ماقساتى – جاستاردى الەۋمەتتىك جەلى ارقىلى ەكولوگيالىق مادەنيەتكە باۋلۋ، قالا تۇرعىندارىن تابيعاتتى ايالاۋعا ۇندەۋ.
دۋلاتتىڭ ايتۋىنشا، باستاپقىدا ول الەۋمەتتىك جەلىلەردە ۋاقىتىن بوسقا وتكىزىپ جۇرگەنىن ءتۇسىنىپ، قوعامعا پايدالى كونتەنت جاساۋدى قولعا العان.
«العاشقى كۇندەرى بىزدە تاجىريبە دە، قاجەتتى قۇرالدار دا بولعان جوق. سوعان قاراماستان الماتى كوشەلەرىنەن قوقىس جيناۋدى باستادىم. العاشقى اپتادا كۇن سايىن 10 قاپتان اسا قوقىس شىعاردىق. الەۋمەتتىك جەلىدە جاريالاعان سوڭ، حالىق قولداۋ ءبىلدىرىپ، بىزگە قوسىلا باستادى»، – دەيدى ول.
وسىلايشا چەللەندجدىڭ 11ء-شى كۇنىنەن باستاپ سايران كولىنىڭ اۋماعىن تازالاۋ باستالدى. ويتكەنى بۇل جەردە حالىق كوپ جينالاتىنىنا قاراماستان، قوقىس تا ءجيى قالاتىن. العاشقىدا التى-اق ەرىكتىمەن جۇمىس ىستەگەن جاستار بىرتە-بىرتە وتىزدان استام بەلسەندىلەردىڭ باسىن قوستى. ءقازىر دۋلاتتىڭ باستاماسىنا تەك الماتى جاستارى عانا ەمەس، باسقا وڭىرلەردىڭ دە بەلسەندىلەرى قوسىلدى. شىمكەنتتە ەكى جۇزدەن استام جاس، جاركەنتتە 150-گە جۋىق، جەتىسايدا 100-گە تارتا ەرىكتى جوباعا اتسالىسقان. جالپى ءتورت قالادا جينالعان ەرىكتىلەردىڭ سانى 500-گە جەتكەن.
– ءبىزدىڭ ەڭ باستى ماقساتىمىز – 90 كۇن ىشىندە الماتىنى عانا ەمەس، ەلىمىزدىڭ وزگە قالالارىن دا تازالىققا شاقىرۋ. بۇل تەك قوقىس جيناۋ ەمەس، حالىقتىڭ ەكولوگيالىق مادەنيەتىن قالىپتاستىرۋ. قالا تۇرعىندارىنا ۇلگى بولىپ، تابيعاتتى قورعاۋعا دەگەن سۇيىسپەنشىلىگىن وياتقىمىز كەلەدى»، – دەيدى دۋلات نابييەۆ.
جاستاردىڭ بۇل يگى ىسىنە كاسىپكەرلەر دە، مەملەكەتتىك ورگاندار دا قولداۋ ءبىلدىرىپ وتىر. ماسەلەن، وتاندىق كومپانيالار ارنايى قاپتار، قولعاپتارمەن قامتاماسىز ەتىپ، ءتىپتى تەحنيكا تۇرىندە كومەك كورسەتكەن. كەيبىر كاسىپكەرلەر كومانداعا قاجەتتى قۇرال-جابدىقتار سىيلاسا، الماتى قالاسى اكىمدىگى مەن جاستار ساياساتى باسقارماسى ۇيىمداستىرۋشىلىق تۇرعىدا قولداۋ تانىتقان.
سونىمەن بىرگە چەللەندجدىڭ الەۋمەتتىك جەلىلەردەگى پاراقشالارى ارقىلى حالىق تا ءوز ۇلەسىن قوسىپ، ەرىكتىلەردىڭ تاماعىنا، جول شىعىندارىنا قارجىلاي كومەك بەرىپ وتىر.
«تازا قازاقستان» اكسياسى اياسىندا وتكەن سايرانداعى شاراعا جينالعان قوقىستىڭ كولەمى جۇزدەگەن قاپقا جەتتى. بۇل – تەك جاستاردىڭ عانا ەمەس، بارشامىزدىڭ ويلاناتىن ماسەلەسى. قالا تازالىعى ءار تۇرعىننىڭ جاۋاپكەرشىلىگىنە تىكەلەي بايلانىستى.
جاس بلوگەردىڭ باستاماسى قوعامدا ۇلكەن سەرپىلىس تۋدىرىپ وتىر. ەكوچەللەندجگە قاتىسقان ءاربىر جاس تابيعاتتى قورعاۋدىڭ ماڭىزىن ءتۇسىنىپ، وزگەلەرگە ۇلگى بولۋدا.
الماتىنىڭ اسەم تابيعاتىن ساقتاۋ – بۇگىنگى ۇرپاقتىڭ عانا ەمەس، كەلەشەك بۋىننىڭ دا يگىلىگى. سوندىقتان قالا تۇرعىندارى تازالىقتى ساقتاپ، ەكولوگيالىق مادەنيەتتى قالىپتاستىرۋعا بىرگە ۇلەس قوسقانى ابزال.