زاڭناماعا وزگەرىس ەنگىزىلدى
الماتىدا تاۋعا شىعاتىن تۋريستەر جۇرەتىن مارشرۋتتارىن قۇتقارۋشىلارمەن الدىن الا كەلىسەتىن بولادى. زاڭناماعا ەنگىزىلەتىن بۇل وزگەرىس تۋرالى الماتىعا جۇمىس ساپارىمەن كەلگەن توتەنشە جاعدايلار ءمينيسترى يۋريي يلين ايتتى، دەپ حابارلايدى Almaty-akshamy.kz قازاقپارات-قا سىلتەمە جاساپ. مينيستر تابيعي ورتتەر، كوشكىن ءقاۋپى بار كەزەڭ مەن سۋ تاسقىنىنان تۋىنداعان توتەنشە جاعدايلاردىڭ الدىن الۋعا جانە جويۋعا باعىتتالعان جۇمىستار بويىنشا جينالىس وتكىزدى. يۋريي يلين مەملەكەت باسشىسىنىڭ ەلدەگى توتەنشە جاعدايلاردىڭ سانىن ازايتۋ جونىندەگى تاپسىرماسىن ەسكە سالىپ، بيزنەس-قاۋىمداستىق جاۋاپتى ۆەدومستۆوعا توتەنشە جاعدايلاردىڭ الدىن الۋعا كومەكتەسۋى ءتيىس ەكەندىگىن اتاپ ءوتتى.
«ءبىز مارشرۋتقا شىعاتىن بارلىق تۋريستىك توپتاردى الماتىنىڭ توتەنشە جاعدايلار دەپارتامەنتىمەن باعىتتاردى ماقۇلداپ، حابارلاپ وتىرۋعا مىندەتتەۋ جونىندە زاڭناماعا وزگەرىس ەنگىزۋگە باستاماشىلىق ەتپەكپىز. ءتۋريزمدى دامىتۋ بويىنشا ءفرونت-وفيستىڭ قۇرىلۋىن ەسكەرە وتىرىپ، توپتاردىڭ قالاي قوزعالاتىنىن باقىلاۋ ءۇشىن رەسپۋبليكالىق جەدەل-قۇتقارۋ جاساقتارىمەن بىرگە تۋريستىك مارشرۋتتاردى تىركەۋدىڭ ەلەكتروندى نۇسقاسىن تەزىرەك ىسكە قوسۋ قاجەت»، - دەپ ۇسىندى يۋ.يلين.
بۇدان بولەك، ازاماتتىق قورعاۋ ورگاندارى قىزمەتكەرلەرىنىڭ ەڭبەكاقىسىن كوتەرۋ، قۇقىقتىق جانە الەۋمەتتىك نەگىزدە قورعالۋىن ارتتىرۋ ماسەلەسى كوتەرىلدى.