ءمولدىر مايلىبايەۆا، م.مامەتوۆا اتىنداعى №28 مەكتەپ-ليسەيىنىڭ قازاق ءتىلى مەن ادەبيەتى ءپانىنىڭ ءمۇعالىمى:
– تاۋەلسىزدىك – كەز كەلگەن ادامنىڭ، ۇلتتىڭ، حالىقتىڭ، ەلدىڭ ەركىندىگى. تاۋەلسىزدىك – ەڭ الدىمەن قازاق حالقىنىڭ بوستاندىققا ۇمتىلعان اسقاق ارماندارى مەن قايسار رۋحىنىڭ جەمىسى دەپ بىلەمىز. وسىناۋ ەركىندىگىمىزدىڭ ارقاسىندا ۇستازدىق قىزمەتتى تاڭداپ، ءبىلىم باعىتىنا بەت بۇردىم. تاۋەلسىزدىكتىڭ 30 جىلىندا «ءبىلىم تۋرالى» ءۇش زاڭ قابىلدانىپتى. 1992، 1999، 2007 جىلدارى ءبىلىم بەرۋ جۇيەسىنىڭ قۇرىلىمى يۋنەسكو-نىڭ حالىقارالىق ستاندارتتىق قۇرىلىمىنا سايكەستەندىرىلگەن.
جىل وتكەن سايىن بارلىق سالاعا وزگەرىستەر مەن تولىقتىرۋلار ەنگىزىلەتىنى بەلگىلى. سوندىقتان دا بولار ءبىز ءۇشىن تاۋەلسىزدىك كۇنى – ەڭ قاستەرلى كۇن. وسىناۋ جىلدار ىشىندە ەگەمەن ەلىمىز الەمدىك ارەنادا وزىندىك ورنىن تابا ءبىلدى. قازاقستان رەسپۋبليكاسى دامىعان ەلدەر قاتارىنا ەنىپ، حالىقارالىق قاتىناسى، تۇرعىنداردىڭ تۇرمىس-تىرشىلىگى، ەكونوميكالىق-الەۋمەتتىك جاعدايى وڭالدى.
بۇگىنگى كۇنى مۇعالىمدەردىڭ اراسىندا قاعازباستىلىق جويىلدى. ەلدەگى ەپيدەميولوگيالىق جاعدايعا بايلانىستى وقۋشىلارعا بارىنشا جاعداي جاسالىپ، ءبىلىم جۇيەسى جاقسارا ءتۇستى. الماتىنىڭ وزىندە بيىلعى وقۋ جىلىندا الپىس مىڭعا جۋىق كومپيۋتەر الىنىپ، ءمۇعالىم مەن وقۋشىلارعا تاراتىلدى.
قالا اكىمدىگى قارجى ءبولىپ، قالاداعى بارلىق وقۋشىنى وقۋلىقپەن تولىق قامتاماسىز ەتتى. ودان بولەك، ءبىلىم سالاسىنا كوڭىل ءبولىنىپ، پرەزيدەنتتىڭ تاپسىرماسىمەن مۇعالىمدەردىڭ جالاقىسى دا كوبەيىپ جاتىر.
بيىلدان باستاپ پەداگوگيكا سالاسىندا وقيتىن بولاشاق مۇعالىمدەردىڭ شاكىرتاقىسى 42 مىڭ تەڭگە بولدى. نىق قادام جاساپ، كەلەشەكتە ۇستاز بولۋ — ۇلكەن مارتەبە دەيتىن كۇنگە جەتكەلى تۇرمىز. ساپالى ءبىلىم بەرىلۋى ءۇشىن ءبىلىم جانە عىلىم مينيسترلىگى 25 جوعارى وقۋ ورنىن ليسەنزياسىنان ايىردى.
ارينە، ءارتۇرلى سالا بويىنشا قارادى. وسىلاي-وسىلاي، «ديپلوم ساۋداسى» دا توقتارىنا سەنەمىن. سەبەبى بۇل ماسەلەنى پرەزيدەنتتىڭ ءوزى بىرنەشە رەت كوتەردى، مينيسترلىك تە سوعان ساي جۇمىس ىستەپ جاتىر.
تاۋەلسىز ەلدىڭ تاۋەلسىز ويلاي بىلەتىن جاستارىنا تاربيە مەن ءبىلىمدى قاتار بەرەتىن قۇرمەتتى ۇستازداردىڭ مەرەيى ۇستەم بولىپ، ەگەمەن ەلىمىزدە ءبىلىمدى جاستاردىڭ سانى ارتسا دەيمىن.