«AMANAT» پارتياسىنىڭ «تازا بەيسەنبى» ەكولوگيالىق اكسياسى جازدىڭ باسىندا پرەزيدەنتتىڭ «تازا قازاقستان» جالپىۇلتتىق باستاماسى اياسىندا باستالعان بولاتىن. كولدەر مەن سۋ ايدىندارىنىڭ اينالاسىن، اۋىلدار مەن قالالاردىڭ اۋماقتارىن قوقىستان تازارتۋ جانە قوقىستاردى سۇرىپتاۋدان بولەك، بۇل اكسيا قورشاعان ورتانى قورعاۋ، سونداي-اق تازا ءارى تۇراقتى ەنەرگيا كوزدەرىنە كوشۋ ماسەلەلەرىنە قوعامنىڭ نازارىن اۋدارۋدى كوزدەيدى.
بۇعان دەيىن پرەزيدەنت قاسىم-جومارت توقايەۆ «تازا قازاقستان» جالپىۇلتتىق اكسياسىن تۇراقتى تۇردە وتكىزىپ تۇرۋ تۋرالى جاريالاعان ەدى. مەملەكەت باسشىسى قازاقستان ءارقاشان تازا ءارى كورىكتى بولۋى كەرەكتىگىن، بۇل ەلدىڭ كۇندەلىكتى ءومىر سالتىنا اينالۋى تيىستىگىن اتاپ ءوتتى. 6 ماۋسىمنان باستاپ ءار بەيسەنبى سايىن «AMANAT» پارتياسىنىڭ مىڭداعان بەلسەندىلەرى مەن مۇشەلەرى ءارتۇرلى اۋماقتاردى قوقىستان تازارتىپ كەلەدى.
ماسەلەن، «جاستار رۋحى» جاستار قاناتىنىڭ مۇشەلەرى سەمەي قالاسىندا ەرتىس وزەنىنىڭ جاعالاۋىنان ەكى شاقىرىمنان استام اۋماقتى تازارتتى. ەكو-بەلسەندىلەر 100-دەن استام قاپ قوقىس جينادى. ۆولونتەرلەردىڭ ايتۋىنشا، «حولودنىي كليۋچ» اۋدانى ەڭ لاستانعان اۋماقتاردىڭ ءبىرى بولىپ سانالادى. مۇندا قالالىق جەو ورنالاسقان. اكسياعا قاتىسۋشى نازەركe بەكمەتوۆانىڭ ايتۋىنشا، جاڭا اەس-تىڭ قۇرىلىسى ەكولوگيانى گاز بەن كۇلدىڭ لاستانۋىنان ارىلتادى.
«مەن مۇندا ەرىكتى رەتىندە كەلدىم. بۇگىن ءبىز حولودنىي كليۋچ اۋدانىندا «تازا قازاقستان» اكسياسىنا قاتىسىپ جاتىرمىز. جالپى قاتىسۋشىلار سانى شامامەن 50 ادام. ءبىز جەو ايماعىندا تازالاۋ جۇمىستارىن جۇرگىزۋدەمىز. ەگەر بۇل جەردە اەس ورنالاسسا، مەنىڭ ويىمشا، ەكولوگيا الدەقايدا جاقسى، تازا بولىپ، قوقىس تا ازايار ەدى»، – دەدى ول.
اتىراۋ وبلىسىنىڭ ماقات اۋىلىندا «AMANAT» پارتياسىنىڭ 60-قا جۋىق بەلسەندىسى مەن جاقتاسى «قامقور» لوكوموتيۆ جوندەۋ دەپوسىنىڭ ۇجىمىمەن بىرگە شامامەن 1 توننا قوقىس جينادى. جەرگىلىكتى تۇرعىنداردىڭ ايتۋىنشا، مۇنداي ءىس-شارالار تابيعات ءۇشىن عانا ەمەس، اۋىل تۇرعىندارىنىڭ تۋعان جەرىنىڭ يگىلىگى ءۇشىن بىرىگۋىنە دە كومەكتەسەدى.
يگى ىستەن قوستاناي قالاسىنىڭ پارتيا مۇشەلەرى دە شەت قالمادى، مۇندا بەلسەندىلەر قالالىق جاعاجاي ماڭىنداعى ساياباق ايماعىن قوقىستان تازارتتى. جەرگىلىكتى تۇرعىن امانگەلدى كوشەربايەۆتىڭ ايتۋىنشا، بۇل جاي عانا كوممۋنالدىق قىزمەتتەرگە كومەكتەسۋ عانا ەمەس، سونىمەن قاتار اكسيا اياسىندا ەكولوگيانى قورعاۋ ءۇشىن قابىلداناتىن شارالاردى تالقىلاۋعا دا مۇمكىندىك بار.
«بۇل مەنىڭ قالام، سوندىقتان دا ەگەر ءبىز بولماساق، بۇل جەردى كىم جانە قاشان تازالايدى؟ ءبىز جاستاردى تابيعاتقا، مۇلىككە، جالپى قالاعا ۇقىپتى قاراۋعا ۇيرەتەمىز. اسىرەسە، اۋلا سىپىرۋشىلار مەن باعبانداردىڭ ەڭبەگىن قۇرمەتتەۋگە ۇگىتتەيمىز. بۇدان بولەك، ءبىز قورشاعان ورتانى قورعاۋ، زياندى شىعارىندىلاردى ازايتۋ تۋرالى دا سويلەسەمىز. سوڭعى ماسەلەنى اەس قۇرىلىسى، اتوم ەنەرگەتيكاسىنىڭ دامۋى شەشە الادى. ال بىزدە بۇل باعىتتا تالانتتى جاس عالىمدار بارشىلىق»، – دەدى ول.
وسكەمەن قالاسىندا 70-تەن استام بەلسەندى تۇرعىن «كوتلوۆان» اۋدانىندا 200-دەن استام قاپ قوقىس جينادى. بارلىق قالدىقتار سۇرىپتاۋعا جانە قايتا وڭدەۋگە جىبەرىلدى. پارتيانىڭ شىعىس قازاقستان وبلىستىق فيليالىنىڭ اتقارۋشى حاتشىسىنىڭ ورىنباسارى امانباي نۇركەنوۆ بىرلەسكەن تازالىق جۇمىستارى قوعامدا ەكولوگيالىق مادەنيەتتى قالىپتاستىراتىنىن ايتتى.
شىمكەنتتە ەڭبەكشى اۋدانىنىڭ جىبەك جولى كوشەسىندەگى اۋلالاردىڭ بىرىندە 100-دەن استام ادام جينالىپ، تازالىق جۇمىستارىن جۇرگىزدى. ولار قاتتى تۇرمىستىق قالدىقتاردى سۇرىپتاپ، ءشوپ پەن قۇرعاق بۇتاقتاردى جينادى. بەلسەندىلەردىڭ پىكىرىنشە، قورشاعان ورتانى قورعاۋ جانە تۋعان جەردىڭ تازالىعىن ساقتاۋ – ءاربىر ازاماتتىڭ ورتاق مىندەتى.
ۇقساس ءىس-شارالار ەلىمىزدىڭ وزگە وڭىرلەرىندە دە ءوتتى. پارتيا مۇشەلەرى وسىنداي تازالىق جۇمىستارىن ءار بەيسەنبى سايىن جۇرگىزەدى. ءار ۋچاسكەگە ءماسليحات دەپۋتاتتارى، بەلسەندىلەر مەن باستاۋىش پارتيا ۇيىمدارىنىڭ باسشىلارى بەكىتىلگەن. ولار ءوز جاۋاپكەرشىلىگىنە العان ۋچاسكەلەردە ءتارتىپ پەن تازالىقتى قامتاماسىز ەتەدى. سونداي-اق قوقىس جاشىكتەرىن ورناتۋ، اۋماقتاردى كوگالداندىرۋ، جولدار مەن تروتۋارلاردى جوندەۋ سياقتى ينفراقۇرىلىمدى جاقسارتۋ مەن دامىتۋ ماسەلەلەرىن شەشەدى.