«تازا قازاقستان»: الماتىدا ەكولوگيالىق مادەنيەتتى قالىپتاستىرۋعا باعىتتالعان اكسيا جالعاسۋدا
الماتى قالاسىندا رەسپۋبليكالىق «تازا قازاقستان» ەكولوگيالىق اكسياسى جالعاسۋدا. بۇگىن، 12 شىلدەدە قالانىڭ بارلىق اۋداندارىندا كەزەكتى سەنبىلىك ءوتتى. بۇل شاراعا جەرگىلىكتى تۇرعىندار، ەرىكتىلەر، قوعام بەلسەندىلەرى، مەملەكەتتىك ورگاندار مەن جەكەمەنشىك ۇيىم وكىلدەرى قاتىستى.
كامپانيانىڭ ماقساتى — تەك اۋماقتاردى سانيتارلىق تازارتۋ عانا ەمەس، سونىمەن قاتار ەكولوگيالىق مادەنيەتتى قالىپتاستىرۋ، ازاماتتىق جاۋاپكەرشىلىك سەزىمىن دامىتۋ.
تۇركسىب اۋدانىندا «جاس قانات» جانە «ماياك» ىقشاماۋداندارىندا ءبىرقاتار شارالار وتكىزىلدى: كوشەلەر مەن تروتۋارلاردى جۋۋ، جاسىل جەلەكتەردى شابۋ، ارىق جۇيەسىن تازالاۋ، قۇرىلىس قالدىقتارى مەن باسقا دا قوقىستاردى شىعارۋ جۇمىستارى ۇيىمداستىرىلدى.
تۇركسىب اۋدانىنىڭ اكىمى باقىتجان اقجاروۆتىڭ ايتۋىنشا، ەكولوگيالىق جۇمىستار جۇيەلى تۇردە جۇرگىزىلۋدە: — ءبىز اۋداندى بىرنەشە اۋماققا بولدىك. ءار اپتا سايىن بەلگىلى ءبىر اۋماقتا تازالىق جۇمىستارى جۇرگىزىلەدى. بۇل — كوبىرەك اۋماقتى قامتۋعا ءارى ۇنەمى ءتارتىپتى ساقتاۋعا مۇمكىندىك بەرەدى. مۇنداي ءىس-شارالار سانيتارلىق تازالىقپەن قاتار، قوعامنىڭ ەكولوگياعا دەگەن كوزقاراسىن وزگەرتۋگە دە ىقپال ەتەدى، — دەدى اكىم.
كەيبىر تۇرعىندار سەنبىلىككە تۇتاس وتباسىمەن كەلگەن. — بۇل — جاقسى ەكولوگيالىق ءداستۇر. قوقىستى تەك سىناپ قانا قويماي، قولعا قولعاپ كيىپ، قالتامىزعا قاپ سالىپ كەلىپ، ءوزىمىز تازارتقان ءجون. مەن مۇنداي شاراعا بىرنەشە رەت قاتىستىم. وسىنداي سەنبىلىكتەردەن كەيىن قالانى باسقا كوزبەن قارايسىڭ، — دەدى اۋدان تۇرعىنى سالتانات بيسەكەنوۆا.
تۇركسىب اۋدانىنداعى ەكولوگيالىق اكسياعا شامامەن 1000 ادام مەن 14 تەحنيكا قاتىسىپ، 145 م³-تان استام قوقىس شىعارىلدى.
جەتىسۋ اۋدانىندا دا 1000 ادام مەن 30 تەحنيكا قاتىسىپ، 120 م³ قوقىس تازارتىلدى.
اۋەزوۆ اۋدانىنداعى نەگىزگى لوكاسيا — ساين–شالياپين–مومىش ۇلى–اباي كوشەلەرىنىڭ كۆادراتى بولدى. مۇندا 700-دەن استام ادام مەن 15 تەحنيكا جۇمىلدىرىلىپ، 300 م³ قوقىس شىعارىلدى.
ناۋرىزباي اۋدانىندا 500-گە جۋىق قاتىسۋشى مەن 15 تەحنيكا 220 م³ قوقىس شىعاردى.
المالى اۋدانىندا 700-دەن استام ادام مەن 25 تەحنيكا قاتىسىپ، 260 م³ قوقىس تازارتىلدى.
بوستاندىق اۋدانىندا سەنبىلىك «وڭتۇستىك» ساياباعى مەن ءال-فارابي داڭعىلى مەن ساناتورنايا كوشەسىنىڭ قيىلىسىنداعى بوس اۋماقتا ءوتتى. مۇندا 870 ادام، 7 تەحنيكا جۇمىلدىرىلىپ، 230 م³ قوقىس شىعارىلدى.
الاتاۋ اۋدانىندا (750 ادام، 25 تەحنيكا، 260 م³ قوقىس) «شاڭىراق-1» ىقشاماۋدانىندا جەرگىلىكتى سەنبىلىك ۇيىمداستىرىلدى.
مەدەۋ اۋدانىندا (520 ادام، 22 تەحنيكا، 330 م³ قوقىس) نەگىزگى ايماق Halyk Arena اينالاسى بولدى. مۇندا «بولەك قوقىس» جانە «ەكىنشى ءومىر» اتتى ەكولوگيالىق اكسيالار ءوتتى، ينتەراكتيۆتى ويىندار مەن ۆيكتورينالار ۇيىمداستىرىلدى. وعان Eco Network نەگىزىن قالاۋشى، تانىمال ەكواكتيۆيست ەۆگەنيي مۋحامەدجانوۆ قاتىستى.
جالپى، الماتى قالاسىندا وتكەن تازالىق شارالارىنا 6000-نان استام ادام قاتىسىپ، ولاردىڭ كۇشىمەن 1865 م³ قوقىس جينالىپ، شىعارىلدى.